Nọmbas 25 - Edo Bible (E Baibol Ẹdo) Version 1996

Ivbi Izrẹl Vbe Peọ

¹ Ivbi Izrẹl ghi bu agọ ye Ehanhan Akesia, ikpia ni rrọ kegha gu avbe ikhuo e Moab ni rre evba ru emwi.

² Avbe ikhuo na keghi wẹ ne avbe ikpia na do tuẹ iran vbe emwiukpo izọese, ehe ne iran na gho ẹbọ Moab. Avbe ivbi Izrẹl keghi rri evbare nii, iran na vbe ga nene ẹbọ,

³ ighẹ Bal ọghe Peọ. Ohu iran keghi mu e Nọyaẹnmwa.

⁴ Ọ na tama e Mosis wẹẹ, “Viọ avbe ekaolotu ivbi Izrẹl, ne u sirra emwa hia zẹlẹ iran uhunmwu kua, vbe ogiavan ogioghogho zẹ vbene I khare ẹghẹ nii ohu avbe emwa nii i ghi ra mu mwẹ.”

⁵ E Mosis keghi tama emwa ni rre asẹ wẹẹ, “Dọmwadẹ ọghe ọe vbe uwu uwa gbele emwa ni ya gha gho Bal ọghe Peọ vbe ẹwae uwa.”

⁶ Ehe ne iran na mudia vbe onurho Owa Ukpọn Ile gha khiẹ nii, ọkpa vbe uwu ivbi Izrẹl keghi sirra e Mosis kevbe avbe emwa nii hia rhie okhuo Midian ọkpa la uwu owa ukpọn rẹn.

⁷ Ugbẹn vbe Finihaz ne ovbi Eliaza, ne ọ vbe re eyẹ Errọn ghi miẹn ọẹn, ọ keghi kpaegbe, ọ na lahin uwu ẹbu nii rre. Ọ na rhie asoro,

⁸ ọ na lele okpia nii vbe okhuo nii la uwu owa ukpọn, ọ na ye asoro nii ha iran eva fua. Erriọ ọre a ghi ya dobọ egboghogbogho ne ọ te gha fuẹn ivbi Izrẹl rrie yi.

⁹ Sokpan ọ gbele sẹ arhin arriaisẹn enẹ yan ugie (24,000) nẹ.

¹⁰ E Nọyaẹnmwa keghi tama e Mosis wẹẹ,

¹¹ “E Finihaz da mwẹ obọ ohu ne I te mu ghe ivbi Izrẹl yi nẹ. Ọ ma zẹdẹ ho ne ọ họn wẹ a vbe gho emwi ọvbehe gberra ime, ọnii ọre ọ zẹe ne I na ma ya ohu mwẹ fuẹn iran an.

¹² Rhunmwuda ọnii, tama rẹn ighẹ I ra gu ẹe ta ile ne ọ gha rre atẹ rhinrin ẹdẹ.

¹³ A rhie irẹn kevbe uniẹn ivbi ẹre ye ukpo ohẹn rhinrin ẹdẹdẹmwẹdẹ, rhunmwuda ọ ma ho ne a miẹn emwi ne ọ vbe gun mwẹ suan, ọ keghi gia ya orukhọ emwa nii bọ iran.”

¹⁴ Eni ovbi Izrẹl ne a gbe ba okhuo e Midian nii keghi re Zimri ne ovbi Salu, ọmwa ne ọ wa vbe re ọdiọn ẹgbẹe ọkpa vbe ẹwae Simiọn.

¹⁵ A keghi tie eni okhuo nii Kozbi. Erha ẹe i ghẹ Zọ keghi re enogie iran eso vbe ẹwae Midian.

¹⁶ E Nọyaẹnmwa keghi tama e Mosis wẹẹ,

¹⁷ “Mu okuo gie emwa Midian ne u fuẹn iran uan;

¹⁸ rhunmwuda emwi dan ne iran ru ne iran na rẹrẹ uẹ vbe Peọ kevbe rhunmwuda e Kozbi ne a gbe vbe ẹghẹ ne egboghogbogho na gha rre Peọ.”