Nọmbas 13 - Edo Bible (E Baibol Ẹdo) Version 1996

Avbe Ọrhẹ

¹ E Nọyaẹnmwa keghi tama e Mosis wẹẹ,

² “Zẹ ọkpọkpa vbe uwu avbe ọkaolotu avbe ẹwae iweva nii ne u gie iran zẹ vbe ọrhẹ ne iran ya ba otọ Kenan ne I ra mu ne ivbi Izrẹl ghe.”

^3-15 E Mosis keghi ru vberriọ ọ na ke ẹgbo Paran gie avbe ọkaolotu na gha khian: Ẹwae Ọkaolotu Ẹwae Riubẹn e Siamua ne ovbi Zakọ E Simiọn e Siafat ne ovbi e Hori E Juda e Kelẹb ne ovbi e Jefunẹ Isaaka Igal ne ovbi e Josẹf Ifreim e Hosia ne ovbi e Nọn E Bẹnjamin e Palti ne ovbi e Rafa E Zebulọn e Gadiẹl ne ovbi e Sodi E Manasẹ e Gadi ne ovbi e Susi E Dan Amiẹl ne ovbi e Gemani Asia e Setọ ne ovbi e Maikẹl Naftali e Nabi ne ovbi e Vopsi E Gad e Gẹuẹl ne ovbi e Makai

Ẹwae Ọkaolotu

¹⁶ Iran na ọrọre avbe ọrhẹ ne Mosis gie ne ọ ya ghe otọe nii ghe, ọ keghi fi eni Hosia ne ovbi e Nọn werriẹ khian Jọsua.

¹⁷ Ugbẹn vbe Mosis ghi gie iran ladian, ọ tama iran wẹẹ, “Wa la odẹ okuọ la odẹ ekẹn ọghe ẹvbo Kenan ya sẹ ẹvbo oke nii.

¹⁸ Wa ghe egbe ẹvbo ne ọ khin, inu emwa ni rre evba kevbe vbene iran wegbe sẹ hẹ.

¹⁹ Wa ghe ẹre deghẹ nene ẹvbo maa ra ẹ i maa, kevbe wẹ deghẹ ẹvbo ne a ma gbe ekẹn gaa ra ne a gbe ekẹn ga ẹre iran ye.

²⁰ Wa ghe ẹre a deghẹ otọe nii ma emwiokọ, kevbe wẹ deghẹ erhan bun vbe otọe nii. Wa ghẹ mwẹ wa ma viọ rre vbe ọmọ erhan ni rre ẹvbo nii.” (Ẹghẹ ne ọmọ erhan ayọn nọ baa ya suẹn gha vbo nọ.)

²¹ Ẹre emwa nii na la ghe odẹ okuọ, iran na ghe otọe nii ke ẹgbo Zin vbe odẹ ekẹn ya sẹ Rehọb, ne ọ rre ọkpẹn Hamat Pas vbe odẹ okuọ.

²² Iran keghi ka laghe odẹ ekẹn ẹvbo nii iran ke do sẹ Hibrọn ehe ne ivbi uniẹn iran ye ighẹ avbe Ahiman, Siesia kevbe Talmai ne arhuanran, ẹwae iran na ọ re a tie ẹre Anakin (Ukpo ihinrọn ọre a ka ya bu Hibrọn khẹ Zoan ne ọ rre Igipt.)

²³ Iran keghi do sẹ Iya Ẹskọl, evba ọre iran na fian abọ ne ititi ọmọ erhan ayọn nọbaa ye, ne ọ khua sẹrriọ wẹ ikpia eva ọre a gbae ye erhan mu ẹẹn na, iran vbe viọ ighee eso kevbe ohọ rre ba ẹre.

²⁴ (Rhunmwuda, ititi ọmọ erhan ayọn nọ baa ne a fian kọe rre ọre a na gha tie evba nii Ẹskọl.)

²⁵ Iran ghi ya ikpẹdẹ iyeva ghe otọe nii lẹga nẹ, iran keghi dọlegbe bu

²⁶ e Mosis, Errọn kevbe ivbi Izrẹl hia gha die Kedẹs vbe ẹgbo Paran. Iran keghi na iyẹn emwi ne iran miẹn, iran na vbe mu ọmọ erhan ne iran viọ rre ma iran.

²⁷ Iran keghi tama e Mosis wẹẹ, “Ma ya ghe ẹvbo ne u gie ima ẹre ghe nẹ, otọe ne ẹfe ye ke vbe ne ọ maa emwiokọ nọ, usun ọmọ erhan ni rrọ ọre ena khin.

²⁸ Sokpan, emwa ni rrọ keghi re emwa ẹtin, a na wa vbe gbe ekẹn ọnrẹn ẹsẹse. Ne ọ ghi wa ya khọ sẹ ehia, ma miẹn avbe ivbi uniẹn arhuanran vbe evba.

²⁹ Odẹ ekẹn vbe otọ nii ọ re emwa Amalẹk ye, ẹvbo oke vbọ ọ re avbe Hiti Jebus, kevbe Amọri ye, ivbi Kenan keghi rre ọkpẹn okun Meditẹrrenian, iran yin lele Ẹzẹ Jọdan.”

³⁰ E Kelẹb keghi gbe eta ye avbe emwa nii gui ma e Mosis unu, ọ wẹẹ, “Te ima ra dekun ẹvbo nii ne a mu ẹẹn nian, ma wegbe sẹ ne ọ gha khọn rẹn miẹn otọ.”

³¹ Sokpan avbe emwa ne iran vbe Kelẹb gba yo keghi kha wẹẹ, “Ẹn o, ma ma wegbe sẹ ne ọ gha dekun iran; iran ni rre evba wegbe sẹ mwa.”

³² Iran na wewe iyẹn ohoghe vbe ekpa ẹvbo ne iran ya ghe gba ẹbu ivbi Izrẹl hia, Iran wẹẹ, “Evbare ne a miẹn vbe otọ nii i kue sẹ ẹvbo nii rrọọ re. Emwa ne ima miẹn hia wa ye higboo.

³³ Ma miẹn avbe arhuanran vbe evba, iran ne ivbi Anak. Ma keghi yevbe atete vbe ehe ne iran ye zẹ vbene ima ro egbe ima yi. Erriọ ọre ima gha vbe khọ vbe aro iran.”