Nehimaia 9 - Edo Bible (E Baibol Ẹdo) Version 1996

Iran Miẹn Orukhọ Kue

^1-2 Vbe ikpẹdẹ ne ọ ya gba vbe enẹyan ugie vbe uki ọkpa nii, avbe ivbi Izrẹl keghi si egbe koko ne iran do ye aguẹ ya khiẹ ye orukhọ iran. Iran keghi wannegbe iran hin uwu ẹbu avbe ọrriọvbe rre nẹ, iran keghi rhuan ukpọn akhiẹ iran na zẹ ekẹn ye uhunmwu zẹ vbe ama akhiẹ. Iyeke ọnii, iran keghi kpaegbe mudia gha miẹn orukhọ ne iran kevbe avbe erha iran odede ru kue.

³ Vbe omwa ẹgogo eha, a keghi gha tie Uhi e Nọyaẹnmwa ne Osanobua iran ma iran, vbe ẹgogo eha ne ọ lele ẹe, iran kegha miẹn orukhọ iran kue, iran na gha ga e Nọyaẹnmwa ne Osanobua iran.

⁴ Ekpatako ne a gbae yo ghe odukhunmwu kegha rrọ ne avbe Livai, avbe emwa na: E Jesua, e Bani, e Kadmiẹl, Siebanaia, Bunni, Siẹrebia, e Bani, kevbe Kienani, keghi mudia yan rẹn. Iran keghi tọn urhu mu ya na erhunmwu ghe e Nọyaẹnmwa ne Osanobua iran.

⁵ Avbe Livai na — e Jesua, e Kadmiẹl, e Bani, e Hasiabneia, e Siẹrebia, e Hodaia, e Siebanaia kevbe Pẹtahia keghi datie emwa ne iran gha die ugamwẹ wẹẹ: “Wa kpaegbe, ne uwa rho e Nọyaẹnmwa ne Osanobua uwa, wa gie emwa hia rho eni ẹnrẹn ne ọ mwẹ uyi, a gha rhe miẹn wẹ urhomwẹ emwa nagbọn ne ọ sẹe i rrọọ.”

Erhunmwu Imiẹnkue

⁶ Ẹghẹ nii, emwa Izrẹl keghi na erhunmwu na: “Wẹ ne Osa ọkpa ọrọre Nọyaẹnmwa mwa: wẹ ọ re ọ yi aro iso kevbe avbe orhọnmwẹ ni rre aro iso. Wẹ ọ re ọ yi otọ kevbe okun, kevbe emwi hia ni rre uwu iran; wẹ ọ re ọ rhie arrọọ ne iran. Ẹtin ni rre ẹrinmwi vbẹrre ya uhunmwu rhanmwẹ otọ ne uẹn.

⁷ Wẹ ne Nọyaẹnmwa Osanobua ọ re ọ zẹ Ebram u keghi rhie ẹre ke Ọọ ne Babilọn rre. U ke fi ẹre eni werriẹ ya khian Ebraham.

⁸ U miẹn wẹ ọ zẹ obọ lele uẹ u yanrẹn ne u mu otọ emwa Kenan ne ẹẹn. Otọ emwa Hiti kevbe Amọri otọ emwa Pẹriz, Jebus, Gẹgas, ne ọ gha re Otọe ne ivbi uniẹn ọnrẹn gha yin. U ru ẹe vbene u tae rhunmwuda, ekhọe ruẹ maa.

⁹ “U miẹn oya ne avbe erhamwa odede re vbe Igipt. U keghi họn vbe iran tu nọ iyobọ ọkpẹn Okun Iranmwiran.

¹⁰ U winna ọyunnuan ne ọkpaodin yan ọba, iran ni rre asẹ kevbe emwa otọe ni. Rhunmwuda, u rẹn vbene iran zẹ emwa ruẹn kpokpo hẹ, u keghi gbe miẹn ọghọ; ne ọ ye lele uẹ khian ẹrẹna.

¹¹ U zẹ odẹ ye adesẹ okun ne emwa ruẹn. U na viọ iran la otọe ne ọ kae gha khian. Iran ni khulo iran khian ke wulo ye uwu amẹ, vbene okuta ye vbe okun ne Ọ gbinna.

¹² U ya okuku su iran vbe ẹghẹ avan, u keghi ya erhẹn rhukpa ne iran vbe ẹghẹ asọn.

¹³ Vbe Oke Sainai, u ke ẹrinmwi tuorre u gu emwa ruẹn guan u keghi rhie uhi esi ne iran kevbe iruemwi ne ọ gbae. U keghi rhie Uhi ruẹ ne Mosis ne ọguọmwadia ruẹ, ne ọ viọ gie iran. Amẹ ke uwu okuta ladian vbe ohanmwẹ amẹ gbe iran.

¹⁴ U ma iran ẹre ne iran gha ya Ẹdẹ ikẹtin ru emwi ni huanrẹn u na rhie uhi ruẹ la obọ Mosis ne ọguọmwadia ruẹ gie iran.

¹⁵ “Ẹghẹ ne ohanmwẹ na gha gbe iran, u ke ẹrinmwi koko iran. U tue amẹ ke uwu okuta gie iran, vbe ovbamẹ gbe iran, u tama iran ne iran gha kha yan otọ nii, ne u yan yi wẹ u mu ne iran.

¹⁶ Sokpan avbe erhamwa odede ke gha hio iran na vbe ze vbe udu, iran ke ghi he ne iran họn ẹmwẹ ne uẹn.

¹⁷ Iran ma họn ẹmwẹ ne uẹn, iran mianmian emwi hia ne u ru iran mianmian iwinna ọyunnuan, ne u he winna hia. Vbe uwu itengbemu, iran zẹ olotu ọvbehe, ne ọ viọ iran dọlegbe gha rrie Igipt; sokpan, Osanobua ne ọ yabọ ọmwa ọ re uwu khin wẹ vuọn ne ẹsọhẹ kevbe ahoẹmwọmwa itohan ruẹn kpolo, u ma he iran ye otọ.

¹⁸ Iran ma amazẹ ne ọ yevbe ẹkhuia ẹmila. Iran na wẹ ọnọna ọ re Osanobua, ne ọ viọ iran ke otọ Igipt ladian u miẹn vbene iran yagha uwẹ hẹ, Nọyaẹnmwa!

¹⁹ Sokpan, wẹ ma sẹ iran rae ye ato vbe evba rhunmwuda, itohan ruẹn kpọlọ u ma rhie okuku nii ra erhẹn nii hinrre, ne ọ gha ma iran odẹ vbe avan kevbe asọn.

²⁰ Vbe uwu umamwẹ ruẹn wẹ tama iran emwi ne iran gha ru. U ya e mana koko iran, u na vbe sa amẹ ne iran wọn.

²¹ Ukpo iyeva vbe uwu ato, te u ye viọ emwi ne iran gualọ ne iran ukpọn iran ma yanghan, owẹ ma vbe hinmwian rhunmwuda obalọ.

²² “U rhie ẹtin ne iran yan avbe otọ kevbe arriọba, avbe otọ ne iran gba mwa uwu iran khọn mu otọe e Hesbọn, ehe ne Saihọn na khaemwisẹ kevbe otọ Basian. Ehe ne Ọg na re ọba.

²³ U viọ emọ nibun ne iran zẹvbe orhọnmwẹ ni rre iso iran khọn avbe ẹvbo nii, iran na vbẹ yin ẹnrẹn ne u yanrẹn i ghẹ u gha mu ne erha iran odede.

²⁴ Iran khọn otọ e Kenan. Obọ ruẹ gba emwa ni rre evba u rhie ẹtin ne emwa ruẹn. Ne iran gha ru vbene ọ khọn iran, vbe egbe emwa kevbe avbe ọba ọghe Kenan.

²⁵ Emwa ruẹn khọn avbe ẹvbo ne a gbe ekẹn gaa, otọe esiesi kevbe, owa ni vuọn ne emwi ẹfe, avbe uhae ne a fian ye otọ nẹ. Avbe erhan oliv, erhan ni mọ ọmọ kevbe avbe ogba azara iran rri evbare nẹ ọ khọn iran, iran na gha ti ye egbe, iran ke ya emwi ne u viọ ne iran gha ku obọ ye uwa.

²⁶ “Sokpan, emwa ruẹn sọtẹ, iran ma họn ẹmwẹ ne uẹn iran keghi fi iyeke gbe Uhi ruẹ, iran gbele avbe akhasẹ ni bu iran ude ni tama iran ne iran dọlegbe bu ruẹ gha dee iran kegha yagha a yan egbe yan egbe.

²⁷ Wẹ keghi gie eghian khọn iran, Ne iran vbe gha kha yan iran Iran na gha kha yan iran. Ọlọghọmwa ghi rre, iran keghi da tie ruẹ ne iyobọ U keghi wanniẹn iran ẹmwẹ ke ẹrinmwi rre. Vbe itohan ruẹn nọkhua, u gie olotu bu iran yo Iran keghi wọlọ iran hin obọ eghian rre.

²⁸ Ọfumwegbe ghi vbe se obọ nẹ, iran kevbe dọlegbe rukhọ ghe ruẹ wẹ kevbe gie eghian dọlegbe khọn iran, sokpan, iran ghi fiwerriẹ, iran na vbe rinmwian ne u miẹn iran fan, u keghi họn vbe ẹrinmwi, yan egbe yan egbe u keghi ya itohan fannọ iran vbe irri.

²⁹ U yan ma iran, ne iran gha ya emwi ne u ma iran ẹre yin, sokpan vbe uwu uhiomwẹ iran fi iyeke gbe uhi ruẹ, a gha rhe miẹn wẹ a rhie Uhi ruẹ lẹre ọkpa ọre uhunmwu agbọn ne ọ maa ye uhunmwu ibiba, kevbe ni ze vbe udu, iran he ne iran ya ẹe ru emwi.

³⁰ Ke ukpo dinna ukpo, u keghi ye izin egbe gha ma iran emwi u ru ẹe ne avbe akhasẹ ruẹ guan, sokpan emwa ruẹn keghi yin ehọ u keghi rhunmwuda ọnii rhie ẹghẹ ne ẹvbo ọvbehe ya khọn iran.

³¹ Sokpan, rhunmwuda ighẹ itohan ruẹn kpọlọ, u ma fi iyeke gbe ra ne u fuẹn iran an Osanobua ne ọ vuọn ne ẹsọhẹ ne ọ mwẹ itohan, ọre uwẹ khin.

³² “Osanobua, Osanobua mwa, a miẹn vbe u kpọlọ hẹ! ugborrirri ne ọ mwẹ ẹtin eyan ne u yan rẹn hia, u keghi ya ẹkoata mu ẹẹn sẹ ke ẹghẹ ne avbe ọba Asiria ya gha zẹ ima owẹ gha dee uhin do sẹ wanwanna, a miẹn oya ne ima he re. Avbe ọba mwa, avbe ọkaolotu, avbe ohẹn mwa kevbe avbe akhasẹ avbe erha mwa odede, kevbe emwa ima hia, ehia rri oya. Yerre vbene ima he rri oya sẹhẹ!

³³ Emwiesi ọ re u ru, ne u na rri ima oya wẹ wa gha mwẹ ekhọe esi, egbe ne ima ya ru orukhọ.

³⁴ Avbe erha mwa odede, avbe ọba mwa, ọkaolotu kevbe avbe ohẹn, ne ọ rhie Uhi ruẹ mwẹ i rrọ. Iran ma danmwehọ Uhi kevbe ibude ruẹ.

³⁵ Vbe ekpa afiangbe ruẹ, avbe ọba kegha kha yan emwa ruẹn. Vbe iran rre otọe ne ọ vbẹ aro, ne ọ maa emwiokọ, ne u mu ne iran, sokpan, iran ma fi iyeke gbe orukhọ ne iran do gha ga uwẹ.

³⁶ Banbanna nian, eviẹn ma ghi khin vbe otọe ne u mu ne ima otọe esiesi na, ne ọ rhie evbare ne ima.

³⁷ Emwi ne otọe mọ ladian, obọ avbe ọba ọ re ọ yo iran na uwẹ viọ yan ima rhunmwuda ne ima na rukhọ, iran ghi gha ru ima kevbe emwirri mwa, vbene ọ rhirhi a khọn iran. Uwu akhiẹ nọkhua ma ghi ye.”

Emwa Ni Rhie Obọ Ye Ebe

³⁸ Rhunmwuda avbe emwi na ni sunu hia, ma ne ivbi Izrẹl rhie obọ ye ebe nian vbe iro ne a zẹ gba, a keghi gbẹn ọẹn ye otọ, avbe ọkaolotu ima avbe Livai kevbe avbe ohẹn ima, keghi yi ẹre okhi.