Nehimaia 7 - Edo Bible (E Baibol Ẹdo) Version 1996

¹ Vbe ẹghẹ ne a ghi kha na nian, a gbe ekẹn ọlẹga nii fo nẹ, a vbe yi ẹkhu lele ehia nẹ, a vbe ghae iwinna iran ne iran nẹ ighẹ iran ni khẹ Ọgua Osa, avbe ọsian nihuanrẹn, kevbe avbe Livai nekpa.

² I keghi viọ arhin eva yọ ne iran gha khaemwisẹ yan Jerusalẹm, iran na kegha re ọtẹn mwẹ ne okpia ighẹ Hanani kevbe Hananaia ne ọkaokuo ne ọ gbearoghe odin ikhẹgbe. E Hananaia kegha re ọmwa ne ọ gie a muẹtinyan kevbe ne ọ vbe mu ohan Osanobua ne a i vbe miẹn egbọre ọvbehe.

³ I keghi tama iran wẹ ẹdẹ ma wan nẹ fẹẹrẹ, ne iran ghẹ gha kie urho e Jerusalẹm vbe owiẹ, kevbe wẹ, avbe iran ni khẹ odẹ te kpao vbe ota, a ghi khui ẹre, a ghi viọ avbe ogba ẹre kọ ẹe. I keghi vbe tama iran wẹ uwu emwa ni rre Jerusalẹm ọ re iran gha na zẹlẹ emwa ni khẹ odẹ, a ghi wa vbe rhie ehe ne dọmwadẹ ọghọe gha khẹ ne ẹẹn, kevbe nekpa, ne iran ya gha gbe ọrrẹrrẹ lẹga owa iran.

Eni Avbe Iran Ni Ke Iwe Rre

⁴ Ẹvbo ne ọ kpọlọ ọ re Jerusalẹm khin, sokpan, emwa ni rrọ ma gha bun, a ma he vbe bọlọ owa ni bun yọ.

⁵ Osanobua keghi rhie yọ mwẹ ekhọe wẹ ne I si avbe emwa nii koko, kevbe avbe ọkaolotu kevbe iran ni rre ukpo vbe uwu iran, ne I vbe ghe ebe uniẹn iran. I keghi gualọ ebe iran ni ka gha ke iwe rre miẹn, emwi ne I miẹn vbọ ọ re ọna khin:

⁶ Nibun vbe uwu iran ni ye iwe ni ghi kpao vbe otọe Babilọn rre, iran keghi dọlegbe gha die ẹvbo edọmwadẹ ọghọe vbe Jerusalẹm kevbe Juda. Ke ẹghẹ ne Ọba Nebukiadneza ya viọ iran oghunmwu kpao gha dee, otọe Babilọn ọ re ẹgbẹe iran na gha rre iwe.

⁷ Avbe ọkaolotu iran kegha re Zerubabẹl, Jọsua, e Nehimaia Azaraia, e Raamaia, e Nahamani, e Modekai, e Bilsian, e Mizpẹrẹt, e Bigvai, e Nehum kevbe Baana.

^8-25 Eni avbe ẹwae ivbi Izrẹl ke inu emwa ni ke iwe rre vbe dọmwadẹ ẹwae ọ re ena khin: E Parọs — evairrọgban ọre ọ ma gie ẹe gba vbe arria owọrọ (2,172) E Siefatia — erẹnrẹn irrọvbiyenẹ yan iyisẹn eha (372) Ara — erẹnrẹn irrọvbiyeha yan arria eha (652) E Pahat Moab (ivbi uniẹn e Jesua kevbe Joab) evairrọvbugie yan arria iwenẹ (2,818) E Ẹlam — ehan irrọvbiyeha yan arria ehan (1,254) E Zatu — isẹn yan iyeva yan arria enẹ (845) E Zakai — iyeva irrọvbe arriaenẹ (760) E Binnui — evairrọvbekigbe siyeha yan arria eha (648) E Bebai — evairrọvbọgban yan arriaeha (628) Azgad — evayanugie yan iyisẹn ọ re ọ ya yan arria owọrọ (2,322) Adonikam — ihinrọn yan iyehan yan arriaeha (667) E Bigvai — ihinrọn yan iyehan yan arria igbe (2,067) Adin — isẹn irrọvbiyehan yan arriaehan (655) Atẹ (rọẹn a vbe tie ẹre Hẹzekaia) evairrọvbiyisẹn (98) E Hasium — evairrọvbọgban yan iyisẹn eha (328) E Bezai — ene yan ugie yan iyisẹn eha (324) E Harif — iweva yan iyisẹn (112) E Gibiọn — isẹnirrọ vbe iyisẹn (95)

^26-38 Emwa eso ne avbe erha iran odede yin avbe ẹvbo na, vbe rre: E Bẹtlẹhẹm kevbe Nẹtofa — iweva irrọvbe uri (188) Anatọt — erẹnrẹn yan iyehan (128) Bẹt Azmavẹt — evayan iyeva (42) E kirriat Jearim, Kiefira kevbe Beẹrọt — eha yan ikiọkhọe yan arriaeha (743) E Rama kevbe Geba — ọkpa yan ugie yan arria eha (621) E Mikmas — evayan iyehan (122) E Bẹtẹl kevbe Ai — eha yan iyehan (123) E Nibo nọkpa — eva yan ekigbesiyeha (52) Ẹlam nọkpa — enẹ yan ekigbesiyeha yan arria ehan (1,254) E Harim — iyehan yan uri (320) E Jẹriko — isẹn yan ikiọkhọe yan uri (345) E Lọd, e Hadid kevbe Ono — ọkpa yan iyehan yan arriaehan (721)

^39-42 Uniẹn avbe ohẹn ni ke iwe rre ọ re ena khin: E Jedaia (ivbi uniẹn e Jesua) — ehairrọvbọgban irrọvbe arriaisẹn (973) Imẹ — eva yan ekigbesiyehan yan arria isẹn (1,052) E Pasiọ — ihinrọn yan iyeva yan arria ehan (1,247) E harim — ehairrọvbugie yan arria isẹn (1,017)

^43-45 Ẹwae avbe Livai ni ke iwe rre: E Jesua kevbe kadmiẹl (ivbi uniẹn e Hodavaia) ehan irrọvbiyenẹ (74) Ikpemaba Ọgua Osa (ivbi uniẹn Asaf) — erẹnrẹn yan ikiọkhọe (148) Iran ni khẹ Ọgua Osa (ivbi uniẹn e Sialọm, Atẹ, Talmọn, Akub, e Hatita kevbe Siohai) — evairrọvbe ikiọkhọe (138)

^46-56 Ẹwae iran ni winna vbe Ọgua Osa, ni ke iwe rre ọ re ena khin: E Ziha, e Hasufa, e Tabaot, e Keros, e Sia, e Padọn, e Lebana, e Hagaba, e Sialmai, e Hanan, e Gidẹl, e Gaha, e Reaia, e Rezin, e Nekoda, e Gazam, Uza, e Pasea, e Besai, e Meunim. e Nefusiasim, e Bakbuk, e Hakufa, e Hahọ, e Bazlit, e Mehida, e Hasia, e Bakos, e Siseria, e Tema, e Nezaia kevbe Hatifa.

^57-59 Ẹwae eguọmwadia e Solomọn ni ke iwe rre ọ re ena khin: E Sotai, e Soferet, e Perida, e Jaala, e Dakọn, e Gidẹl, e Siefatia, e Hatil, e Pokẹrẹt, e Hazẹbeim kevbe Amọn.

⁶⁰ Ivbi uniẹn iran ni winna vbe Ọgua Osa kevbe eguọmwadia e Solomọn, ni ke iwe rre kegha re erẹnrẹn irrọvbe arria eva (392).

^61-62 Iran eva yan iyeva, yan arria eha (642) kegha rrọ vbe ẹwae Delaia, Tobaia, kevbe Nekoda ni ke avbe ẹvbo ne a tie ẹre Tẹl Mela, Tẹl Hasia, e Kerub, Adọn kevbe Imẹ rre, sokpan iran ma sẹtin rhan otọ ẹre fo wẹ uniẹn ivbi Izrẹl ọ re iran khin.

^63-64 Avbe ẹwae ohẹn ne a ra sunu yi na ma miẹn ehe ne a gbẹnnẹ uniẹn ne iran khin yi, ne iran ya rẹn uniẹn ne iran khin: e Hebaia, e Hakọz kevbe Bazilai (Erha odede ọghe ẹwae ohẹn Bazilai keghi rhie okhuo vbe ẹwae Bazilai ne ọ rre Giliad, ọ keghi wa gha khuẹnniẹn eni erha amwẹ ọnrẹn. Rhunmwuda ne iran ma na sẹtin tae wẹ ghe uniẹn ne iran ke rre, a ma ghi kue ne iran gha ru ohẹn).

⁶⁵ Ovbi e Ju ne ọ re ne ọ khaemwisẹ keghi tama iran wẹ iran i ra sẹtin rri evbare ne a ya fi ohan gie Osanobua vbe ẹ i re te a miẹn ohẹn ne ọ guara lo Urim kevbe Tumin nẹ.

^66-69 Emwa ni wa ke iwe rre hia fẹẹrẹ kegha re iyeva irrọvbe arria eva ọ re o ya yan arria isẹn eva yan iyeva (42,360), eguọmwadia iran nikpia kevbe nikhuo kegha re eha yan iyeha irrọvbe arria eva yan arria isẹn ihinrọn (7,337) Ikpemaba nikpia kevbe nikhuo — isẹn yan iyeva, yan uri (245) Avbe ẹsin — enẹ yan iyeha irrọvbe arriaenẹ (736) Ẹmila — isẹn yan iyeva yan uri (245) E kamẹl — isẹn yan ọgban yan arria eva (435) Ekẹtẹkẹtẹ — iyeva-irrọ vbe arria enẹ yan arria ehan (6,720)

^70-72 Emwa ni bun wa zẹ igho ne a ya dọlọ yi, iran ọ re: Uwan ne kherhe ọghe igoru ekigbesẹ iyi enẹ yan uri (270) avbe ọkpan iruemwi — ekigbesiyeha (50) ẹwu avbe ohẹn — ọgban yan iyisẹn isẹn (530) Ekaẹgbẹe avbe ẹwae — uwan nọkhua ọghe igoru ehairrọvbe iyeva yan iyisẹn eha (337) uwan nọkhua ọghe esiliva — ekesugie yan uri, yan arria isẹn eha (3,215) E Sena — ekigbesiyenẹ irrọvbe arria isẹn enẹ (3,930) Nọkhaemwisẹ Emwa nekpa hia: uwan nọkhua igoru — eha irrọvbe iyeva yan iyisẹn eha (337) uwan ne giere ọghe esiliva — eha yan ugie, yan iyisẹn ọkpa irrọvbọgban (2,923) ẹwu avbe ohẹn — ehairrọvbe ekigbesẹ iyi enẹ (67)

⁷³ Avbe ohẹn, avbe Livai, iran ni khẹ Ọgua Osa, avbe ikpemaba, ni bun vbe uwu avbe emwa kẹkan, iran ni winna vbe Ọgua Osa avbe ivbi Izrẹl hia, ehia keghi wa mu igiogbẹ gbọ ye avbe okpẹvbo kevbe ore nekhua vbe Juda.