Nehimaia 6 - Edo Bible (E Baibol Ẹdo) Version 1996

Iran Khuan Khẹ Nehimaia

¹ E Sanbọlat, e Tobaia, e Gesiẹm kevbe avbe eghian mwa nekpa keghi họn wẹ ma gbe ekẹn ọlẹga nii fo nẹ, kevbe wẹ ẹkpo i ghi rrọ, a gha rhe miẹn wẹ, a ma he yi ẹkhu ye onurho ni rrọọ.

² Ẹre Sanbọlat kevbe Gesiẹm na gie ne a khama mwẹ wẹ ne imẹ do miẹn iran vbe ihọkpa vbe uwu avbe igue ni rre otọ Ono. Uma ne iran te si ne iran ya kuan mwẹ ọ re ọ na khin.

³ Mẹ keghi gie ne a tama iran wẹẹ, “Iwinna kpataki rrọ mwẹ obọ nẹ I winna, rhunmwuda ọnii, mẹ i ra sẹtin yo odọ. Mẹ I ra wẹ ne a dobọ iwinna yi rhunmwuda ighẹ I ra gha dee do miẹn uwa.”

⁴ Iran keghi gie uhunmwu ọkpa ni gunmwẹ igba enẹ, vbe uwu ehia nii, ewanniẹn ọkpa nii ọ re I rhie gie iran.

⁵ Ẹre Sanbọlat na gie ọkpa vbe uwu avbe eguọmwadia ẹre bu mwẹ gha dee, ọ na gie uhunmwu nogisẹn ye ebe ne a ma khui ne ẹẹn rhie gunmwẹ.

⁶ Ọ wẹẹ, “E Gesiẹm tama mwẹ, iran tae khian vbe ẹvbo hia ni lẹga wẹ te uwa ne Ju ho ne uwa sọtẹ, ọnii ọ sii ẹe ne uwa na dọlegbe gbe ekẹn ọlẹga nii. Ọ vbe tae wẹ, te u ho ne u ma egbe ruẹ ọba.

⁷ Kevbe wẹ, u viọ avbe akhasẹ eso ye otọ nẹ ne iran tae vbe Jerusalẹm wẹ, wẹ ọrọre ọba ọghe Juda. Ẹ i mwẹ Umogun ma họn ẹmwẹ na, rhunmwuda ọnii, I zẹẹ ọẹ vbe iro wẹ ne imẹ vbe ruẹ miẹn egbe ne a tae vbene emwi na hia ye hẹ.”

⁸ I ke rhie ewanniẹn gie ẹe wẹẹ, “Emwi ne u tae na hia, ọkpa ne ọ re emwata i rrọọ. Wẹ ọ wa tobọ zẹ ehia ta.”

⁹ Iran keghi te gha ho ne iran runran ima ne ima zẹ iwinna ni obọ. I keghi na erhunmwu wẹẹ, “Sokpan, banbanna nian, Osanobua, rhie iwegbe mẹ!”

¹⁰ Vbe uwu ẹghẹ na I keghi ya tuẹ e Siemaia ne ovbi e Delaia, eyẹ Mehetabẹl, ne ọ ma sẹtin kpao vbe owa ẹre rre. Ọ keghi tama mwẹ wẹẹ, “Gie imẹ vbe ruẹ ya lẹre ye Ehe Nọhuanrẹn ọghe Ọgua Osa, ne a khui urho, rhunmwuda, iran de ra do gbe ua. Iran gha rre vbe asọn ne ọ rhirhi a gha khin nian ne iran do gbe ua.”

¹¹ Mẹ keghi wanniẹn wẹẹ, “Mẹ i re okpia ne ọ lẹ fua ya gha lẹre. Wẹ yayi wẹ mẹ gha ya lẹre ye uwu Ọgua Osa ne I ghẹ miẹn ehe na wu? I i ruẹe.”

¹² I ghi roro ẹe yo, roro ẹe rre, I keghi do miẹn wẹ, Osanobua ma zẹdẹ gu e Siemaia guan, sokpan wẹ e Tobaia kevbe Sanbọlat ọre ọ rhie igho abọtọ gie ẹe ne ọ gunmwẹ zẹ egbe iro vberriọ.

¹³ Iran dẹ ọe ne ọ ha mwẹ fi orukhọ, ne iran miẹn ehe na sa ọrho yọ mwẹ ukpọn, ne iran so mwẹ gọ.

¹⁴ I keghi na erhunmwu wẹẹ, “Osanobua, ghe emwi ne Tobaia kevbe Sanbọlat ru, ne u rri iran oya. Vbe ye okhuo ni rre ighẹ Nodaia kevbe avbe akhasẹ nekpa, emwa ni te gha ho ne iran ha mwẹ.”

Ufomwẹ Iwinna Ni

¹⁵ A ghi ya ikpẹdẹ evayan ekigbe siyeha winna nẹ, a keghi gbe ekẹn ni fo vbe ikpẹdẹ ekesọgban ọghe uki Elul.

¹⁶ Avbe eghian mwa ni rre ẹvbo ni lẹga ghi họn vberriọ, ekhue keghi mu iran, rhunmwuda, dọmwadẹ ọghọe rẹnrẹn wẹ iyobọ Osanobua ọ re a ya winna iwinna na.

¹⁷ Vbe ẹghẹ na hia, avbe ọkaolotu e Ju kevbe Tobaia wa gha gbẹnnẹ ebe gie egbe.

¹⁸ Emwa ni bun vbe Juda keghi vbe deba ẹre rhunmwuda orruan rẹn ne ọ re Ju ighẹ Siekanaia ne ovbi Ara. Ye vbe sẹ ọnii, ovbi ẹre ighẹ Jehohanan keghi vbe rhie ovbi ẹre nokhuo rọnmwẹ ighẹ Mẹsiulam ne ovbi e Berakia.

¹⁹ Emwa ghi do gha sirra mwẹ ta emwi esi hia ne Tobaia he ru, iran ghi vbe gbẹngbẹn ẹmwẹ ne I tae hia ma rẹn. Rẹn kegha gbẹnnẹ ebe gunmwẹ ne ọ ya gha ha mwẹ.