Nọmbas 11 - Edo Bible (E Baibol Ẹdo) Version 1996

Ehe Ne A Tie Ẹre Tabẹra

¹ Emwa nii keghi suẹn gha zuyọn ma e Nọyaẹnmwa vbe ekpa emwi ni ruan iran, ugbẹn vbe Nọyaẹnmwa ghi họn, ohu mu ẹẹn, ọ na gie erhẹn la uwu ẹbu iran ọ kegha giẹn vbe uwu ẹbu iran, ọ na rhia obọ ọkpa rua vbe agọ nii.

² Emwa nii keghi viẹ bu e Mosis wẹ ne ọ yi iran obọ, rẹn keghi na erhunmwu ghe Nọyaẹnmwa, ọ re erhẹn nii na dọyọ.

³ Ọre a na ghi gha tie evba nii Tabẹra, rhunmwuda evba nii ọre erhẹn e Nọyaẹnmwa na giẹn vbe uwu ẹbu iran.

E Mosis Zẹlẹ Avbe Ekaolotu Ekigbesiyenẹ

⁴ Emiowo keghi wa kakabọ gha khọn avbe erhunmwuyẹn ni lele ivbi Izrẹl khian, avbe ivbi Izrẹl tobọ iran na vbe suẹn gha gui ẹzọ uwunu wẹẹ, “Vbọ rrọọ akpawẹ ma miẹn emiowo re nian!

⁵ Ẹghẹ ne a na rre Igipt, ma ghi rri ehẹn ne ọ khan mwa, avbe umwẹkhẹn, ogi, ebe afọ, alubarha ke ohọ ne ima gha re!

⁶ Sokpan banbanna nian, ma ighi mwẹ orhiọn, a i miẹn evbare re, evbare ọvbehe i rrọ gberra e mana na ẹdẹgbe ẹdẹgbe!”

⁷ Mana keghi yevbe ọmọ erhan negiẹrẹ ne ọ mwẹ egbe ne ọvboro kherhekherhe.

^8-9 Emwa ni ghi ya rhọ ẹre, iran ghi lọe ra ne iran dunmwu ẹre irhuarhua, a ghi do lẹe, a ghi ya fian eka ne parhaparha. A gha ghe ẹre ọ ghi ye vbe ebrẹd ne a ya ofigbọn oliv gbe a ke lẹe. Evbu ne ọ tuo ọre nene mana lele dele ye agọ nii vbe asọn.

¹⁰ E Mosis keghi họn vbe avbe emwa nii gui ẹzọ uwu unu vbehe ne iran na ya otu otu sikoko ye onurho ne a la la Owa Ukpọn iran. Ohu iran keghi mu e Nọyaẹnmwa. Ẹko keghi balọ e Mosis,

¹¹ ọ keghi tama e Nọyaẹnmwa wẹẹ, “Vbu a na ru mwẹ khọ vbenian hẹ yi? De emwi ne ohu mwẹ mu ẹẹn yi? Vbọzẹ ne u na ka iran na yọ mwẹ obọ?

¹² Ẹ i re mẹ ọre ọ yi iran, ẹ i re imẹ ọ biẹlẹ iran! Vbu a ghi na wẹ ne I ru zẹ vbe ọkokọmọ ne I viọ iran ye ekuabọ mwẹ zẹ vbe ọmọmọ gha rrie otọ ne u ve wẹ u gha mu ne avbe erha iran odede hẹ?

¹³ Vbia ra na miẹn emiowo viọ ne iran na hia? Iran gha khiẹkhiẹ egbe, iran gha nọ ne a rhie emiowo ne iran.

¹⁴ Mẹ i ra sẹtin gbe aro ghe iran na, iran bun sẹ mwẹ gbe!

¹⁵ A deghẹ erriọ u khian gha ru mwẹ, lahọ tohan mwẹ ne u gbe mwẹ uan ne I ghẹ ghi họn ẹmwẹ obọ dan ruẹn vbe egbe mwẹ ọvbehe.”

¹⁶ E Nọyaẹnmwa keghi tama e Mosis wẹẹ, “Si arhin ekigbe siyenẹ ni re ọkaolotu ni rẹn enegbe kevbe ne ọghọ rre ọre egbe koko, viọ iran bu mwẹ gha die Owa Ukpọn Ile, tama iran ne iran mudia ke uwẹ vba.

¹⁷ I gha tuorre do guẹ guan vbe evba, I gha rhie vbe orhiọn ne I rhie ne uwẹ nẹ, I ghi rhie ne iran. Ẹghẹ nii iran ghi gha ru iyobọ ne uẹn ya gha gbe aro ghe avbe emwa na, ne ọ ghẹ ghi gha re wẹ wẹ ọkpa ọ re ọ mu uhunmwu da ẹre.”

¹⁸ Banbanna nian, tama avbe emwa nii wẹẹ, “Wa họnmwẹ egbe rhunmwuda wa gha miẹn emiowo re akhuẹ. E Nọyaẹnmwa họn izuyọn uwa, ne uwa na vbe kha wẹ akpawẹ te uwa miẹn emiowo re nian, kevbe wẹ agbọn ma uwa sẹ ọna vbe Igipt. Banbanna nian, e Nọyaẹnmwa gha rhie emiowo ne uwa, te uwa gha rri ọe.

¹⁹ Wa gha miẹn ọn re, ẹ i re wẹ la ẹdẹ ọkpa ra ikpẹdẹ eva ra ikpẹdẹ isẹn ra igbe ra ikpẹdẹ ugie.

²⁰ Sokpan la uki hoho, rhinrin ọ te la uwa ehọ ladian, rhinrin ọ te do khan uwa. Ọ na gha sunu rhunmwuda ne uwa na he Nọyaẹnmwa, ne ọ gu uwa rre emwa na, wa gui ma rẹn wẹ ọ ma te kei ne uwa kpa hin Igipt rre?”

²¹ E Mosis keghi khama e Nọyaẹnmwa wẹẹ, “Arhunmwu arriaisẹn uri eha (600,000) ọ re I hẹ khian na, wẹ ke kha wẹ u gha ya emiowo ne ẹko ẹre gha vuọn iran koko iran la uki hoho?

²² Inu ẹmila ra ohuan ọ re a gha gbele ne ẹko ẹre gha vuọn iran? Ehẹn ni rre uwu okun hia gha vuọn iran ẹko ra?”

²³ E Nọyaẹnmwa keghi wanniẹn, “A miẹn emwi ne ime isẹtin ru ra? U gha miẹn wan a deghẹ ẹmwẹ ni tae gha sunu ra ẹ i ra sunu.”

²⁴ Mosis na ya tama avbe emwa nii vbene Nọyaẹnmwa kha hẹ. Ọ ke viọ ekigbe siyenẹ vbe uwa avbe ekaolotu si koko, ọ na ya viọ iran ye ọkpẹn Owa Ukpọn Ile.

²⁵ E Nọyaẹnmwa keghi la okuku tuorre do gu e Mosis guan. Ọ keghi rhie vbe ẹtin ne ọ rhie ne Mosis nẹ, ọ na rhie ne avbe arhin ekigbe siyenẹ ni re ekaolotu nii. Ugbẹn vbe orhiọn nii ghi tuorre yan iran, iran kegha vannọ sokpan zẹ vbe avbe akhasẹ, ọ ma ghi kpẹe ọ keghi dobọyi.

²⁶ Eva vbe uwu avbe ekigbesiyenẹ nii keghi mudia vbe agọ, iran ma yo Owa Ukpọn nii, iran na ọre Ẹldad kevbe Mẹdad. Ehe ne iran ye vbe agọ ọre nene orhiọn na mu iran, iran kevbe gha vannọ zẹ vbe avbe akhasẹ.

²⁷ Igbama ọkpa keghi rhulẹ tama e Mosis emwi ne Ẹldad kevbe Mẹdad ru.

²⁸ Ẹre Jọsua ne ovbi Nọn ne ọ gha re ne ọ ye Mosis obọ ke ẹghẹ ọvbokhan gha dee, na tama e Mosis wẹẹ, “Enọwanrẹn da iran obọ yi.”

²⁹ E Mosis keghi wanniẹn wẹẹ, “Ohanmwẹ i to uwẹ ra? Ọ gha wa ye mwẹ akpawẹ e Nọyaẹnmwa gha rhie orhiọn na ne emwa rẹn hia ne iran hia gha guan zẹ vbe akhasẹ.”

³⁰ Ẹre Mosis kevbe avbe ekaolotu ekigbesiyenẹ vbe Izrẹl nii na werriegbe gha rrie agọ.

E Nọyaẹnmwa Gie Ukorobozo Rre

³¹ Vbe udomwurri, e Nọyaẹnmwa keghi gie ẹhoho ni viọ Ukorobozo ke odẹ okun gha dee, iran kegha tin lele omwa ibata eha ke otọ kpao. Iran keghi yakọ vbe agọ nii la ibiriki eso lẹga ẹre vbe asefẹn ọnrẹn hia.

³² Ẹre avbe emwa nii na ya avan nẹdẹrriọ hia kevbe asọn kevbe ẹdẹ ne ọ lelẹe gha munọ avbe ukorobozo, a ma miẹn ne ọ ma munọ sẹ omwa izagodo ekigbesiyeha vbe uwu iran. Iran keghi viọ ehia tan lẹga agọ nii ne iran miẹn ehe na ka.

³³ Emiowo ma he fo, ọ wa ye bun ne iran gha re vbe otọ, ohu iran ke mu e Nọyaẹnmwa, ọ na gie okpemianmwẹ la uwu ẹbu iran.

³⁴ A kegha tie eni evba nii “Idin Orriarria” rhunmwuda evba nii ọ re a re iran ni gha rriarria ye emiowo yi.

³⁵ Evba ọ re emwa nii ke si kpao gha rrie Hazẹrot, iran na ya bu agọ ye evba.