Nọmbas 26 - Edo Bible (E Baibol Ẹdo) Version 1996

Ikaẹvbo Nogieva

¹ Ugbẹn vbe egboghogbogho nii ghi fo nẹ, e Nọyaẹnmwa keghi tama e Mosis kevbe Eliaza ne ovbie Errọn wẹẹ,

² “Ka ivbi Izrẹl hia fẹẹrẹ ẹgbẹe ọkpọkpa, iran ni rre ikpugie ra ni sẹ ọnii, emwa ni gha sẹtin yo okuo.”

^3-4 E Mosis kevbe Eliaza keghi ru vberriọ. Iran keghi si avbe emwa nii hia nii rre ikpugie kevbe ni sẹẹ ọnii koko. Iran keghi si koko vbe otọ ne ọhẹnhẹn ọghe Moab ne ọ rre iyeke Jọdan vbe a gha la Jẹriko la rọ. Iran na ọrọre ivbi Izrẹl ni ke Igipt ladian.

⁵ Ẹwae ọghe Riubẹn (Riubẹn ọrọre ovbi e Jekọb nọdiọn); ẹwae ọghe Hanọk keghi Palu,

⁶ Hẹzrọn kevbe Kami.

⁷ Inu emwa ni rre uniẹn na kegha re ekigbe siyenẹ i rre uri enẹ yan arriaisẹn eha yan iyeva (43,730).

⁸ Ivbi uniẹn Palu keghi re Eliab.

⁹ Kevbe avbe ivbi ẹre Nemuẹl, Datan kevbe Abiram. (Iran na ọre Datan kevbe Abiram ne emwa nii zẹe. Iran keghi yagha, e Mosis kevbe Errọn, iran kevbe yegbe ba iran ni lele Kora vbe iran sọtẹ e Nọyaẹnmwa.

¹⁰ Otọ keghi rhan unu minọ iran re, iran keghi wulo deba Kora kevbe iran ni lelẹe vbe ẹghẹ ne a na fuẹn arhin ekigbesiyeha yan uri (250) ne iran gha re ne emwa nekpa miẹn wan.

¹¹ Sokpan, a ma gbele ivbi e Kora.)

¹² Ẹwae ọghe Simiọn kegha re uniẹn ọghe Nemuẹl, Jamin, Jakin.

¹³ Zẹra kevbe Siọl:

¹⁴ Emwa ni rre uniẹn na kegha re uri yan arriaisẹn eva yan ugie (22,200).

¹⁵ Ẹwae ọghe Gad kegha re uniẹn ọghe Zefọn, Hagai Siuni,

¹⁶ Ozni, Eri.

¹⁷ Arod kevbe Asriẹl,

¹⁸ Emwa ni rre avbe uniẹn na kegha re iyisẹn yan uri eva yan arriaisẹn iyeva (40,500).

^19-21 Ẹwae ọghe Juda (eva vbe uwu ivbi e Juda Er kevbe Onan wulo nẹ vbe otọ Kenan): uniẹn ọghe Siẹla, Pẹrẹs, Zẹra, Hẹzrọn kevbe Hamul.

²² Emwa ni rre avbe uniẹn na kegha re iyisẹn yan uri eva yan arriaisẹn enẹirrọ vbe iyenẹ (76,500).

²³ Ẹwae ọghe Isaka kegha re uniẹn avbe Tola, Puua.

²⁴ E Jasiub kevbe Simrọn.

²⁵ Emwa ni rre avbe uniẹn na kegha re iyisẹn yan uri yan arriaisẹn enẹyan iyeha (64,300).

²⁶ Ẹwae Zẹbulọn kegha re avbe uniẹn Sẹrẹd, Elọn kevbe Jalil.

²⁷ Emwa ni rre avbe uniẹn na kegha re iyisẹn yan uri eva yan arriaisẹn iyeha (60,500).

²⁸ Ẹwae ọghe Josẹf ne ọ gha re erha avbe emọ ikpia eva e Manasẹ kevbe Ifreim.

²⁹ Ẹwae ọghe Manasẹ. Makai ne ovbi Manasẹ ọre ọ gha re erha Giliad. Avbe ẹwae na vbe tae ighẹ e Giliad ọrọre erha iran odede.

³⁰ Avbe uniẹn Lezẹ kevbe Helẹk.

³¹ Asriẹl, Siẹkẹm

³² Siẹmida kevbe Hẹfa:

³³ E Zẹlofehad ne ovbi e Hẹfa ma biẹ emọ ikpia, emọ ikhuo ọkpa ọ gha mwẹ, a kegha tie eni iran Mala, Noa, Hogla, Milka kevbe Taiza,

³⁴ emwa ni rre avbe uniẹn na kegha re iyisẹn yan uri eha yan arriaisẹn eva yan ekigbe siyeha (52,700).

³⁵ Ẹwae Ifreim kegha re avbe uniẹn Siutẹla, Bẹkia kevbe Tahan.

³⁶ Uniẹn Eran vbe tae ighẹ ivbi Siutẹla iran khin.

³⁷ Emwa ni rre avbe uniẹn na kegha re iyisẹn yan uri eva yan arriaisẹn eva yan ọgban (32,500). Iran na ọrọre ivbi uniẹn Josẹf.

³⁸ Ẹwae ọghe Bẹnjamin kegha re avbe uniẹn Bẹla, Asbẹl, Ahiram.

³⁹ Siesiufam kevbe Hufam.

⁴⁰ Avbe uniẹn Ad kevbe Naaman vbe tae ighẹ ivbi e Bẹla iran khin.

⁴¹ Emwa ni rre avbe uniẹn na kegha re uri eha yan arriaisẹnisẹnyan-iyeva (45,600).

⁴² Ẹwae ọghe Dan keghi re uniẹn ọghe Husim.

⁴³ Ni re arhin uri eva yan arriaisẹnenẹyan-iyeha (64,400).

⁴⁴ Ẹwae ọghe Asia keghi re avbe uniẹn ọghe Imna, Isvi kevbe Beraia.

⁴⁵ Avbe uniẹn Heba kevbe Malakie vbe tae ighẹ ivbi e Beraia iran khin.

⁴⁶ Asia kegha mwẹ ọmọ okhuo ọkpa ne a tie ẹre Sera.

⁴⁷ Emwa ni rre avbe uniẹn na kegha re uri eva yan arriaisẹn eha yan ekigbe siyeha (53,400).

⁴⁸ Ẹwae Naftali kegha re avbe uniẹn Jazil, Ouni.

⁴⁹ Jezẹ kevbe Silẹm.

⁵⁰ Emwa ni rre avbe uniẹn na kegha re uri eva yan arriaisẹn isẹn yan iyeva (45,400).

⁵¹ Ikpia ni rre Izrẹl hia kegha re ekigbe siyenẹ irrọ vbe uri enẹ yan arriaisẹn ọkpa yan uri eha (601,730).

⁵² E Nọyaẹnmwa keghi tama e Mosis wẹẹ,

⁵³ “Ghae otọe na ne avbe ẹwae na zẹ vbe ne iran ya kpolo.

^54-56 Yan uta ya ghae otọe ni, mu otọ ne ọkpọlọ ne ẹwae ne ọkpọlọ kevbe otọe ne kherhe ne ẹwae ne kherhe.”

⁵⁷ Emwa ni rre ẹwae Livai kegha re uniẹn Gẹsiọn, Kohan ke Merari,

⁵⁸ avbe ẹgbẹe Livai kevbe gha re ivbi uniẹn Libni, Hibrọn, Mali, Musi kevbe Kora. E Kohat kegha re erha Amram.

⁵⁹ Ne ọ rhie Jokebẹd ne ovbi e Livai ne okhuo ne a biẹe vbe Igipt rọnmwẹ. Ọ keghi biẹlẹ emọ ikpia eva, Errọn kevbe Mosis, kevbe ọmọ okhuo ọkpa, e Miriam.

⁶⁰ Errọn kegha mwẹ emọ ikpia enẹ: e Nadab, Abihu, Eliaza kevbe Itama.

⁶¹ E Nadab kevbe Abihu keghi wulo vbe iran ya mu erhẹn ẹyin awua gie Nọyaẹnmwa.

⁶² Avbe Livai ne ikpia hia ni ghi rre ke ọmọ ukpo ọkpa gha khian kegha re arriaisẹn ehayan-ugie (23,000). A ma ka iran ba ivbi Izrẹl nekpa rhunmwuda a ma gha emwi ẹwae rhọkpa ne iran vbe Izrẹl.

⁶³ E Mosis kevbe Eliaza keghi mwamwa eni avbe uniẹn na hia vbe ẹghẹ ne iran na ka ivbi izrẹl vbe otọe ne ọ rriẹe ọghe Moab, vbe a gha la e Jẹriko fian Jọdan rra.

⁶⁴ Orhiọn ọkpa irrọ ne Mosis kevbe Errọn sẹrae ne a ma ka vbe Ato Sainai.

⁶⁵ E Nọyaẹnmwa tae nẹ wẹ te iran hia ra wulo ye otọ ẹgbo erriọ ọ gele gha ye, sokpan ama wẹ Kelẹb ne ovbi Jefunẹ kevbe Jọsua ne ovbi Nọn.