Nọmbas 22 - Edo Bible (E Baibol Ẹdo) Version 1996

Ọba Ọghe Moab Gie Ne A Tie Balam

¹ Ivbi Izrẹl ghi si okhian, iran na ya yakọ vbe otọ ne ọhẹnhẹn ọghe Moab, vbe odẹ ahọ ọghe Jọdan ne ọ mu aro da Jẹriko.

² Ugbẹn vbe Balak ne ọba e Moab, ne ovbi Zipọ ghi miẹn emwi ne ivbi Izrẹl ru ivbi Amọri re,

³ afianma iran kegha fian ẹẹn ke ẹe kevbe emwa rẹn hia rhunmwuda iran bun gbe.

⁴ Ẹre ivbi e Moab na khama avbe ọkaolotu emwa Midian wẹẹ, “Iran ni kun khian na gha rri emwi ni lẹga ima hia mu otọ vbene ẹkhuia ẹmila rri Irunmwu vbe oha ne ẹmila na rria.” Ẹre Balak ne ọba e Moab

⁵ na gie emwa ni iran ya tie Balam ne ovbi Beọ, ne ọ rre Petọ vbe ọkpẹn Ẹzẹ Yufretes vbe otọ Amọn rre. Iran keghi tama rẹn wẹẹ: “I ho ni guẹ rẹn wẹẹ agbọn ẹvbo hoho wa ke Igipt gha die emwa na, iran vẹ la ehe hia iran ra gbe ima miẹn ima otọ mwa.

⁶ Iran bun sẹ mwa, rhunmwuda onii, gha dee do fi iran unu mẹ, ughaghe, ma gha sẹtin khọnmiotọ vbe uhunmwu iran vberriọ, ne a khulo iran hin otọ na rre. I rẹnrẹn wẹ, u gha na erhunmwu ne emwa, afiangbe nọ ne iran, u gha fi emwa unu te ọ sẹ iran egbe.”

⁷ Ẹre avbe ọkaolotu Moab ke Midian na viọ igho ne iran gha ya ha osa ne ẹẹn vbe ọ gha fi iran unu mwẹ obọ, iran keghi bu e Balam gha khian, iran na ya tama rẹn vbene Balak gie.

⁸ E Balam keghi tama iran wẹẹ, “Wa gbe asọn na vbe emwa, I gha tama uwa akhuẹ vbe ne Nọyaẹnmwa a rhirhi tama mwẹ hẹ.” Ẹre avbe ọkaolotu e Moab na tota ke Balam.

⁹ Osanobua keghi bu e Balam gha dee, ọ nọ rẹn wẹẹ, “De emwa ni rre ehe ne u ye na yi?”

¹⁰ Rẹn keghi wanniẹn wẹẹ, “E Balak ne ọba e Moab ọre ọ gie iran bu mwẹ gha dee do tama mwẹ

¹¹ wẹ emwa ni ke Igipt gha dee wa vẹ gba otọe ni hia. Ọ wẹ ne I do fi iran unu ne irẹn ne ọ miẹn ehe na gu iran gbinna, kevbe ne ọ khulo iran ladian.”

¹² Osanobua keghi tama Balam wẹẹ, “Ghẹ lele emwa na gha khian, ghẹ vbe fi ivbi Izrẹl unu rhunmwuda afiangbe mwẹ rre iran egbe.”

¹³ Ẹdẹ ghi gbe, e Balam keghi bu emwa ne Balak gie ẹre uhunmwu, ọ tama iran wẹẹ, “Wa gha rrie owa, e Nọyaẹnmwa wẹ ne I ghẹ lele uwa gha khian.”

¹⁴ Ẹre iran na dọlegbe bu e Balak gha dee, iran na do tama rẹn wẹ, ọ wẹ rẹn i lele iran dee.

¹⁵ Ẹre Balak na gie avbe ọkaolotu kpataki ni bun sẹ enii gha khian.

¹⁶ Iran na bu e Balam gha khian ya tama rẹn uhunmwu ne Balak gie na wẹẹ, “Lahọ, ghẹ gie emwi rhọkpa da a obọ yi ne u bu mwẹ gha dee.”

¹⁷ I gha kaka bọ san ruẹn ẹse, I ghi vbe ru vbene u rhirhi kha. Lahọ gha dee do fi iran unu mẹ.

¹⁸ Sokpan e Balam keghi wanniẹn wẹẹ, “Ọ gha khọn e Balak ne ọ viọ igoru kevbe esiliva hia ni rre ẹguae ẹre mẹ, mẹ i ra sẹtin rhie obọ gberra ẹmwẹ ne Osanobua mwẹ tama mwẹ uhin ya se egbe emwi ne ọ kanmwa sẹ.

¹⁹ Sokpan, wa lahọ ne uwa vbe gbe asọn na vbe emwana zẹ vbene nekpa ru, ne I miẹn ehe na rẹn deghẹ Nọyaẹnmwa mwẹ ẹmwẹ ọvbehe ne ọ gha tama mwẹ.”

²⁰ Vbe asọn nii, Osanobua keghi bu e Balam gha dee, ọ tama rẹn wẹẹ, “Deghẹ te iran na do tama ruẹn wẹ ne u lele iran gha khian, mu egbe ne u lele iran gha khian, sokpan emwi ne I tama ruẹn ne u ru ọkpa ọ re u gha ru.”

²¹ Ẹre ẹde ghi na gbe, e Balam keghi mu ekẹtẹkẹtẹ ọre egbe ọ na lele avbe ọkaolotu e Moab gha khian.

E Balam Kevbe Ekẹtẹkẹtẹ Ọre

²² Ne Balam na gha khian na keghi sọnnọ e Nọyaẹnmwa, ugbẹn vbe Balam ghi hin ekẹtẹkẹtẹ ọre khian nii ke ẹe kevbe eguọmwadia ẹre eva, odibo e Nọyaẹnmwa keghi mudia ye odẹ ne ọ gbe ẹre odẹ.

²³ Ugbẹn vbe ekẹtẹkẹtẹ nii ghi dẹghe odibosa nii vbe ọ mudia ye odẹ ke ẹe kevbe umozo vbe obọ, ọ keghi lahin urodẹ rre, ọ na gban egbe la oha, e Balam keghi fi ekẹtẹkẹtẹ nii emwi, ọ na dọlegbe dia ẹre ye odẹ.

²⁴ Ẹre odibosa nii na mudia ye ehe ne odẹ na ya wẹnrẹn vbe ẹkpo ugbo emwiokọ ọmọ erhan ayọn ne ọ baa eva vbene egbekẹn okuta na rre obọ eveva vbe odẹ.

²⁵ Ugbẹn vbe ekẹtẹkẹtẹ ghi bẹghe odibosa, ọ keghi wa piẹnpiẹn egbe la ọkpẹn ekẹn, ọ na wiẹn Balam owẹ vbọ. E Balam keghi fi ekẹtẹkẹtẹ nii emwi.

²⁶ Ẹre odibosa nii na dọlegbe sikẹ odaro, ọ na ya mudia ye ehe ne wẹnrẹn, ehe ne a i na miẹn ehe biegbe ghe vbe obọ eveva.

²⁷ Ugbẹn vbe ekẹtẹkẹtẹ ghi bẹghe odibosa ẹghẹ na, ọ na mu ẹko rhu otọ. Ohu keghi kakabọ mu e Balam, ọ na gha ya ukpokpo ẹre gbe ekẹtẹkẹtẹ nii.

²⁸ E Nọyaẹnmwa keghi gie ekẹtẹkẹtẹ nii sẹtin guan, ọ na khama e Balam wẹẹ, “Vbia ruẹ ẹre? Vbọzẹ ne u na gha gbe mwẹ igba eha na?”

²⁹ E Balam keghi tama rẹn wẹẹ, “Rhunmwuda ne u na ya mwẹ gbe ogie nọ, akpawẹ te umozo gue mwẹ I gha gbe ua.”

³⁰ Ekẹtẹkẹtẹ nii keghi wanniẹn wẹẹ, “Ẹ i re mẹ ọ re ekẹtẹkẹtẹ ọkpa nii ne u hin ke ẹghẹ ne a ya biọ gha dee? I ka yin uyinmwẹ vberriọ ghe ruẹ ẹdẹ ra?” Rẹn keghi wanniẹn wẹẹ, “Ẹn o.”

³¹ Ẹre Nọyaẹnmwa na gie Balam bẹghe nene odibosa vbe ehe ne ọ na mudia, ke ẹe kevbe umozo. E Balam keghi mu aro rhu otọ.

³² Odibosa nii keghi nọ rẹn wẹẹ, “Vbọzẹ ne u na gbe ekẹtẹkẹtẹ ruẹ igba eha vberriọ yi? Te I do gba yuẹ odẹ rhunmwuda ọ ma kei ne u khian okhian na.

³³ Sokpan, ekẹtẹkẹtẹ ruẹ bẹghe mwẹ, ọ na biegbe igba eha. Akpawẹ ẹ i re vberriọ, I gha gbe ua, I ghẹ ghi sẹ ekẹtẹkẹtẹ rae.”

³⁴ E Balam wanniẹn wẹẹ, “I rukhọ nẹ, I ma na rẹn ighẹ te u gba ye odẹ khẹ mwẹ, sokpan banbanna nian, u gha roro ẹe ighẹ ọ ma kei ne I gha khian, I gha dọlegbe gha rrie owa.”

³⁵ Sokpan, odibosa nii tama rẹn wẹẹ, “Lele avbe emwa na gha khian, sokpan emwi ne I tama ruẹn ne u ta ọkpa ọre u gha ta.” Ẹre Balam na lele iran gha khian.

E Balak Gbe Ọbokhian Ne Balam

³⁶ Ugbẹn vbe Balak ghi họn ighẹ Balam dee, ọ keghi khian ya vba ẹre vbe Ar ne ọ rre Ẹzẹ Anọn vbe ehe ne otọe Moab sẹe.

³⁷ E Balak keghi khama rẹn wẹẹ, “Vbọzẹ ne u ma na rre yi vbe I gie ne a tie ruẹ rre vbe okaro? Te u ro ra ighẹ mẹ i ra sẹtin ru uwẹ ẹse sọkẹn?”

³⁸ E Balam keghi wanniẹn wẹẹ, “I rre, ra I ma rre? Sokpan de ẹtin ne I mwẹ yi? Emwi ne Osanobua tama mwẹ ọkpa ọre I gha sẹtin ta.”

³⁹ Ọ re Balam na lele Balak gha rrie ẹvbo ne a tie ẹre Huzot,

⁴⁰ e Balak na gbele ẹmila kevbe avbe ohuan, ọ na fian vbe emiowo ẹre gie Balam kevbe avbe ọkaolotu ni gu ẹe rre vba.

Ẹmwẹ Akhasẹ Okaro Ọghe Balam

⁴¹ Owiẹ ne ọ lelẹe, e Balak keghi rhie Balam gha rrie uhunmwu oke Bamot Bal. E Balam keghi sẹtin ke evba bẹghe eso vbe ivbi Izrẹl.