Nọmbas 3 - Edo Bible (E Baibol Ẹdo) Version 1996

Ivbi Errọn Nikpia

¹ Ẹgbẹe ọghe Errọn kevbe Mosis do sẹ ẹghẹ ne Nọyaẹnmwa na gu e Mosis guan vbe Oke Sainai ọre ena khin.

² Errọn kegha mwẹ emọ ikpia enẹ: e Nadab ne ọ re ọdiọn, Abihu, Eliaza kevbe Itama.

³ A nọnọ ori ye iran uhunmwu, a kevbe ma iran ohẹn.

⁴ Sokpan ẹghẹ ne Nadab kevbe Abihu na ya erhẹn awua zẹ ọhẹ gie Nọyaẹnmwa vbe Ato Sainai, a keghi gbele iran an. Iran i mwẹ emọ rhunmwuda onii Eliaza kevbe Itama kegha ru ugamwẹ ohẹn la ẹghẹ ne Errọn ne erha iran na gha rre agbọn.

A Zẹ Avbe Livai Ne Iran Gha Ga Avbe Ohẹn

⁵ E Nọyaẹnmwa keghi tama e Mosis wẹẹ,

⁶ “Viọ ivbi ẹwae Livai ladian ne u zẹ iran ni ga Errọn ne ohẹn.

⁷ Iran ghi gha winna iwinna ni rre uwu Owa Ukpọn Ile, iran ghi gha winna ne avbe ohẹn kevbe avbe emwa nii hia.

⁸ Iran ghi gha gbe aro ghe emwi ne a lo vbe uwu Owa Ukpọn hia, iran ghi vbe gha winna ne ivbi Izrẹl ni dekẹe.

⁹ Iwinna ọkpa ne ọ mobọ re ọghe avbe Livai ọrọre ne iran gha winna ne Errọn kevbe ivbi ẹre.

¹⁰ Sokpan, u ghi zẹ Errọn kevbe ivbi ẹre ne iran gha re ohẹn, ọmwa ọvbehe ne ọ rhirhi danmwẹ ọẹn ghe ne ọ winna iwinna iran, a ghi gbẹe rua.”

¹¹ E Nọyaẹnmwa keghi tama e Mosis wẹẹ,

^12-13 “Avbe Livai ọre I gha viọ ye ihe emọ ọdiọn hia ọghe avbe ivbi Izrẹl, iran ghi gha re ọghomwẹ, rhunmwuda, emọ ọdiọn nikpia hia, ọghomwẹ iran khin. Ẹghẹ ne I na gbele emọdiọn nikpia vbe Igipt, I keghi vbe ya emọ ọdiọn ikpia ni rre ivbi Izrẹl fi ohan ne egbe mwẹ, deba emọ ọdiọn ọghe emwirri. Mẹ ọrọre Nọyaẹnmwa.”

Ukamwẹ Ivbi E Livai

¹⁴ E Nọyaẹnmwa keghi tama e Mosis vbe Ato Sainai wẹẹ,

¹⁵ “Gbẹnnẹ eni avbe Livai ye ebe, ẹgbẹe kevbe dọmwadẹ ẹwae, u ghi gbẹnnẹ eni emọ ikpia hia ni rre uki ọkpa gha khian.”

¹⁶ Ẹ Mosis keghi ru vberriọ.

^17-20 E Livai kegha mwẹ emọ ikpia eha: e Gẹsiọn, e Kohan kevbe Merari, ena ọrọre erha odede avbe uniẹn ne a tie eni ẹnrẹn vberriọ. E Gẹsiọn kegha mwẹ emọ eva: e Libni kevbe Simẹi; e Kohan kegha mwẹ emọ enẹ: Amram, Iza, e Hibrọn kevbe Uziẹl; e Merari mwẹ emọ eva e Mali kevbe Musi. Iran na ọre erhan odede avbe emwa ne a he iran eni gie.

²¹ Uniẹn eva ọre ọ rre ẹwae ọghe Gẹsiọn: avbe Libni kevbe Simẹi.

²² Emọ ikpia hia ne a kae, kevbe ọmọ uki ọkpa gha rrie odukhunmwu kegha re iyisẹn yan uri eva yan arriaisẹn ihinrọn (7,500).

²³ A keghi wẹ ne ẹwae na bu agọ ye iyeke Owa Ukpọn vbe asefẹn orrie ẹre.

²⁴ Ne Eliasaf ne ovbi Laẹl gha re ọkaẹvbo ẹwae nii.

²⁵ Iran na ọ re a mu ẹmwẹ Owa Ukpọn Ile ye ọre obọ, emwi ne a ya gue ẹre vbe uwu ẹre, kevbe ne a ya gue ẹre vbe ore, ukpọn ne ọ rre onurho ẹre.

²⁶ Ukpọn ne a ya gue ibare ni lẹga Owa Ukpọn nii kevbe aka, deba ukpọn onurho ne a la la ibare. Iran ọ re a mu iwinna ni kevbe avbe emwi na hia ye ọre obọ.

²⁷ Uniẹn enẹ ọ re ọ rre ẹwae Kohan, avbe Amram, Izia, e Hibrọn kevbe Uziẹl.

²⁸ Ikpia ni rre uki ọkpa gha rrie odukhunmwu hia ne a gbẹnnẹ eni ẹnrẹn, kegha re uri eha yan arriaisẹn erẹnrẹn (8,600).

²⁹ Ẹwae na ghi bu agọ ye asefẹn ekẹn ọghe owa ukpọn,

³⁰ Elizafan ne ovbi Uziẹl ghi gha re ọkaẹvbo ẹwae nii.

³¹ Iran ọre a mu iwinna ne ọ dekan Ẹkpẹti Ile na, kevbe eteburu, erhan ọmukpa, aka, kevbe avbe ọkpan ne avbe ohẹn ya ru emwi vbe Ehe Ne ọ huanrẹn, deba iwinna ni ghi rre avbe emwi na hia.

³² Ọkaolotu avbe Livai kegha re Eliaza ne ovbi Errọn ne ohẹn, rẹn ọre ọ gha gbe aro ghe iran ni winna vbe uwu Ehe Ne ọ huanrẹn.

³³ Uniẹn eva ọre ọ rre ẹwae Merari, avbe Mali kevbe avọe Musi.

³⁴ Emọ ikpia hia ni rre ke ukpo ọkpa gha khian ne a gbẹnnẹ eni ẹnrẹn kegha re uri yan arriaisẹn ehan (6,200).

³⁵ Ọkaẹvbo ẹwae nii kegha re Zuriẹl ne ovbi Abihẹl. Iran na ghi bu agọ iran ye asefẹn okuo ọghe Owa Ukpọn.

³⁶ Iran na ọ re a mu iwinna ne ọ dekan edọnmwẹ Owa Ukpọn na, kevbe avbe Ogba ni rrọ, kevbe ọkpọ, ẹzi ẹre kevbe emwi ne a yọyọ lele ẹe kevbe iwinna ni ghi rre egbe emwi na hia.

³⁷ Iran ọ re ọ vbe yan iwinna ni rre egbe avbe ọkpọ, ẹzi ẹre, ogba kevbe irri ni rre ọgua ore.

³⁸ E Mosis kevbe Errọn kevbe avbe ivbi ẹre ghi bu agọ iran ye asefẹn ahọ ọghe Owa Ukpọn Ile. Iran ọ yan iwinna ne a winna vbe uwu Ehe Ne ọ huanrẹn ne ivbi Izrẹl. Ọmwa ọvbehe ne ọ rhirhi danmwẹ ọẹn ghe ne ọ ru ẹe, a ghi gbẹe rua.

³⁹ Ivbi Livai hia ni re ikpia ni rre ke ọmọ ukpo ọkpa gha khian ne Mosis gbẹnnẹ eni ẹnrẹn ye ebe zẹ vbene Nọyaẹnmwa tama rẹn kegha re arriaisẹn eva yan ugie (22,000).

Avbe Livai Rhie Ihe Emọdiọn Nikpia

^40-41 E Nọyaẹnmwa keghi tama e Mosis wẹẹ, “Mẹ ọre ọ yan emọdiọn nikpia vbe Izrẹl. Gbẹnnẹ emọdiọn nikpia ọghe Izrẹl hia ni rre uki ọkpa gha khian ye ebe, sokpan, ye ihe iran I viọ avbe Livai ya ru ọghomwẹ ye ihe avbe emọdiọn nikpia, Mẹ ọrọre Nọyaẹnmwa! I vbe viọ avbe ẹmila kevbe avbe Livai ya ru ọghomwẹ ye ihe emọdiọn avbe ẹmila.”

⁴² E Mosis keghi ru vbene Nọyaẹnmwa khare, ọ na gbẹnnẹ eni avbe emọdiọn nikpia hia.

⁴³ Ke uki ọkpa gha khian ye ebe, ehia kegha re eha yan ekigbe siyenẹ yan arriaisẹn eva yan ugie (22,273).

⁴⁴ E Nọyaẹnmwa keghi tama e Mosis wẹẹ,

⁴⁵ “Banbanna nian, ye avbe Livai fi ohan khian ọghomwẹ ye ihe emọ ọdiọn ikpia ọghe ivbi Izrẹl, ne u vbe ya emọdiọn avbe ẹmila ivbi e Livai ye ihe ivbi ẹmila ọghe ivbi Izrẹl.

⁴⁶ Vbene a ghi na miẹn wẹ emọ ọdiọn ikpia ọghe ivbi Izrẹl ya eha yan ekigbe siyenẹ yan uri (273) bun sẹ ivbi e Livai, wa ghi dẹlẹ avbe emọ ni dekẹe werriegbe.

⁴⁷ Wa ghi hae ikpẹ esiliva isisẹn ye ọkpọkpa zẹ vbe ive ne a yobọ yi.

⁴⁸ Wa ghi viọ igho na ne Errọn kevbe avbe ivbi ẹre.”

⁴⁹ E Mosis keghi ru vberriọ.

⁵⁰ Ọ keghi viọ ukhiọnmwẹ esilivaisẹnyan-ọgban irrọ vbe uri eva yan arriaisẹn (1,365) nii

⁵¹ ne Errọn kevbe avbe ivbi ẹre.