Nọmbas 18 - Edo Bible (E Baibol Ẹdo) Version 1996

Iwinna Avbe Ohẹn Kevbe Livai

¹ E Nọyaẹnmwa keghi tama Errọn wẹẹ, “Abaku ru gha rre iwinna ugamwẹ vbe uwu Owa Ukpọn Ile, urhu uwẹ kevbe avbe ivbuẹ kevbe avbe Livai ọ re ọ ye, sokpan wẹ kevbe avbe ivbuẹ ọ re ọ ra rri oya ye abakuru ne ọ ladian vbe uwu iwinna ohẹn.

² Sokpan, wẹ vbe ivbuẹ gha winna vbe odaro Owa Ukpọn Ile, u ghi viọ avbe etuẹn, ẹwae Livai ne iran do deba ruẹ gha winna kevbe ne iran yuẹ obọ.

³ Iran ghi winna iwinna ne ọ kan ruẹn fo kevbe emwi ne ọ bi ye iran egbe vbe ẹmwẹ Owa Ukpọn, sokpan, a ghẹ gie iran ya obọ kan avbe emwi iruemwi ni rre Ehe Ne ọ huanrẹn ra aka. Iran gha ru ẹe, a gha gbele uwẹ kevbe iran an.

⁴ Te iran khian yaba ruẹ gha winna, iran ghi ru enọ sẹ iran egbe vbe uwu iwinna ni rre Owa Ukpọn, sokpan, a ghẹ gie ọmwa ne ọ ma he sẹ deba ruẹ winna.

⁵ Wẹ kevbe avbe ivbuẹ ọkpa ọre ọ gha winna iwinna ne ọ kan ruẹn vbe Ehe Ne ọ huanrẹn kevbe aka, ne ohu mwẹ ghẹ ghi werriegbe gua kpao ghe ivbi Izrẹl.

⁶ Mẹ ọre ọmwa ne ọ hannọ avbe Livai ne etuẹn zẹ vbe uwu ẹbu ivbi Izrẹl ne iran gha re emwi izẹ ọhẹ ne uẹn. Te a ya iran fi ohan mẹ ne iran sẹtin gha winna iwinna iran vbe uwu Owa Ukpọn Ile.

⁷ Sokpan wẹ kevbe avbe ivbuẹ ọkpa ọre ọ gha winna iwinna ohẹn ne ọ dekan aka kevbe uwu ehe Ne ọ Huan Sẹẹ Ehia. Iwinna ne ọ bi yuẹ egbe ọre ena khin, rhunmwuda mẹ rhie ọhẹ ọghe ukpo ohẹn nuẹn nẹ. Ọmwa ne ọ ma kei, ne ọ sikẹ avbe emwi ne ọ huanrẹn, a ghi gbẹe rua.”

Oghae Avbe Ohẹn

⁸ E Nọyaẹnmwa keghi tama Errọn wẹẹ, “Yerre wẹ avbe emwi hia ne a ya zẹ ọhẹ kpataki gunmwẹ, vbe ne a ma na giẹn ọnrẹn uan, te I khian viọ ehia nuẹn. Te I khian viọ iran ne uwẹ kevbe avbe ivbuẹ, ne ọ gha re ne a ghae ne uwa rhinrin ẹdẹ.

⁹ Avbe izẹọhẹ nọhuansẹ ehia, ne a ma giẹn uan vbe aka, ne ọ re ọ wuẹ vbọ ọre ena khin: izẹọhẹ ọka, izọese orukhọ, izẹ ọhẹ ahaewerriegbe. Emwi hia ne a viọ gunmwẹ ze vbe emwi ihaoko nọhuanrẹn ọghe uwẹ kevbe ivbi uẹ nọ.

¹⁰ Ehe nọhuanrẹn ọre u gha na gha rri avbe emwi na, ikpia ọkpa ọre ọ gha rri ọe. Kae ye emwi ne a ya ru emwi.

¹¹ “Yevbe deba ọnii, izẹ ọhẹ kpataki ọvbehe hia ne ivbi Izrẹl viọ gun mwẹ, ọwuẹ khian gha nọ. Te ime viọ ehia ne uwẹ, kevbe ivbuẹ ne ikpia kevbe ne ikhuo rhinrin ẹdẹ. Ọmwa ne awua i ghi rrọ re egbe vbe uwu emwa ruẹn hia sẹtin rri ọe.

¹² “I ra vbe viọ emwi okọ nọ maa vbe uwu ne ivbi Izrẹl ka rhọ ne iran viọ gun mwẹ ukpukpo ne uẹn, ofigbọn oliv, ayọn kevbe ọka.

¹³ Ọwuẹ ehia khin. Ọmwa ne awua i ghi gue vbe uwu avbe emwa ruẹn sẹtin rriọe.

¹⁴ Emwi hia ne a ghi fanmwegbua ya fi ohan mẹ nẹ, ọwuẹ nọ.

¹⁵ “Emọ ọdiọn hia ra aranmwẹ ne ivbi Izrẹl viọ gun mwẹ, ọwuẹ nọ. Sokpan, u ghi gha miẹn iran igho ne a ya dẹ ọmọ ọdiọn werriegbe, erriọ u ghi vbe gha miẹn iran igho ne a ya dẹlẹ avbe emọ ọdiọn werriegbe.

¹⁶ “Emọ gha rre uki ọkpa, ọre a gha na gha dẹlẹ iran werriegbe, igho ne a mwa yọ ne a ya dọe keghi re ukhiọnmwẹ esiliva isẹn, zẹ vbe ọmwa ne agbọn hia ye obọ yi.

¹⁷ Sokpan emọ ọdiọn ọghe ẹmila, ohuan kevbe ẹwe, a i ra dẹlẹ iran werriegbe, ọghomwẹ iran wa khin fẹẹrẹ, te a gha gbele iran ya zọ ese. A ghi hihiẹ esagiẹn iran ya aka, a ghi giẹn ẹvbi iran zẹ vbe izẹ ọhẹ evbare, emwi ne ọ winhin yẹ mwẹ.

¹⁸ Emiowo ni rrọ, ọwuẹ nọ, zẹ vbe ewẹn kevbe owẹ obọ erha ọmwa ọghe izẹọhẹ kpataki.

¹⁹ “Emwi izẹọhẹ kpataki hia ne ivbi Izrẹl viọ gunmwẹ, I ya ẹe fi ohan ne uwẹ kevbe avbe ivbuẹ ne ikpia kevbe ne ikhuo ẹdẹdẹmwẹdẹ. Ile ne ai gbe obọ rra ne I gu uwẹ kevbe ivbuẹ ta ọ re ọna khin.”

²⁰ E Nọyaẹnmwa keghi tama Errọn wẹẹ, “Wẹ ghẹ miẹn ọmwa rhọkpa emwi ne ọ gia re vbe ukhu, a i ra vbe ghae ne uẹn vbe otọ Izrẹl. Mẹ ne Nọyaẹnmwa ọrọre emwi ne ọ ke ne uẹn.”

Oghae Avbe Livai

²¹ E Nọyaẹnmwa keghi kha wẹẹ, “A ghae ye ihe igbe ne ivbi Izrẹl hẹ gunmwẹ, I ya ne avbe Livai. Ọ na ọrọre osa ne a ha iran re ye iwinna ne iran winna ya gbearoghe Owa Ukpọn Ile.

²² Ivbi Izrẹl i ghi ra dọlegbe gha sikẹ Owa Ukpọn nii ọvbehe ne iran ghẹ gia do gha rri iran oya uwu.

²³ Ke ẹghẹ na kpao, avbe Livai ọ re ọ ghi gha gbearoghe Owa Ukpọn, obọ iran ọre emwi hia ni dekan rẹn ghi gha ye. Iyi ọghe etẹbitẹ ne ọ vbe sẹ egbe ivbi uwa ọre ọna khin. Avbe Livai i khian gha mwẹ emwi are vbe ukhu vbe otọe Izrẹl.

²⁴ Rhunmwuda, mẹ ya a ghae yi ihe igbe ne ivbi Izrẹl ya ha oko kpataki gunmwẹ ne iran nẹ. Ọnii ọ si ẹe ne I na tama iran wẹ iran i ra gha mwẹ emwi arevbukhu vbe otọe Izrẹl.”

Aghae Yi Ihe Igbe Ọghe Avbe Livai

²⁵ E Nọyaẹnmwa keghi tama e Mosis,

²⁶ ne ọ tama avbe Livai wẹẹ, “Aghae yi ihe igbe ne ivbi Izrẹl viọ rre ne Nọyaẹnmwa ya ne uwa gha ghi sẹ uwa obọ nẹ, wa ghi ghae ẹre ye ihe igbe rhie obọkpa vbọ gie Nọyaẹnmwa zẹ vbe ihaoko kpataki.

²⁷ Izẹọhẹ kpataki na, a ghi kae yọ wẹ umwọmwẹ rẹn vbe izẹọhẹ ọka kevbe ayọn ne ọgbugbo ru khin.

²⁸ Odẹ vberriọ ọ re uwẹ gha na ru izẹọhẹ kpataki ọghe Nọyaẹnmwa vbe uwu aghae yi ihe igbe hia ni ne uwa miẹn vbe obọ ivbi Izrẹl. Wa ghi vbe rhie izẹọhẹ kpataki ne ọ re ọghe Nọyaẹnmwa ne Errọn ne ohẹn vbe uwu emwi ne ọ sẹ uwa obọ hia.

²⁹ Uwu emwi ne ọ maa sẹ ne uwa miẹn ọ re uwa gha na gha rhie ẹre ladian.

³⁰ “Wa ghẹ ghi rhie ne ọ maa sẹẹ vbọ ladian nẹ, wa ghi viọ nekpa, zẹ vbe ne ọgbugbo vbe viọ ni dekẹe iyeke vbe irẹn a ghi viọ emwi izẹọhẹ ọghe ọe rre nẹ.

³¹ Wẹ kevbe ẹgbẹe ruẹ sẹtin rri ọe vbe ehe ne ọ khọn ruẹn rhunmwuda Osanobua na hae nuẹn ye oga ruẹ vbe uwu Owa Ukpọn nọ.

³² U i ra vbe ya ẹe rri abe vbe u gha rri ọe a deghẹ wẹ viọ ne ọ maa sẹẹ vbọ gie Nọyaẹnmwa nẹ. U ma viọ ehe ne ọ maa sẹẹ vbe emwi izẹọhẹ ne ivbi Izrẹl viọ rre ya zẹ ọhẹ nẹ, ghẹ re vbọ ne u ghẹ ya mu awua yọ, ne a ghẹ ya gbuẹ ua.”