Nehimaia 2 - Edo Bible (E Baibol Ẹdo) Version 1996

E Nehimaia Kpao Gha Rrie Jerusalẹm

¹ Ọ ghi sẹ ẹdẹ ọkpa vbe uki enẹ ghi gberra nẹ, Atakzaziz ne Ọgbaisi ghi rri evbare, I na sa ayọn mu gie ẹe. Ọ ma he miẹn mwẹ vbe uwu akhiẹ vberriọ ẹdẹ,

² Rhunmwuda ọnii, ọ keghi nọ wẹẹ, “Vbọzẹ ne ekhọe ruẹ na rhia sẹrriọ yi? U i khuọnmwi, iyayi ighẹ uwu akhiẹ ọ re u ye.” Ohan keghi mu mwẹ.

³ Rhunmwuda ọnii, I keghi wanniẹn wẹẹ, “U gha tọ u kpẹre Umogun, vbọzẹ ne ekhọe mwẹ i ra na rhia ugbẹn vbe a miẹn wẹ ẹvbo ne a re avbe erhamwẹ odede yi, a rẹnkhọn ruan, a keghi ya erhẹn giẹn urho ne ọ rrọọ?”

⁴ Ọgbaisi keghi nọ wẹẹ, “De emwi ne u ghi ho nian?” I keghi na erhunmwu ghe Osanobua Ẹrinmwi, iyeke ọnii,

⁵ I na tama ọgbaisi wẹẹ, “A deghẹ I miẹn aro ne ọ maa vbe obọ ruẹ, Umogun, u na vbe wẹ u gha rhie emwi ne I nọrẹn mẹ, gun mwẹ gha rrie Juda, ẹvbo nii ne a ree avbe erha mwẹ odede yi, ne I ya dọlọ ẹvbo nii bọ.”

⁶ Ehe ne ọgbaisi na tota ni, amwẹ ọnrẹn kevbe tota ke ẹe, ọ keghi yobọ ye emwi ne I nọ rẹn. Ọ keghi nọ mwẹ vbene I gha kpee sẹ hẹ, ke ẹghẹ ne I gha ya werriegbe rre, I na tama rẹn.

⁷ I keghi nọ rẹn wẹ ne ọ gun mwẹ wa miẹn aro ne ọ maa vbe obọ ẹre, ne ọ gbẹnnẹ ebe mẹ viọ gie avbe ni khaemwisẹ vbe otọ Orrie Yufretes wẹ ne iran gunmwẹ gha rrie Juda.

⁸ I keghi vbe nọ wẹ ne ọ gbẹn ebe mẹ rhie gie Asaf ne ọ gbearoghe ẹgbo ọba, ne ọ khama rẹn wẹ ne ọ viọ erhan mẹ ne I ya kan ẹkhu onurho odin ne ọ degue Ọgua Osa, deba ọghe ekẹn ne a gbe lẹga ẹvbo kevbe owa ne imẹ ra dia. Ọgbaisi keghi wa viọ emwi ne I nọrẹn hia mẹ rhunmwuda, Osanobua gun mwẹ rrọọ.

⁹ Ọgbaisi na viọ avbe ọkaolotu ivbiyokuo eso mẹ deba ọka iran ni hin ẹsin ọkpa. Ọ re I na gha rrie Orrie Yufretes. I ghi sẹ evba, I na viọ avbe ebe ne ọgbaisi gbẹnnẹ nii ne avbe ni khaemwisẹ.

¹⁰ Sokpan, e Sanbọlat ne ovbi ẹvbo ne a tie ẹre Bẹt Horọn kevbe Tobaia ne ọ vbe rre asẹ vbe otọ Amọn ghi họn wẹ orhiọnkpa rre ne ọ do ru emwi ne ọ gha ma ivbi Izrẹl egbe, ohu dan kegha mu iran.

¹¹ Mẹ kegha rrie Jerusalẹm. Vbe ikpẹdẹ eha,

¹² I ma tama ọmwa rhọkpa, emwi ne Osanobua rhie yọ mwẹ ekhọe ne I do ru ne Jerusalẹm. Ẹre ọ ghi na sẹ ogiasọn, I keghi guakpao, I na viọ ihua mwẹ eso ba egbe ladian. Ẹsin ne imẹ hinrin ọkpa ọ re ọ gha re aranmwẹ ne ima mu gha khian.

¹³ Asọn he ye nọ vbe ima la Onurho Iya ladian ore ẹvbo vbe obọ orrie, ma keghi khian ghe odẹ ekẹn, a na la Ẹzẹ Ugbogiorinmwi gberra gha rrie Onurho Otiku. Vbene I lae khian, I kegha ghe ehe ne ekẹn ẹvbo ni na guọghọ kevbe avbe onurho ne erhẹn giẹn uan.

¹⁴ Vbe odẹ ahọ Onurho Ẹzẹ kevbe Ọghọdọ Ọba. Ekẹtẹkẹtẹ ne I ya khian ma miẹn ehe la vbe uwu iku nii.

¹⁵ I keghi rhunmwuda ọnii laghe Iya Kidrọn, I na gha hin ekẹtẹkẹtẹ khian, I na gha ghe egbekẹn nii. I keghi la ehe ne I la rre werriegbe ya la Onurho Iya la ore ẹvbo.

¹⁶ A ma miẹn ọkpa vbe uwu iran ni rre asẹ vba ne ọ rẹn ehe ne I ye ra emwi ne I gha ru. Do sẹ ẹghẹ na, I ma he ta ẹmwẹ rhọkpa ma ọmwa rhọkpa vbe uwu avbe Ju ne iho mwa, avbe ohẹn, avbe ọkaolotu, iran ni rre asẹ ra ọmwaikọmwa ne ọ gha mwẹ obọ vbe iwinna nii.

¹⁷ Sokpan, eban nian, I keghi tama iran wẹẹ, “Wa ghe uwu ọlọghọmwa ne ima ye rhunmwuda ne Jerusalẹm na rẹnkhuan, a kevbe guọghọ onurho ni rrọ ua! Wa gie ima dọlegbe gbe ekẹn ne ọ lẹga ẹvbo na, ne ima ban ukpọn emwiekhue hin ẹkun rre.”

¹⁸ I keghi vbe tama iran vbene Osanobua wa yaba mwẹ hẹ, ọ na vbe yọmwẹ obọ, kevbe vbene ọgbaisi tama mwẹ hẹ. Iran hia keghi wanniẹn wẹẹ, “Gie ima suẹn gha dọlọ ẹe bọ nian.” Iran keghi mu egbe ne iran gha ya suẹn iwinna nii.

¹⁹ Ugbẹn vbe Sanbọlat, e Tobaia kevbe Igabari ọkpa ne a tie ẹre Gesiẹm ghi họn emwi ne ima mu egbe ẹre ne ima ru, iran keghi suẹn gha giẹ mwa, iran wẹẹ, “De emwi ne uwa ro ighẹ uwa ru na yi? Te uwa ra sọtẹ ọgbaisi ra?”

²⁰ Mẹ keghi wanniẹn wẹẹ, “Osanobua Ẹrinmwi gha rhie arudinodẹ ne ima, eguọmwadia ẹre ma khin, te ima ra suẹn gha bọ ẹe na. Sokpan ukpe emwiewe ọkpa ma khẹ ke uwa vbe Jerusalẹm, avbe emwi arre ne a ru vbọ ma vbe kan uwa.”