Nọmbas 27 - Edo Bible (E Baibol Ẹdo) Version 1996

Ivbi E Zẹlofehad Ne Ikhuo

¹ E Mala, e Noa, e Hogla, e Milka, kevbe Taza kegha re emọ ikhuo ọghe Zẹlofehad ne ovbi Hẹfa, ne ovbi Giliad ne ovbi e Makẹ ne ovbi e Manasẹ ne ovbi e Josẹf.

² Iran keghi ya mudia ye odaro e Mosis. Eliaza ne ohẹn, avbe ọkaolotu kevbe emwa Izrẹl hia, vbe onurho Owa Ukpọn Ile, iran na kha wẹẹ,

³ “Erha ima wu vbe otọ ẹgbo vbe ne ẹ i na mwẹ ọmọ okpia, rẹn i re ọkpa vbe uwu emwa ni yaba e Kora sọtẹ ghe Nọyaẹnmwa, orukhọ ọghe obọ ẹre ọre ọ gbe ẹe.

⁴ Vbọzẹ ne eni erha ima gha na gbe ẹro rhunmwuda ighẹ ọ ma biẹ ọmọ okpia. Wa ghae emwi ẹgbẹe ne ima vbe uwu ẹbu avbe etẹn erha mwa.”

⁵ E Mosis keghi mu ẹzọ iran bu e Nọyaẹnmwa gha dee.

⁶ Ẹre Nọyaẹnmwa na tama rẹn wẹẹ,

⁷ “Emwi ẹmwata ọre ivbi Zẹlofehad nọ rẹn, ghae emwi ewe ne iran vbe uwu ẹbu etẹn erha iran. Wa gie emwi ukhu ẹre do gha re ọghe iran.

⁸ Tama ivbi Izrẹl wẹ a deghẹ ọmwa wu vbe ne ẹ i na mwẹ ọmọ okpia, ovbi ẹre ne okhuo ghi rri ukhu ẹre.

⁹ A deghẹ ẹ i mwẹ ọmọ okhuo, avbe etiọnrẹn ne ikpia ghi rri ukhu ẹre.

¹⁰ A deghẹ ẹ i mwẹ etẹn ne ikpia etẹn erha ẹe ghi rri ukhu ni.

¹¹ A deghẹ ẹ i mwẹ etẹn ikpia ra etẹn erha, ẹghẹ nii ọtẹn ne ọ ghi si kẹ ọre sẹ ghi rri ukhu nii, ọ ghi da ẹe yi zẹ vbe ọghe ọe. Ivbi Izrẹl ghi da ẹmwẹ na yi zẹ vbe ilele uhi zẹ vbene imẹ ne Nọyaẹnmwa yi ẹre iyi ne uẹn.”

A Zẹ Jọsua Ne Ọ Rhie Ihe Mosis

¹² E Nọyaẹnmwa keghi tama e Mosis wẹẹ, “Hin uhunmwu Oke Abarim ne u tọn aro mu ghe otọe ne I mu ne ivbi Izrẹl.

¹³ U gha ghi bẹghe ẹre nẹ, u ghi wu zẹ vbene Errọn ne ọtuẹn vbe wu.

¹⁴ Rhunmwuda wa eva ọre ọ sọtẹ uhi mwẹ vbe ẹgbo e Zin. Ẹghẹ ne emwa ni na gha gui ẹzọ uwu unu ghe mwẹ vbe Mẹriba. wa ma kue ne uwa miẹn ẹtin mwẹ nọhuanrẹn kue ma iran.” (Mẹriba ọrọre ẹzẹ ne ọ rre Kedẹs vbe uwu ẹgbo Zin).

¹⁵ E Mosis keghi na erhunmwu wẹẹ,

¹⁶ “E Nọyaẹnmwa ne Osanobua, ehe ne arrọọ hia ke rre, lahọ zẹ ọmwa ne ọ gha sẹtin su emwa na.

¹⁷ Ne ọ gha vbe sẹtin gha su iran ye igbinna ne emwa ruẹn ghẹ do ye vbe ohuan ne ẹ i mwẹ ọsuohuan.”

¹⁸ E Nọyaẹnmwa keghi tama e Mosis wẹẹ, “Rhie Jọsua ne ovbi e Nọn, okpia ne ọ sẹ ihe ne u viọ obọ ruẹ yan ẹre uhunmwu.

¹⁹ U ghi rhie ẹre mudia ye odaro Eliaza ne ohẹn kevbe emwa nii hia, ne u vbe sirra iran tae ighẹ rẹn ọ re ọ ra rhie ihe ruẹ.

²⁰ Rhie eso vbe asẹ ruẹ ne ẹẹn, ne ivbi Izrẹl miẹn ehe na gha họn ẹmwẹ nẹẹn.

²¹ “Eliaza ne ohẹn ọre rẹn ra ye aro khọ, ọmwa ne ọ gha ya Urim kevbe Tumin gualọ otọ emwi ne I ho. Odẹ vbenian Eliaza ọre ọ ra gha dia e Jọsua kevbe emwa Izrẹl hia vbe emwi ne iran ra gha ru hia.”

²² E Mosis keghi ru ẹẹ vbene Nọyaẹnmwa tama rẹn. Ọ keghi rhie Jọsua mudia ye odaro Eliaza ne ohẹn ke emwa ni hia.

²³ E Mosis keghi viọ obọ yan Jọsua uhunmwu ze vbene Nọyaẹnmwa tama rẹn, ọ na ma ẹre ọmwa ne ọ rhie ihe irẹn.