Nehimaia 5 - Edo Bible (E Baibol Ẹdo) Version 1996

Iran Zẹ Avbe Ivbiogue Kpokpo

¹ Ọ ghi kpee fua kherhe, ni bun vbe uwu avbe emwa ni, ikpia kevbe ikhuo avbe Ju ne ihua iran.

² Eso kegha kha wẹẹ, “Ma mwẹ emwa nibun vbe ẹgbẹe ima, te ima gha gualọ evbare ne ima miẹn ehe na sẹtin gha rre agbọn.”

³ Emwa ọvbehe eso kevbe kha wẹẹ, “Te ima gha mu otọ ima ye agbeghae, deba ogba azara ima, kevbe owa ima ne ohanmwẹ ghẹ miẹn ehe na gbe ima.”

⁴ Emwa ọvbehe eso kevbe kha wẹẹ, “Te ima gha mọmọ igho ya ha osa ne a hae ne ọba ye ugbo kevbe ogba azara.

⁵ Ivbi agbọn ẹvbo ọkpa ọ re ima vbe avbe Ju ne ihomwa gba khin. Vbene ivbi iran maa sẹ ọ re ivbi ima vbe maa sẹ. Sokpan te ima ya ivbi ima ru ọviẹn. A khiẹnnẹ eso vbe uwu ivbi ima nikhuo eviẹn nẹ. Ọghe ima fo rhunmwuda, a miẹn ima ugbo kevbe ogba azara mwa.”

⁶ I ghi họn ẹzọ ne iran gui, ohu keghi mu mwẹ.

⁷ I keghi ta ku avbe ọkaolotu kevbe iran ni rre ukpo vbe uwu iran, I na tama iran wẹẹ, “Wa ghẹ zẹ etẹn uwa kpokpo.” I keghi tie iko ọgbakha ne iran do guan ye ẹmwẹ na,

⁸ I tama iran wẹẹ, “Te ima hia vbene ẹtin mwa sẹe, ne a ya gha dẹlẹ iran werriegbe ighẹ avbe Ju ni khiẹnnẹ egbe iran eviẹn ne avbe orhunmwuyẹn, wanwanna nian, te uwa ghi sua avbe etẹn uwa ne iran gha khiẹnnẹ egbe iran ne uwa ne Ju ne ihua iran.” Avbe ọkaolotu nii keghi hunwan kpọi, iran ma miẹn ẹmwẹ ta.

⁹ Ẹre imẹ ghi na kha wẹẹ, “Emwi ne uwa ru na i maa. Ọ te kei ne uwa yọghọ ne Osanobua, ne uwa ru emwi ne ọ kere. Ẹghẹ nii, wa ghẹ i rhie otọ ne avbe eghian mwa, iran ne ẹ i re Ju, ne iran ya gha zan mwa.

¹⁰ Mẹ gie avbe emwa ne a mọmọ igho kevbe ọka vbe obọ mwẹ, rhunmwuda ọnii, te I ghi mwẹ ivbi otu kevbe emwa ni winna mẹ. Banbanna nian, wa gie a ya ehia ma iran, ne iran ghẹ ghi ha osa.

¹¹ Wa ya emwi ne iran rri osa ẹre hia ma iran igho ra ọka ra ayọn ra ofigbọn oliv. Wa vbe fannọ emwi iran hia ne iran vbene a wa tae na, ugbo, ogba azara, ogba oliv kevbe owa!”

¹² Avbe ọkaolotu ni keghi kha wẹẹ, “Ma gha ru vbene u khare ma gha viọ avbe emwi iran ne iran, ma i ghi vbe si iran osa.” I keghi tie avbe ohẹn, I na wẹ ne avbe ọkaolotu vẹn ihẹn vbe sirra iran wẹ, iran gha ru vbene iran khare.

¹³ I keghi ban ọza ne I mu gba ẹkun I na bọnmwẹ ọẹn, I na kha wẹẹ, “Vbe nian ọ re Osanobua ra bọnmwẹ uwa ne ẹ i mu eyan ne uwa yanrẹn sẹ. Osanobua gha miẹn uwa owa kevbe emwi ne uwa mwẹ hia, ẹ i vbe sẹ emwiọkpa rae ne uwa.” Emwa hia ni rre evba keghi kha wẹẹ, “Isẹ.” Iran keghi rho e Nọyaẹnmwa. Avbe ọkaolotu keghi vbe ru vbene iran yan rẹn.

Nehimaia Ne Ọ Rẹn Ne Ọmwa

¹⁴ Vbe ukpo iweva ne I ya gha re ne ọkhaemwisẹ yan e Juda, ke ukpo ne ọ gba vbe ugie ne Atakzaziz ya gha re ọgbaisi, ya sẹ ukpo eva yan ọgban ne ọ ya ẹe, ke imẹ kevbe etẹn mwẹ, ne ọ rri evbare ne ọ khẹke mwẹ zẹ vbe ne ọkhaemwisẹ, ẹ i rrọọ.

¹⁵ Iran hia ni gha re ne ọkhaemwisẹ ọ te do sẹ mwẹ egbe, ihẹ ọ re iran gha khin ne emwa nii, iran kegha miẹn iran igho esiliva iyeva vbe ẹdẹ zẹ vbe igho evbare kevbe ọghe ayọn. Uhin ighẹ te eguọmwadia iran gha sẹ emwa ni usẹ. Sokpan, I ma ru vberriọ, rhunmwuda, te I ya ọghọ ne Osanobua.

¹⁶ I na mu aro da ekẹn nii ne a gbe, I ma vbe si ẹfe gha koko. Emwa hia ni winna mẹ keghi vbe deba iwinna ekẹn nii ne a gbe.

¹⁷ Emwa ne imẹ gha koko, ra ne I gha rhie evbare na vbe eteburu mwẹ kegha re igbe yan ikiọkhọe (150) vbe ivbi e Ju kevbe avbe ọkaolotu iran, vbene a ma na ka avbe emwa ni ke ẹvbo ni lẹga ima bu mwẹ gha dee yọ.

¹⁸ Emwi ne I ya koko iran vbe ẹdẹ kegha re ẹmila ọkpa, ohuan ehan ne egbe maa sẹẹ, kevbe ọkhọkhọ ni bun. Ikpẹdẹ igbigbe ọ re I ya dọlegbe mu ayọn ọgbọn ladian ne iran. Sokpan I rẹn ihẹ ọrhẹnrhẹn ne emwa ni mu, rhunmwuda ọnii, I ma vbe wẹ ne iran gha ha mwẹ osa zẹ vbene ọ khẹke ne ọ khaemwisẹ.

¹⁹ Osanobua, lahọ, u ghi ye mwẹ rre vbe ne ọ maa, vbe ekpa emwi hia ne I ru ne avbe emwa na.