Nọmbas 14 - Edo Bible (E Baibol Ẹdo) Version 1996

Avbe Emwa Zuyọn

¹ Vbe asọn nii hia, avbe emwa nii kegha viẹ eve orriara.

² Iran kegha gui ẹzọ e Mosis kevbe Errọn wẹẹ, “Ma te wa wulo vbe Igipt ra vbe uwu ẹgbo na ọre ọ maa sẹ.

³ Vbọzẹ ne Nọyaẹnmwa na viọ ima rrie ẹvbo nii yi? Iran gha gbele ima rua vbe okuo, iran ghi munọ avbe ivbi ima kevbe amwẹ ima oghunmwu viọ gha rrie. Ẹre a wa werriegbe gha rrie Igipt ọre ọ maa sẹ.”

⁴ Iran na rhunmwuda onii zẹ ọe vbe iro ma egbe iran wẹẹ, “Wa gie ima zẹ ọkaolotu ne a dọlegbe gha rrie Igipt.”

⁵ Ẹre Mosis kevbe Errọn na vbokho egbe rriotọ vbe odaro emwa nii.

⁶ E Jọsua ne ovbi e Nọn kevbe Kelẹb ne ovbi e Jefunẹ na ye akhiẹ sọ ukpọn iran an.

⁷ Iran keghi tama emwa nii wẹẹ, “Otọe ne ima ya ghe, otọe esiesi nọ.

⁸ A deghẹ ẹko Nọyaẹnmwa rhiẹnrhiẹn ghe mwa, ọ gha viọ ima gha rrie evba, ọ ghi mu otọ ne ẹfe vuọn kevbe ne ọ maa emwi okọ nii ne ima.

⁹ Wa ghẹ sọtẹ e Nọyaẹnmwa wa ghẹ vbe mu ohan emwa ni rre evba. Ma gha khọn iran miẹn otọ vbe ne ẹ i na sa ima ọfọ, e Nọyaẹnmwa gu ima rrọọ, ọ vbe fuẹn avbe ẹbọ ne ọ te gbe aro ghe iran an nẹ, rhunmwuda onii wa ghẹ mu ohan iran.”

¹⁰ Emwa nii ghi te ra filo okuta gbele iran an, sokpan vbe udomwurri, iran keghi ya bẹghe vbe uwanmwẹ ne ẹ i gia ghe nii ne ọ rhie maa we Nọyaẹnmwa re evba, rhie egbe ladian yan Owa Ukpọn Ile.

E Mosis Na Erhunmwu Ne Emwa Nii

¹¹ E Nọyaẹnmwa keghi tama e Mosis wẹẹ, “Vbe avbe emwa na gha he mwẹ kpẹe sẹ hẹ? Vbe iran gha he ne iran mu ẹtin yan mwẹ kpẹe sẹ hẹ, egbe ne I ya winna iwinna ọyunnuan ni bun vberriọ ye iran aro.

¹² I gha gie emianmwẹ ogba obọ ne ọ fuẹn iran uan, sokpan, I gha ya uwẹ ru ne ọ mu ẹvbo ọvbehe gbọọ, ẹvbo ne ọ gha kpọlọ kevbe ne ọ gha mwẹ ẹtin sẹ iran.”

¹³ Sokpan, e Mosis tama e Nọyaẹnmwa wẹẹ, “Ẹtin ruẹn ọ re u ya viọ avbe emwa na ke Igipt ladian. Emwa Igipt ghẹ ghi họn vbene u ru emwa ruẹn hẹ.

¹⁴ Iran ghi do tama emwa ni rre ẹvbo na. Emwa na ka họn nẹ wẹ, wẹ ne Nọyaẹnmwa rrọọ yaba mwa, wẹ, te u wa ya egbe ne a miẹn vbe okuku ruẹ a de mudia vbe odukhunmwu ehe ne ima ye, kevbe wẹ avan gha rre, u ghi ke odaro ne ima vbe uwu orre okuku amẹ kevbe asọn, vbe uwu orre erhẹn.

¹⁵ Banbanna nian, deghẹ u gbele emwa ruẹn hia a, avbe ẹvbo hia ni ka họn otiti ruẹ ghi kha wẹẹ,

¹⁶ ‘Rhunmwuda ighẹ u ma sẹtin viọ emwa ruẹn sẹ otọ ne u ve iran re ọre u na gbele iran an ye uwu ẹgbo.’

¹⁷ Rhunmwuda onii e Nọyaẹnmwa lahọ, rhie ẹtin ruẹn ma mwa ne u vbe ru vbene u khare ẹkpo ne u na wẹẹ,

¹⁸ ‘Mẹ ne Nọyaẹnmwa ohu i rherhe mu mwẹ, mẹ rhie ahoẹmwọmwa kevbe ayegbe yan ọmwa maa, I ghi vbe gha ya orukhọ kevbe isọtẹ bọ ọmwa sokpan ẹ i mwẹ I ma rria ikhi erha kevbe avbe ivbi ẹre, kevbe emiwu kevbe eyẹ kevbe orre ne ogieha kevbe ne ogienẹ, rhunmwuda orukhọ evbibiẹ iran.’

¹⁹ Lahọ, la ekpa ahoẹmwọmwa ruẹn nọkhua kevbe ne ẹ i fiwerriẹ ya orukhọ emwa na bọ iran, zẹ vbene u ya gha bọ iran ya ke ne iran kpao vbe Igipt gha dee.”

²⁰ E Nọyaẹnmwa keghi wanniẹn wẹẹ, “I gha yabọ iran vbene u nọ rẹn.

²¹ Sokpan, I yan rẹn vbene I mẹ na rrọọ kevbe vbene aro mwẹ na gba agbọn hia.

²² Ọkpa vbe uwu iran na ne ọ gha rre agbọn, ne ọ vbe lao otọe nii, ẹ i rrọ. Iran miẹn uwanmwẹ ne ẹ i gia ghe ne a ya rẹn ighẹ I rre evba nẹ, kevbe iwinna ọ yan unu uan ne I winnaẹn vbe Igipt, kevbe uwu ẹgbo, sokpan iran keghi ye gha fi obọ yọ mwẹ unu yan egbe yan egbe, iran na he ne iran họn ẹmwẹ mẹ.

²³ Iran i lao otọ ne I ve avbe erha iran odede ẹre. Uwu iran hia ni he mwẹ nii, ọkpa ne ọ gha larọ ẹ i rrọọ.

²⁴ Sokpan, vbene a na miẹn wẹ Kelẹb ọguọmwadia mwẹ ighẹ uyimwẹ ọghọe lughaẹn, ọ keghi mudia ke mwẹ gbain, I gha rhie ẹre sẹ otọe ne irẹn ya ghe, otọe nii gha khian ọghe ivbi ẹre.

²⁵ Otọe iya ni ne emwa Amalẹk kevbe Kenan ye na. Vbe ẹdẹ na khuẹ, wa werriegbe, wa ya ọdelegbe la odẹ Okun Irunmwu la uwa ẹgbo.”

E Nọyaẹnmwa Rri Iran Oya Ye Ẹzọ Uwe Unu

²⁶ E Nọyaẹnmwa keghi tama e Mosis kevbe Errọn wẹẹ,

²⁷ “Vbe avbe emwa dan na ra gui ẹzọ uwu unu ghe mwẹ kpẹe sẹhẹ yi? Ẹzọ uwu unu ne I he họn vbe unu iran sẹe.

²⁸ Banbanna nian, rhie ewanniẹn na ne iran. ‘Ugbẹn vbe a miẹn wẹ mẹ rrọọ, te I wa vẹn ihẹn wẹ vbene uwa nọ rẹn ọre I ra ru uwa hẹ. Mẹ ne Nọyaẹnmwa tae nẹ.

²⁹ Wa gha wulo, a ghi vbe zagha ikun orinmwi uwa lele uwu ẹgbo na, rhunmwuda ne emwa na gha gui ẹzọ uwu unu ghe mwẹ, wa na hia fẹẹrẹ ne ọ sẹ ọmọ ukpo ugie nẹ ne ọ gha lao otọe nii, ẹ i rrọọ.

³⁰ I te yan wẹ I gha gie uwa yin otọe ni, sokpan, nian ọkpa vbe uwu uwa ne ọ gha yin ẹnrẹn ẹ ghi rrọọ gberra Kelẹb kevbe Jọsua.

³¹ Wa khare ighẹ a gha munọ ivbi uwa oghunmwu, sokpan I gha viọ iran gha rrie otọe nii ne uwa he, ọ ghi khian owa iran.

³² Uwu ẹgbo na ọre uwa ra wulo yi.

³³ Ivbi uwa gha zozo la ukpo iyeva vbe uwu ẹgbo, iran ghi gha rri oya ba ẹmwẹ ne uwa i na gia mu ẹtin yan, a te do miẹn wẹ ne okiekie vbe uwu uwa, wu.

³⁴ Ukpo iyeva ọre uwa ra ya rri oya ye orukhọ uwa, ukpo ọkpa ye ikpẹdẹ ọkpọkpa ne uwa ya ghe otọe ni ghe. Wa gha rẹn emwi ne a ya kha we ne uwa si okuo mwẹ rrie egbe!

³⁵ I gha miẹn i ghẹ I i ru uwa emwi na, wa ne emwa dan ni si uma mwẹ. Uwu ẹgbo na ọre uwa hia ra wulo yi. Mẹ ne Nọyaẹnmwa tae nẹ.’ ”

^36-37 Emwa ne Mosis gie ya ghe otọe nii ghe, keghi do na iyẹn ohoghe ne ọ ye avbe emwa nii gha gui ẹzọ uwu unu ghe Nọyaẹnmwa. E Nọyaẹnmwa keghi rhunmwuda onii fi emianmwẹ ku iran, iran keghi wulo.

³⁸ Vbe uwu iran ne ọrhẹ iweva nii, eva kẹkan ne ọ mi uhunmwu vbọ kegha re Kelẹb kevbe Jọsua.

Ẹghẹ Okaro Ne Iran Te Ra Khọn Ẹvbo Nii

³⁹ E Mosis ghi tama ivbi Izrẹl vbene Nọyaẹnmwa kha hẹ, iran keghi wa khiẹ ẹsẹse.

⁴⁰ Vbe owiẹ ikpẹdẹ ne ọ lelẹe, iran kegha khian ya khọn ẹvbo ne ọ rre uhunmwu oke, iran wẹẹ, “Ma mu egbe nian ne a gha rrie ehe ne Nọyaẹnmwa tama mwa nii. Ma miẹn kue ighẹ ma rukhọ.”

⁴¹ E Mosis keghi wanniẹn wẹẹ, “Vbọzẹ khekherriọ ne u wa ra na vbe he uhunmwu ye Nọyaẹnmwa obọ na? Ẹtin uwa i sẹ ọe.

⁴² Wa ghẹ yo, e Nọyaẹnmwa ma yaba uwa. Eghian uwa gha khọn miẹn uwa otọe.

⁴³ Wa gha mu aro da avbe emwa Amalẹk kevbe Kenan, wa gha wulo ye okuo, e Nọyaẹnmwa i rrọ yaba uwa, rhunmwuda, wa he ne uwa lelẹe.”

⁴⁴ Sevba ohan ma mu iran, iran keghi ye gha rrie ẹvbo oke nii, a gha rhe miẹn wẹ kevbe Ẹkpẹti Ile ọghe Nọyaẹnmwa kevbe Mosis, ọkpa ne ọ kpao vbe agọ ẹ rrọọ.

⁴⁵ Ẹre emwa Amalẹk kevbe emwa Kenan ni rre evba na dekun iran, iran na khọn miẹn iran otọe, iran na khu iran do sẹ Họma.