Nọmbas 24 - Edo Bible (E Baibol Ẹdo) Version 1996

¹ Ẹghẹ na nian, e Balam rẹn nẹ wẹ te Nọyaẹnmwa wẹ ne iran gha na erhunmwu ne ivbi Izrẹl, rhunmwuda ọnii, ọ ma ghi vbe gualọ ama vbene ọ ka ru ẹe dee ẹdẹ. Ọ keghi mu aro da odẹ ato.

² Ọ na bẹghe ivbi Izrẹl vbe ehe ne dọmwadẹ ẹwae na bu agọ. Orhiọn Osanobua ke hin yan rẹn.

³ Ọ keghi guan ẹmwẹ akhasẹ na wẹẹ: “Uhunmwu ne Balam ne ovbi Beọ gie, ẹmwẹ ọmwa nii ne ọ sẹtin bẹghe vẹn ẹn,

⁴ Ne ọ vbe sẹtin họn vbene Osanobua kha hẹ. I rhan aro a gbadaa, I ke ya bẹghe vbe umian, emwi ne Osanobua Ne Oghodua mu mẹ ghe.

⁵ Avbe owa ukpọn ivbi Izrẹl wa ye mosee

⁶ ọ ye vbe ọgbagba ne ọ taẹn ọghe udin, ra ogba obobo nọ rre ọkpẹn ẹzẹ zẹ vbe erhan alọe ne Nọyaẹnmwa kọe. Ra avbe sida ni rre ọkpẹn ẹzẹ.

⁷ Amẹ gha wa rhọ ne iran ẹsẹse iran kọ emwi okọ iran ye otọe ne ọ rọkhọe ọba iran gha kpọlọ sẹ Agag, arriọba ẹre gha kpolo, ọ gha tan la erhan la irri

⁸ Osanobua viọ iran ke Igipt ladian, ọ gbinna ne iran zẹ vbe ede, iran minọ avbe eghian iran re, iran dunmwu ugboloko iran an, iran vbe rẹnkhẹn iran.

⁹ Ẹvbo na yevbe oduma ne ọ mwẹ ẹtin ọ gha vbiẹ, a i miẹn ne ohan gie ẹe huẹn ọnrẹn. Afiangbe nọ ne ọmwa ne ọ na erhunmwu ne Izrẹl, ne ọ fi Izrẹl unu, a gha fi ẹre unu.”

¹⁰ E Balak keghi ya ohu kun ekpa, ọ tama Balam wẹẹ, “Te I tie ruẹ ne u do fi avbe eghian mwẹ unu, sokpan erhunmwu ọre u he na ne iran igba eha na.

¹¹ Banbanna nian, ladian ne u gha rrie! Te I te yaan wẹ I gha ya emwi nuẹn ne I ya san ruẹn ẹse, sokpan e Nọyaẹnmwa gban emwi ne a ya san ẹse hin ruẹn obọ rre nẹ.”

¹² E Balaam keghi wanniẹn wẹẹ, “I giee emwa ne u giee gunmwe ne a tama ruẹn wẹẹ,

¹³ ọ gha khọn ruẹn ne u viọ esiliva kevbe igoru ni rre ẹguae ruẹ hia mẹ, mẹ I ra rhie obọ gberra iyi ọghe Nọyaẹnmwa ne I ya gha ru ọghe obọ mwẹ. Emwi ne Nọyaẹnmwa tama mwẹ ọkpa ọre I ra gha ta.”

Ẹmwẹ Akhasẹ Ne Okiekie Ọghe Balam

¹⁴ E Balam keghi tama e Balak wẹẹ, “Banbanna nian, I ra bu avbe emwa mwẹ, sokpan vbe I te kpao, I gha tama ruẹn emwi ne ivbi Izrẹl gha ru avbe emwa ruẹn re ẹdẹ ne ọ dee,”

¹⁵ Ọre ọ na guan ẹmwẹ akhasẹ na: “Uhunmwu ne Balam ne ovbi Pẹọ gie, ẹmwẹ ọmwa nii ne ọ bẹghe vẹn ẹn,

¹⁶ ne ọ sẹtin họn vbene Osanobua kha hẹ, ne ọ vbe miẹn irẹnmwi ne ọ ke ọghe ne ọ yo sẹẹ rre. I rhan aro a gba daa, I keghi miẹn ọẹn vbe umian emwi ne Osanobua Ne Oghodua mu ma mwẹ,

¹⁷ I keghi ghe ẹdẹ nakhuẹ, I keghi ya dẹghe okpẹvbo ọghe Izrẹl, ọba ne ọ yevbe orhọnmwẹ ne yọn ọn, gha kpaegbe vbe ẹvbo ni, ọ gha ke Izrẹl ladian zẹ vbe osun nigiogio ọ gha fi avbe Ọkaolotu Moab emwi, ọ ghi gbele iran ni hio kevbe ni khọọ ku otọ.

¹⁸ Ọ gha khọn avbe eghian ni rre Idọm mu otọ, ọ ghi ya otọ iran khian ọghe ọe, vbene Izrẹl gha ye owẹ rri iran ginna otọ.

¹⁹ Okpẹvbo Izrẹl gha ye owẹ rri iran ginna otọ ọ ghi kpolo iran ni ghi te ke ẹe vbọ kua.”

²⁰ Ẹre Balam na vbe miẹn emwa Amalẹk vbe umian, ọ na kha wẹẹ: “Amalẹk ọ te re ẹvbo ne ọ wegbe sẹ ehia, sokpan vbe okiekie, ọ gha fuẹn uan ẹdẹdẹmwẹdẹ.”

²¹ Ọ vbe miẹn avbe emwa Ken vbe umian, ọ keghi guan vbe akhasẹ wẹẹ: “Ehe ne uwa ye, ẹkun wa sẹ uwa otọ, ne ẹbe i ye zẹ vbe oko ahianmwẹ vbe uhunmwu okuta.

²² Sokpan, a gha dunmwu uwa ne emwa Ken vbe ẹghẹ ne Asiria gha na viọ uwa oghunmwu.”

²³ E Balam keghi vbe ta ẹmwẹ akhasẹ na ọ wẹẹ: “De emwa ni si egbe koko vbe odẹ okuọ na yi?

²⁴ Iyokuo gha ke Saiprọs gua okọ rre iran gha khọn Asiria kevbe Babilọn mu otọ, sokpan iran tobọ iran gha vbe fuẹn uan ẹdẹdẹmwẹdẹ.”

²⁵ Ẹre Balam na kpaegbe, ọ na gha rrie owa, ẹre Balak na lele odẹ ọre gha rrie.