Nehimaia 3 - Edo Bible (E Baibol Ẹdo) Version 1996

A Dọlọ Ekẹn Jerusalẹm Gbe

¹ Vbene a ya dọlọ ekẹn ne ọ lẹga ẹvbo nii bọ hẹ ọ re ọna khin, Eliasib ne Ogie Ohẹn kevbe ohẹn ne ihua ẹre keghi dọlọ Onurho Ohuan bọ, iran keghi ya ẹe fi ohan iran vbe yi ẹkhu yọ. Iran na ya ekẹn ọnrẹn fi ohan ya sẹ Owa ọkhẹ iran ne iyisẹn kevbe Owa ọkhẹ ọghe Hananẹl.

² Ivbi e Jẹriko keghi bọ ako ne ọ diake ẹe, e Zakọ ne ovbi Imri keghi bọ ako ne ọ diake ẹe.

³ Ẹwae Hasenaa keghi bọ Onurho Ehẹn, Iran keghi mu egbaha kevbe ẹkhu ye ihẹ iran, iran keghi vbe mu asigbe kevbe ogba yọ ne a ya gha khui ẹre.

⁴ E Meremot ne ovbi Uraia kevbe eyẹ ọghe Hakọz keghi bọ ako ne ọ diakẹe. E Mẹsiulam ne ovbi Berakia kevbe eyẹ Mesiezabel keghi bọ ako ne ọ diakẹe. E Zadọk ne ovbi e Baana keghi bọ ako ne ọ diake ẹe.

⁵ Emwa ni rre Tẹkoa ọ re ọ bọ ako ne ọ diake ẹe sokpan, iran ni hiunsi vbe ẹvbo ni ma winna iwinna ne a ye ẹtin ru ne avbe ekaolotu mu ne iran.

⁶ E Jehoiada ne ovbi e Pesea kevbe Mẹsiulam ne ovbi e Besodia keghi dọlọ Onurho Jesiana yi. Iran keghi mu egbaha yọ kevbe ẹkhu ye ihẹ ẹre, iran keghi mu asigbe kevbe egba ne a ya khui onurho nii yọ.

⁷ E Melataia ne ovbi ẹvbo ne a tie ẹre Gibiọn e Jadọn ne ọ ke Meronot rre, kevbe ivbi e Gibiọn kevbe Mizpa keghi bọ ako ne ọ diake ẹe ya sẹ owa ọghe enọkhaemwisẹ Orrie Yufretes.

⁸ Uziẹl ne ovbi e Harhaia ne ọ re ogun ẹrọnmwọ, keghi bọ ako de ọ diakẹe. E Hananaia ne ọ ru ori nọwinhin keghi bọ ako ne ọ diake ẹe ya sẹ Ekẹn ne Gbadaa.

⁹ Refaia ne ovbi e Họ ne ọ re ne ọ kha yan obọkpa vbe otọ Jerusalẹm keghi bọ ako ne ọ diake ẹe.

¹⁰ E Jedaia ne ovbi e Harumaf, keghi bọ ako ne ọ diake ẹe ne ọ wa vbe sikẹ owa irẹn. E Hatus ne ovbi e Hasiabneia keghi bọ ako ne ọ diakẹe.

¹¹ E Malkija ne ovbi e Harim kevbe Hasiub ne ovbi e Pahat Moab, keghi bọ ako ne ọ diake ẹe kevbe Owa ọkhẹ Aroewu.

¹² E Sialọm ne ovbi Halohes, ne ọ kha yan obọ nọkpa otọ Jerusalẹm keghi bọ ako ne ọ diake ẹe (Ivbi ẹre nikhuo wa gue ẹe winna vbọ).

¹³ E Hanun kevbe iran ni rre Zanoa keghi bọ Onurho Iya. Iran keghi yi ẹkhu ye ihẹ ẹre, iran keghi viọ asigbe kevbe ogba yọ ne a ya khui ẹre, iran keghi vbe dọlọ ekẹn ni yi ya sẹ ibata iyisẹn ekesugie (1,500) rhinrin ya sẹ Onurho Otiku.

¹⁴ E Malkija ne ovbi e Rakab, ne ọ kha yan otọ Bẹthakiẹrọn keghi bọ Onurho Otiku. Ọ keghi yi ẹkhu yọ, ọ na viọ asigbe kevbe ogba yọ ne a ya gha khui onurho nii.

¹⁵ E Sialọm ne ovbi e Kọlhozẹ ne ọ kha yan otọ Mizpa keghi bọ Onurho Ẹzẹ. Ọ keghi ran onurho ne ọ rrọọ, ọ mu ẹkhu yọ, ọ kevbe viọ asigbe kevbe ogba yọ. A ghi vbe sẹ Ọghọdọ e Siẹla, ọ kevbe gbe ekẹn ne ọ diake ovbiugbo Ọba rhinrin ya sẹ ikpa owẹ ni ke Ẹvbo e Devid dee.

¹⁶ E Nehimaia ne ovbi Azbuk ne ọ kha yan obọkpa vbe otọ e Bẹtzọ keghi bọ ako ne ọ diake ẹe, ya sẹ idin e Devid, ọghọdọ kevbe agọ ivbiyokuo.

Avbe Livai Ni Winnaẹn Vbe Ekẹn Ni

¹⁷ Avbe Livai na ọ re ọ bọlọ ako ni bun ni lele ẹe. E Rehum ne ovbi e Bani ọ re ọ bọ ako ne ọ lele ẹe. E Hasiabaia, ne ọ khaemwisẹ yan obọkpa vbe otọe Keila keghi bọ ako ne ọ lele ẹe vbe eni ẹvbo ẹre.

¹⁸ E Bavai ne ovbi e Hanadad ne ọ khaemwisẹ yan obọ nọkpa vbe Otọe Keila keghi bọ ako ne ọ lele ẹe.

¹⁹ Ẹzẹ, ne ovbi e Jesua, ne ọ khaemwisẹ yan Mizpa keghi bọ ako ne ọ lelẹe ne ọ rre odaro ehe ne a viọ emwi igbinna yi, rhinrin ya sẹ ehe ne ekẹn ke vbokho egbe ghe ehe ọvbehe.

²⁰ E Barọk ne ovbi e Zabai keghi bọ ako ne ọ lele ẹe rhinrin ya sẹ onurho owa Eliasib ne Ogie Ohẹn.

²¹ E Meremot ne ovbi Uraia kevbe eyẹ ọghe Hakọz keghi bọ ako ne ọ lelẹe rhinrin ya sẹ ufomwẹ owa Eliasib.

Avbe Ohẹn Ni Winnaẹn Vbe Ekẹn Ni

²² Avbe ohẹn na ọ re ọ bọ avbe ako ni bun ni lele ẹe. Avbe ohẹn ni ke ọkpẹn Jerusalẹm rre, ọ re ọ bọ ako ne ọ lele ẹe,

²³ E Bẹnjamin kevbe Hasiub keghi bọ ako ne ọ lele ẹe ne ọ rre odaro owa iran; Azaraia ne ovbi e Maaseia kevbe eyẹ Ananaia keghi bọ ako ne ọ lele ẹe ne ọ vbe rre odaro owa irẹn.

²⁴ E Binnui ne ovbi e Henadad keghi bọ ako ne ọ lele ẹe ke owa Azaraia kpao ya sẹ igọgọ ekẹn ni,

^25-26 E Palal ne ovbi Uzai keghi bọ ako ne ọ lele ẹe kevbe igọgọ ekẹn kpao deba owa ọkhẹ ne ọ yo ọghe ẹguae ne ọ ke uwu ẹre vbe ọkpẹn ore iran ni khẹ odẹ. E Pedaia ne ovbi e Parọs ọ re ọ bọ ako ne ọ lele ẹe ya sẹ ihọkpa vbe odẹ ahọ vbe ọkpẹn Onurho Amẹ kevbe owa ọkhẹ ne ọ yo, ne ọ khẹ Ọgua Osa (ọna keghi sikẹ obọ ne a tie ẹre Ofẹl vbe ẹvbo ni, ehe ne iran nii winna vbe Ọgua Osa dia).

Emwa Ọvbehe Ni Winnaẹn

²⁷ Emwa Tẹkoa ọre ọ bọ ako ne ọ lele ẹe, ọna ọ re ogieva ne iran bọe, ọ keghi mu aro da owa ọkhẹ ne ọ yo, ne ọ khẹ Ọgua Osa rhinrin ya sẹ ekẹn Ofẹl.

²⁸ Avbe ohẹn eso keghi kugbe bọ ako ne ọ lele ẹe ke Onurho kpao la ghe odẹ okuọ, edọmwadẹ ọghọe keghi bọ odaro owa ẹre.

²⁹ E Zadọk ne ovbi Imẹ keghi bọ ako ne ọ lele ẹe, ne ọ vbe rre odaro owa ẹre. E Siemaia ne ovbi e Siekanaia ne ọ khẹ Onurho Ahọ, keghi bọ ako ne ọ lelẹe.

³⁰ E Hananaia ne ovbi e Sielemia, kevbe Hanun ne ovbi e Zalaf ne ukpogiehan, bọ ako ne ọ lele ẹe, ọna ọ re ne ukpogieva ne ọ bọe. E Mẹsiulam ne ovbi e Berakia keghi bọ ako ne ọ lele ẹe, ne ọ wa rre odaro owa ẹre.

³¹ E Malkija ne ogun igoru keghi bọ ako ne ọ lele ẹe rhinrin ya sẹ owa ne iran ni winna vbe Ọgua Osa, kevbe iran ni do ẹki gba lo. Ọna keghi rre Onurho Mifkad ọghe Ọgua Osa, vbe ọkpẹn ughugha ne ọ rre odukhunmwu igọgọ ekẹn vbe obọ ne ọ mughe ẹkpo okuọ kevbe ahọ.

³² Avbe ogun igoru kevbe iran ni do ẹki keghi bọ ako ne ọ lele ẹe ke ughugha ne ọ rre igọgọ kpao ya sẹ Onurho Ohuan.