Nọmbas 15 - Edo Bible (E Baibol Ẹdo) Version 1996

Uhi Vbe Ekpa Izọ Ese

¹ E Nọyaẹnmwa keghi viọ,

² emwamwa na ne Mosis ne ọ viọ ne ivbi Izrẹl ne iran gha lo ẹre vbe otọe nii ne irẹn khian mu ne iran.

³ A sẹtin mu ẹmila ra ohuan ra ogho ra ẹwe gie Nọyaẹnmwa zẹ vbe izọese na giẹn uan, ra izọese ne a ya mu eyan sẹ ra ne a ya sisara, ra izọese ne a ru ya dugie ugamwẹ, uwinhinmwẹ avbe izẹọhẹ evbare vberriọ wa yẹ e Nọyaẹnmwa.

^4-5 Ọmwa ne ọ rhirhi zẹ ọhẹ vberriọ gie Nọyaẹnmwa ọ ghi vbe viọ izẹọhẹ ọka, ra uwan ẹlubọ eva ne a ye ago eva ọghe ofigbọn oliv gbe lelẹe rre. Ọ gha vbe zọ ese na giẹn uan, ọ ghi vbe mu ọgọ ayọn eva lele ovbi ohuan ọkpọkpa rre.

⁶ A deghẹ ogho ọre a ya zọ ese, a ghi mu uwan irhuarhua enẹ ne a ya ọgọ eha ọghe ofigbọn oliv gbe lelẹe zẹ vbe izẹọhẹ ọka,

⁷ ke ẹe kevbe ọgọ ayọn eha. Uwinhinmwẹ izẹọhẹ vberriọ wa yẹ e Nọyaẹnmwa.

⁸ A gha ya ẹmila zọ ese na giẹn uan ra ese ne a ya mu eyan sẹ ra ne a ya sisara,

⁹ a ghi rhie ọhẹ ọghe ọka lelẹe, uwan irhuarhua ehan ne a ya ọgọ ofigbọn oliv isẹn gbe,

¹⁰ a ghi viọ ọgọ ayọn enẹ lelẹe. Uwinhinmwẹ izẹ ọhẹ vbenian wa yẹ Nọyaẹnmwa.

¹¹ Emwi ne a gha viọ lele ẹkhuia ẹmila, ọ re ena khin. ogho, ovbi ohuan ra ẹwe ne a ya zọ ese ọ re eni khin.

¹² A gha ye ara-nmwẹ ne ọ gberra ọkpa zọ ese, emwi na ne a hẹ lelẹe na, a ghi vbe gie ẹe bun yọ vberriọ zẹẹ.

¹³ Ọmwa ne ọ ghi re ovbi Izrẹl nẹ, erriọ ọ re ọ gha ru ẹe vbe ọ gha zẹ ọhẹ evbare, emwi nọwinhin ne ọ yẹ Nọyaẹnmwa.

¹⁴ A deghẹ a ghi vbe miẹn wẹ orhunmwuyẹn ne ọ rre uwu uwa, deghẹ ovbi ẹghẹ kherhe nọ ra te ọ wa do yin, ọ na wẹ rẹn gha zẹ ọhẹ evbare, emwi ne uwinhinmwẹ ọnrẹn yẹ Nọyaẹnmwa, rẹn ghi wa vbe rhie owẹ lelẹe vbene a mwamwa ẹn ye otọ na.

¹⁵ Uhi na ghi gha re ne uwa kevbe avbe erhunmwuyẹn ni rre ẹvbo rua, gha ya gha ru emwi rhinrin ẹdẹ. Ọkpa ọ re uwa vbe iran khin vbe odaro Nọyaẹnmwa.

¹⁶ Uhi ne ọ kan uwa ọre ọ vbe kan iran.

¹⁷ E Nọyaẹnmwa keghi viọ avbe uhi na ne Mosis.

¹⁸ Ne ọ viọ ne ivbi Izrẹl ne iran gha ya ẹe ru emwi vbe otọe nii ne irẹn ra mu ne iran.

¹⁹ A gha rhọ emwi okọ vbọ ne a re, a ghi zẹ kọ vbọ ne a ya zẹ ọhẹ kpataki gie Nọyaẹnmwa.

²⁰ Iyeke vbe a ghẹ ghi rhọ emwi okọ nẹ ukpukpo, a ghi mu vbe ebrẹd ne a ka ya ẹe le ighẹ ọka ne a rhọ vbọ, ne a ya zẹ ọhẹ kpataki gie Nọyaẹnmwa. Vbene a ya ọka ne a ka gha wiẹn zẹ ọhẹ kpataki, erriọ ọre a ra vbe gha ya ọna zẹ ọhẹ.

²¹ Erriọ ọ re a ra gha zẹ ọhẹ kpataki na gie Nọyaẹnmwa vbe uwu irhuarhua ne a ka gha gbe vbe a ghẹ ghi rhọ emwi okọ nẹ rhinrin ẹdẹ.

²² Sokpan, a deghẹ a ghi miẹn ọmwa ne ọ rra avbe uhi na ne Nọyaẹnmwa viọ ne Mosis vbe ne ẹ i na re ẹmwẹ ọnrẹn,

²³ gia kha ighẹ avbe emwa ma sẹtin ru emwi ne Nọyaẹnmwa tama e Mosis na vbe ẹghẹ nọ dee.

²⁴ A deghẹ a miẹn wẹ abakuru na i re ẹmwẹ emwa nii, iran ghi ya ẹkhuia ẹmila deba avbe ọka kevbe ayọn zẹ ọhẹ ne ọ maẹn, zọ ese ne a giẹn uan. Uwinhinmwẹ ọnrẹn wa yẹ Nọyaẹnmwa. Debare, iran ghi ya ovbukhọ zọ ese orukhọ.

²⁵ Ohẹn ghi ru iruemwi akhuẹhuan ne emwa ni hia, a gha yabọ iran, rhunmwuda, abaku ru nii i re ẹmwẹ iran, iran keghi vbe viọ izọese orukhọ iran rre zẹ vbe izẹọhẹ evbare gie Nọyaẹnmwa.

²⁶ A gha yabọ emwa Izrẹl hia kevbe avbe erhunmwuyẹn ni rre uwu iran rhunmwuda, iran hia ọ re nene abakuru kanrẹn.

²⁷ A deghẹ ọmwa ọkpa kẹkan rukhọ vbe nẹ i na re ẹmwẹ ọnrẹn, ọ ghi ya ovbi ẹwe amwẹ ne ọ he rre ukpo ọkpa zọ ese orukhọ.

²⁸ Ohẹn ghi ru iruemwi akpehuan vbe aka ne ọ ya kpe ọmwa nii huan, a gha yabọe.

²⁹ Emwamwa ọkpa ọre ọ kan emwa hia ni ru orukhọ vbe ne ẹ i na re ẹmwẹ ọnrẹn, ọre ọmọ otọ nọ ra orhunmwuyẹn.

³⁰ Sokpan, ọmwaikọmwa, ne o ba ru orukhọ, ọ re ọmotọ nọ ra orhunmwuyẹn te ọ yagha Nọyaẹnmwa a ghi gbe ẹe rua.

³¹ Rhunmwuda, ọ he ẹmwẹ ne Nọyaẹnmwa tae, ọ na ba rra ọkpa vbe uwu avbe uhi ẹre. Obọ ẹre ọre ọ ya si emwi ne ọ gbẹe.

Ọmwa Ne Ọ Rra Uhi Ẹdẹ Ikẹtin

³² Ẹdẹ ọkpa, vbe ivbi Izrẹl he rre uwu ẹgbo, iran keghi miẹn okpia ọkpa ne ọ ho erhan vbe Ẹdẹ Ikẹtin.

³³ Iran keghi mu ẹẹn bu e Mosis, Errọn kevbe emwa nii hia.

³⁴ Iran na rhie ẹre ne ọmwa da yi rhunmwuda iran ma he rẹn vbe ne iran gha ru ẹe hẹ.

³⁵ Ẹre Nọyaẹnmwa na tama Mosis wẹẹ, “Te a ra gbe ọmwa ni uan; emwa nii hia ọre ọ ra filo okuta gbe ẹe rua vbe a lahin agọ rre nẹ.”

³⁶ Ẹre emwa nii hia na rhie ẹre lahin uwu agọ rre, iran na filo okuta gbẹe rua zẹ vbene Nọyaẹnmwa khare.

Emwamwa Ẹmwẹ Adaghọ

³⁷ E Nọyaẹnmwa keghi tama e Mosis,

³⁸ ne ọ tama ivbi Izrẹl wẹẹ, “Wa rrilo adaghọ lele igiẹnenẹ ehọ ukpọn uwa, wa ghi vbe de oru ne raghoragho mu adaghọ ọkpọkpa. Wa ghi gha ru ẹe khian rhinrin ẹdẹ.

³⁹ Adaghọ na ghi gha re ọghe ayere, ẹghẹikẹghẹ ne uwa a rhirhi ya dẹghe iran, wa ghi ye uhi mwẹ hia rre nu uwa vbe gha ru iran; ẹghẹ nii, wa i ghi ra fi iyeke gbe mwẹ ne uwa ya gha ru ọghe enegbe uwa ne uwa ho.

⁴⁰ Iran gha ye uwa rre ne uwa gha rhie uhi mwẹ hia mwẹ, wa ghi do gha re ọghomwẹ fẹẹrẹ.

⁴¹ Mẹ ọ re Nọyaẹnmwa Osanobua rua. Te I viọ uwa ke Igipt ladian ne I do gha re Osanobua uwa. Mẹ ọ re Nọyaẹnmwa.”