Nọmbas 16 - Edo Bible (E Baibol Ẹdo) Version 1996

Isọtẹ Kora Datan Kevbe Abiram

^1-2 E Kora ne ovbi Iza ne ẹwae Kohat ne e Livai, ohan ma zẹdẹ mu ẹẹn, ọ sọtẹ e Mosis, iran eha ni re ivbi ẹwae Riubẹn, Datan kevbe Abiram. ivbi e Eliab kevbe On ne ovbie Pẹlẹt keghi deba ẹre, arhin ekigbe siyeha yan uri (250) vbe uwu ọkaolotu ọghe ivbi Izrẹl keghi vbe yaba iran.

³ Iran keghi do si egbe koko ye odaro e Mosis kevbe Errọn, iran tama iran wẹẹ, “Ọwua tua gbe, e Nọyaẹnmwa ọre ọ yan emwa nii hia, e Nọyaẹnmwa vbe rrọ yaba ima hia. Vbọzẹ ne uwẹ ne Mosis na ghi tọn egbe ruẹ mu yan emwa e Nọyaẹnmwa na hia?”

⁴ Ugbẹn vbe Mosis họn ẹmwẹ na, ọ keghi de gbe otọ, ọ na na erhunmwu.

⁵ Iyeke ọnii, ọ keghi tama Kora kevbe ivbi otu ẹre hia wẹẹ, “Vbe owiẹ ẹdẹ na khuẹ, e Nọyaẹnmwa gha rhie ne ọ re ọghe ọe ma ima, ọ gha gie ọmwa nọ re ọghe ọe, ọmwa ne irẹn zẹe, sikẹ ọre vbe aka.

^6-7 Owiẹ nakhuẹ, wẹ vbe irogho ruẹ, wa viọ ọkpan ne a ya wan erhẹn, wa viọ ogiọnmwẹ erhẹn kevbe eturari yọ, ne uwa hẹ gha rrie aka. Ẹghẹ nii ma gha miẹn ọmwa ne Nọyaẹnmwa zẹe vbe uwu ima. Ọ ghe uwa ne Livai ra tua gbe.”

⁸ E Mosis keghi ye gha gu e Kora guan khian wẹẹ, “Wa danmwehọ, wa ne Livai!

⁹ Emwi kherhe wa tie ẹre re ra ne Osanobua Izrẹl na hannọ uwa ladian vbe uwu ẹbu emwa nekpa, ne uwa sẹtin gha sikẹ irẹn, ne uwa gha winna iwinna uwa vbe Owa Ukpọn Ile, ne uwa gha ga emwa nii hia?

¹⁰ Ọ gie uwẹ kevbe ivbi e Livai nekpa hia gha mwẹ uyi na, banbanna nian, wa ho ne u wa vbe mu ukpo ohẹn ba ẹre!

¹¹ Wa gha gui ẹzọ uwu unu ghe Errọn, vbe ẹmwata, e Nọyaẹnmwa ọre uwẹ vbe irogho ruẹ sọtẹ ọre.”

¹² Ẹre Mosis na gie ne a tie Datan kevbe Abiram, sokpan iran keghi kha wẹẹ, “Ma i dee!

¹³ Ne u na viọ ima ke otọ esiesi vbe Igipt ladian ne u do gbele ima an vbe uwu ẹgbo na ma he ye sẹ ra? Te u ghi ra vbe gha ya ima ru ẹe rua ba onii ra?

¹⁴ Vbe ẹmwata, u ma viọ ima gha die otọ nọ maa ra ne u mu oha kevbe ugbo emwi okọ ne ima zẹ vbe ọghomwa, eban nia, u vbe ho ne u mu ima rẹrẹ. Ma i dee!”

¹⁵ Ohu keghi mu e Mosis, ọ na tama e Nọyaẹnmwa wẹẹ, “Ghẹ rhan obọ miẹn izẹ ọhẹ rhọkpa ne iran na viọ rre. Ne I ru ẹre emwi rhọkpa irrọ vbe uwu iran, I ma vbe mu vbe uwu avbe ekẹtẹkẹtẹ iran.”

¹⁶ E Mosis keghi tama Kora wẹẹ, “Ẹdẹ nakhuẹ, ke uwẹ kevbe avbe irogho ekigbe siyeha yan uri (250) ruẹ ghi gha die Owa Ukpọn Ile, Errọn gha vbe rre.

¹⁷ Dọmwadẹ ọghe ọe vbe uwu uwa ghi mu ọkpan erhẹn, ọ ghi zẹ eturari yọ, ọ ghi mu ẹẹn gha die aka do ya ẹe zẹ ọhẹ.”

¹⁸ Ẹre dọmwadẹ ọghe ọe na mu ọkpan erhẹn ọnrẹn, ọ keghi wan erhẹn yọ ba eturari, iran keghi deba e Mosis kevbe Errọn mudia ye onurho Owa Ukpọn Ile.

¹⁹ Ẹre Kora na si emwa ni hia koko, iran keghi mudia viọ aro da e Mosis kevbe Errọn vbe onurho Owa Ukpọn. Vbe udomwurri, uwanmwẹ ne ẹ i gia ghe nii, ne a ya rẹn ighẹ Nọyaẹnmwa rre evba, keghi rhie egbe maa emwa nii hia.

²⁰ E Nọyaẹnmwa keghi tama e Mosis kevbe Errọn wẹẹ,

²¹ “Gban egbe ghe iyeke hin ehe ne iran na ye rre, ne I wa fuẹn iran uan banbanna.”

²² Sokpan e Mosis kevbe Errọn keghi vbẹrre mu aro rhuotọ, iran keghi kha wẹẹ, “Osanobua, wẹ ọrọre ehe ne arrọ hia ke rre. ohu emwa hia gha wa gha mu uẹn ra rhunmwuda ighẹ orhunmwu ọkpa ru orukhọ?”

²³ E Nọyaẹnmwa keghi tama e Mosis wẹẹ,

²⁴ “Tama emwa ni ne iran lahin ehe ne owa ukpọn ọghe Kora, Datan Kevbe Abiram ye rre.”

²⁵ Avbe ọkaolotu ivbi Izrẹl keghi lele Mosis gha rrie ọghe Datan kevbe Abiram.

²⁶ Ọ keghi tama emwa ni wẹẹ, “Wa kpa hin ehe ne owa ukpọn avbe emwa dan na ye rre, wa ghẹ vbe ya obọ kan emwi iran rhọkpa, ne a ghẹ ya fuẹn uwa lele iran rhunmwuda orukhọ iran hia.”

²⁷ Rhunmwuda ọnii, iran keghi kpao hin ehe ne owa ukpọn e Kora, Datan kevbe Abiram ye rre. E Datan kevbe Abiram keghi ladian do mudia ye onurho owa ukpọn iran, iran kevbe amwẹ iran kevbe ivbi iran.

²⁸ E Mosis keghi tama emwa nii wẹẹ, “Vbenian ọre uwa gha ya rẹn wẹ Osanobua Ọ re ọ gie mwẹ ne I do ru avbe emwi na hia, kevbe wẹ, ẹ i re ekhọe obọ mwẹ ọ re I ya ru iran.

²⁹ A deghẹ avbe emwa na wu uwu ẹhi, vbene irrioya ne ọ ke obọ Osanobua rre i na rrọ, ọnii rhie maa wẹ, e Nọyaẹnmwa ma gie mwẹ.

³⁰ Sokpan, a deghẹ e Nọyaẹnmwa ghi ru emwi eso ne a ma he họn egbe ọre ẹdẹ, ighẹ otọ rhan unu, ọ na minọ iran re deba emwi ne iran mwẹ hia, iran na ya ẹmwẹ ne unu la ehe ne iran ni wulo nẹ ye, wa ghi rẹn wẹ te iran na he Nọyaẹnmwa.”

³¹ Ọwarọkpa nii vbe ọ wa da guan fo, otọ keghi rhan unu an vbe ehe ne Datan kevbe Abiram ye.

³² Ọ keghi minọ iran kevbe avbe ẹgbẹe iran re, deba irogho e Kora kevbe emwi ni iran mwẹ hia.

³³ Erriọ ọre iran na ya ẹmwẹ ne unu la otọe iran ni wulo nẹ, deba emwi ni iran mwẹ hia. Otọe keghi hu ran gue iran, iran na khian ne a ma ghi miẹn.

³⁴ Emwa Izrẹl ni rre evba ghi họn vbe iran tulo, iran keghi lẹ, iran datu wẹẹ, “Wa lẹẹ, ne otọ ghẹ vbe minọ ima re deba re.”

³⁵ E Nọyaẹnmwa keghi gie erhẹn ne ọ giẹn iran an ighẹ iran ekigbe siyeha yan uri (250) ni viọ eturari ni rre.

Emwi Ne A Ya Wan Erhẹn

³⁶ E Nọyaẹnmwa keghi tama e Mosis wẹẹ,

³⁷ “Tama Eliaza ne ovbi Errọn ne ohẹn, ne ọ viọ ọkpan erhẹn ọghe ẹrọnmwọ nii, hin ehe ne iran ne erhẹn giẹn uan ni ye rre, viọ ẹyin ni rre ọkpan erhẹn kua ye ehọ vbehe rhunmwuda, avbe ọkpan erhẹn ni, emwi iruemwi nọ.

³⁸ Iran khian emwi iruemwi vbe a viọ iran gha die aka e Nọyaẹnmwa. Rhunmwuda onii viọ ọkpan ọghe avbe emwa na ne a gbele ye ẹmwẹ orukhọ iran, dunmwu ẹn ya khian avbe ọkpan fẹrhẹfẹrhẹ ne u yae gha gue aka. Ọ na ghi gha re ne a miẹn wan ne ivbi Izrẹl.”

³⁹ Ọre Eliaza ne ohẹn ne viọ ọkpan nii, ọ na dunmwu ehia ya khian ọkpan fẹrhẹfẹrhẹ ne ọ ya gha gue aka.

⁴⁰ Ọna kegha re ne ivbi Izrẹl gha miẹn wan wẹ ọmwa ne ẹ i re ovbi uniẹn ọghe Errọn ne ọ ghẹ gha rrie aka do gha giẹn eturari vbe odaro e Nọyaẹnmwa, ne a ghẹ vbe fuẹn ọnrẹn uan zẹ vbe Kora kevbe irogho ẹre. A keghi ru emwi na hia zẹ vbene Nọyaẹnmwa gie Mosis ne ọ tama Eliaza.

Errọn Miẹn Emwa Ni Fan

⁴¹ Ẹdẹ ne ọ lelẹe, emwa ni hia keghi suẹn gha gui ẹzọ uwu unu ghe Mosis kevbe Errọn wẹẹ, “Wa gbele eso ua vbe uwu emwa e Nọyaẹnmwa.”

⁴² Iran ghi si koko nẹ ne iran ya gui ẹzọ ọghe ọ ma kei ma e Mosis kevbe Errọn, iran keghi gbe aro ghe odẹ Owa Ukpọn Ile, iran keghi miẹn wẹ okuku degue ẹre kevbe wẹ uwanmwẹ ne ẹ i gia ghe, ne ọ rhie maa ighẹ Nọyaẹnmwa rre evba vbe rhie egbe maa.

⁴³ E Mosis kevbe Errọn keghi ya mudia ye odaro Owa Ukpọn nii.

⁴⁴ Ẹre Nọyaẹnmwa na tama e Mosis wẹẹ,

⁴⁵ “Gban egbe ghe odieke hin ehe ne iran na ye rre, ne I wa fuẹn iran an ye evba!” Iran keghi vbokho egbe rre viọ aro rhuotọ.

⁴⁶ Ẹre Mosis na tama Errọn wẹẹ, “Rhie ọkpan erhẹn ruẹn, wan erhẹn yọ vbe ne ọ rre aka, ne u vbe viọ eturari ye erhẹn nii. U ghi zẹgiẹgiẹ bu emwa na ne u ya ru iruemwi akpehuan ne iran na. Ẹgiẹgiẹ! Ohu e Nọyaẹnmwa vẹn nẹ. egboghogbogho suẹn nẹ.”

⁴⁷ Errọn keghi ru vberriọ, ọ keghi rhie ọkpan erhẹn ọnrẹn, ọ keghi rhulẹ la adesẹneva emwa ni si koko nii. Rẹn ghi miẹn ighẹ egboghogbogho nii suẹn nẹ, ọ keghi viọ eturari ye erhẹn nii, ọ keghi ru iruemwi akpehuan ne emwa nii.

⁴⁸ Ọna keghi da egboghogbogho nii obọ yi, rẹn keghi mudia ye ẹkpo emwa ni rre agbọn kevbe eni wulo.

⁴⁹ Inu emwa ni wulo kegha re iyisẹn yan uri eha ọre ọ ya yan arriaisẹn iwenẹ (14,700) vbe ne a ma na ka iran ni wulo ba ẹmwẹ isọtẹ e Kora ba ẹre.

⁵⁰ Egboghogbogho ni ghi dobọyi nẹ, Errọn keghi dọlegbe bu e Mosis gha rrie onurho Owa Ukpọn Ile.