Nehimaia 4 - Edo Bible (E Baibol Ẹdo) Version 1996

Obọ E Nehimaia Ke Okhunmwu Ne Iran Ni Gbodan Ye Iwinna Rẹn

¹ E Sanbọlat ghi họn wẹ ma ne Ju suẹn gha dọlọ ekẹn nii bọ nẹ, ohu dan keghi mu ẹẹn, ọ na suẹn gha ya ima gbe ogiẹ.

² Ọ kegha tae vbe odaro ihua ẹre kevbe ivbiyokuo e Sameria wẹẹ, “De emwi ne avbe Ju ne ẹwobi emwa wẹ iran ru na yi. Te iran ya dọlegbe bọ ẹvbo nii ra? Te iran ro ighẹ iran gha sẹtin la ekpa ese ne a zọ winna iwinna nii fo ẹdẹ ọkpa ra? Iran gha sẹtin ya iku ne ọ giẹn uan ru okuta ne a ya bọ owa ra?”

³ E Tobaia ne ọ mudia ke ẹe vbe evba keghi nọ wẹẹ, “Vbọkhun ekẹn ne ena ra sẹtin gbe yi, uhin ighẹ te umuọkhọkhọ sẹtin rrua ẹre gbotọ.”

⁴ Mẹ keghi na erhunmwu wẹẹ, “Họn vbene iran ya ima gbe ogie hẹ, Osanobua. Gie ogie ne iran gie ima ẹre vbiẹ iran tobọ iran egbe. Gie oyi hẹ emwi ne iran mwẹ hia, ne a vbe viọ iran oghunmwu gha rrie ẹvbo ẹrrẹ.

⁵ Ghẹ ye emwi dan ne iran ru bọ iran, ghẹ vbe mian mian orukhọ iran rhunmwuda ne iran na gha rhovbiẹ ima ni gbe ekẹn na.”

⁶ Rhunmwuda ọnii, ma kegha gbe ekẹn nii khian, wanwanna, ọ keghi sẹ ukhiọnmwẹ uyomwẹ ọnrẹn rhunmwuda ọ ke wa rre emwa nii ekhọe ne iran winna.

⁷ E Sanbọlat, e Tobaia kevbe ivbi Arebia, Amọn kevbe Asdọd keghi họn wẹ ma wa ya nene ekẹn ne a gbe khian; ekẹn e Jerusalẹm, kevbe wẹ, ẹkpo nii rre ekẹn ni, te a ghi do gha gbe ẹe vba egbe, ohu keghi mu iran ẹsẹse.

⁸ Iran keghi rhunmwuda ọnii koko si uma wẹ ne iran do khọn Jerusalẹm ne iran miẹn ehe na mu olighi yọ.

⁹ Sokpan ma keghi na erhunmwu ghe Osanobua ima, ma na viọ emwa yọ ne iran gha baba iran ke avan kevbe asọn.

¹⁰ Ivbi e Juda mwẹ ihuan ọkpa ne iran gha so wẹẹ: “Egbe ihẹ ne a mu wọ mwa, iku ne a ra hẹ kua gba erhan gba irri vbe ima ra ya sẹtin gbe ekẹn na hẹ ẹrẹna?”

¹¹ Avbe eghian mwa keghi te gha ro wẹ ma i ra bẹghe iran, ra ma i ra rẹn, iran te do hẹ rhu mwa, ne iran gbele ima an, ne iran da obọ iwinna mwa yi.

¹² Sokpan avbe Ju ni rre uwu ẹbu avbe eghian mwa kegha ya ẹmwẹ ha ima ehọ kugba kẹghẹre vbene avbe eghian khuan khẹ ima hẹ.

¹³ Rhunmwuda ọnii, I keghi viọ emwi igbinna, avbe umozo, asoro kevbe uhanbọ ne emwa nii, I na ghae iran ye dọmwadẹ ẹwae lele iyeke ekẹn nii vbe ehe ne a ma hẹ na gbe ẹe fo.

¹⁴ I ghi miẹn wẹ afianma fian iran, I keghi tama iran, kevbe avbe olotu iran ke emwa ni rre ukpo vbọ wẹẹ, “Wa ghẹ gie ohan avbe eghian ima mu uwa, wa yerre vbene Nọyaẹnmwa kpọlọ hẹ kevbe vbene ọ gbe orrirri hẹ ne uwa gbinna ne ivbi ẹvbo uwa kevbe avbe ivbi uwa, amwẹ uwa kevbe owa uwa.”

¹⁵ Avbe eghian keghi họn wẹ ma rẹn nẹ wẹ iran khuan khẹ ima, ọ na vẹ ne iran rẹn wẹ Osanobua duẹ uma ne iran si ua nẹ. Ẹre ima hia ghi na werriegbe ya gha gbe ekẹn ni khian.

¹⁶ Ke ẹghẹ nii kpao, obọkpa vbe emwa kegha winna, obọkpa vbọ keghi ya gha ba odẹ, vbe ne iran na viọ ẹwu ematọn yọ, iran na viọ asoro, asa kevbe uhanbọ ya mu egbe igbinna. Avbe ekaolotu ima keghi wa mudia ye emwa ni iyeke gbangbaangban

¹⁷ ighẹ iran ni gbe ekẹn. Uhin wẹ avbe iran ni gbe ekẹn, iran gha mu emwi iwinna ye obọ ọkpa, iran ghi ya obọ nọkpa mu emwi igbinna mwẹ.

¹⁸ Dọmwadẹ ọghọe vbe iran ni gbe ekẹn keghi vbe mu umozo gba ye ẹkun. Ọmwa ne ọ gha fian okpe re keghi mudia ke mwẹ.

¹⁹ I keghi tama emwa ni kevbe avbe olotu iran kevbe iran ni rre ukpo vbe wẹẹ, “Iwinna na la erhan la irri sẹrriọ wẹ te ima wa mu egbe vbe uhunmwu ekẹn. Wa gha họn urhu okpe.

²⁰ Wa ghi bu mwẹ gha dee, Osanobua mwa gha gbinna ne ima.”

²¹ Ẹre a na miẹn wẹ ke owiẹ ya sẹ ẹghẹ ne avbe orhọnmwẹ ya ladian, obọkpa vbe uwu ima gha winna gbe ekẹn, obọkpa ghi viọ asoro mwẹ ya gha khẹ odẹ.

²² Ẹghẹ na, I keghi tama emwa hia ne a mu iwinna ni ye ọre obọ wẹ ne iran hia kevbe iran ni yi iran obọ gha mudia vbe Jerusalẹm vbe asọn, ne ima miẹn ehe na gha khẹ ore ẹvbo nii vbe asọn, ne a vbe gha winna vbe avan.

²³ Ẹghẹ ne I ya ban ukpọn ye otọ I zẹdẹ rrọọ, ọ gha khọnrẹn ne ọ gha re asọn, erriọ vbe nọ ne avbe ihua mwẹ, kevbe eguọmwadia mwẹ ra iran ne avbe ọkpọmwa mwẹ. Ma hia keghi viọ emwi igbinna ima mwẹ obọ.