Nehimaia 13 - Edo Bible (E Baibol Ẹdo) Version 1996

Awannọ Egbe Hin Ẹbu Erriọvbe Rre

¹ Ugbẹn vbe iran ghi tie Uhi e Mosis ladian ye emwa nii ehọ, iran keghi sẹ ehe ne a gbẹnnẹ ọẹn yi wẹ ne a ghẹ gie ivbi e Amọn kevbe ivbi e Moab deba emwa Osanobua.

² Emwi ne ọ sii ọna ọrọre wẹ ivbi Amọn kevbe ivbi e Moab ma rhie evbare ne ivbi Izrẹl, iran ma vbe sa amẹ ne iran wọn vbe ẹghẹ ne iran na gha ke otọe Igipt dee. Sokpan, iran keghi rhie igho ne Balam ne ọ do fi ivbi Izrẹl unu, sokpan Osanobua mwa keghi fi ihẹn ni werriẹ khian erhunmwu.

³ Ugbẹn vbe ivbi Izrẹl ghi họn vbe a tie uhi na, iran keghi wannọ avbe erriọvbe hia hin uwu ẹbu iran rre.

Adọlọ E Nehimaia

⁴ Ẹghẹ ne ọ taẹn ọ re ohẹn Eliasib ne ọ gbe aro ghe aza Ọgua Osa, kevbe Tobaia gba ya gha ru ọse.

⁵ Ọ keghi kue ne Tobaia gha rre ugha nọkhua ne a wẹ ne a viọ avbe ọka imuohan kevbe eturari yi deba avbe emadogua ne a lo vbe Ọgua Osa. Emwi ihaoko ne a viọ gie avbe ohẹn kevbe a ghae ye ihigbe ọghe ọka, ayọn, ofigbọn oliv ne a viọ ne avbe Livai, avbe ikpemaba Ọgua Osa kevbe avbe abodẹ Ọgua Osa.

⁶ Ẹghẹ ne emwi na ya sunu, mẹ i rre Jerusalẹm rhunmwuda, vbe ukpo ne ọ huẹre eva yan ọgban ne Atakzaziz ya gha re ọba e Babilọn, mẹ werriegbe gha khian ya na iyẹn ma rẹn. Ọ ghi kpee fua kherhe,

⁷ ọ keghi kue yọ mẹ, I na dọlegbe gha die Jerusalẹm. I ghi sẹ evba udu mwẹ keghi mu waa vbe I miẹn wẹ Eliasib gie Tobaia gha rre ughugha ọkpa vbe Ọgua Osa.

⁸ Ohu mu mwẹ ẹsẹse, I keghi filo ẹre emwi hia ladian vba ighẹ Tobaia.

⁹ I na wẹ ne iran ya họnmwẹ avbe ughugha nii, kevbe wẹ ne a viọ emadogua Ọgua Osa, avbe ọka imuohan, kevbe eturari dọlegbe ye evba.

¹⁰ I keghi vbe họn wẹ avbe ikpemaba Ọgua Osa kevbe avbe Livai kpao vbe Ọgua Osa rre gha rrie ugbo iran rhunmwuda avbe emwa ni ma ghi viọ emwi ne ọ gha sẹ iran gha re rre.

¹¹ I keghi gu iran ni rre asẹ gui ne iran na gie emwa fi iyeke gbe ẹmwẹ Ọgua Osa vberriọ. I keghi ya viọ avbe ikpemaba kevbe Livai werriegbe gha die Ọgua Osa, I na wẹ ne iran dọlegbe suẹn iwinna.

¹² Ẹghẹ nii, avbe ivbi Izrẹl keghi dọlegbe suẹn gha viọ aghaeyihigbe ọghẹ ọka, ayọn, kevbe ofigbọn oliv rrie aza Ọgua Osa.

¹³ I keghi viọ avbe emwa na yọ ne iran gha gbe aro ghe avbe aza: e Sielemia ne ohẹn, e Zadọk ne ọ rẹn Uhi dinmwi kevbe Pedaia ne Livai, e Hanan ne ovbi e Zakọ ne ọ vbe re eyẹ e Matanaia, ne ọ gha ru iyohọ ne iran. I rẹnrẹn wẹ I gha sẹtin muẹtinyan avbe emwa na wẹ iran gha ye ekhọe ẹmwata ghae emwi ne a hẹ rre gba ihua iran ne iran gba winna obọ.

¹⁴ Osanobua mwẹ, ghẹ mianmian emwi ne I ru ne Ọgua Osa ruẹ na. Kevbe ugamwẹ ọnrẹn.

¹⁵ Vbe ẹghẹ nii, I keghi miẹn emwa Juda vbe iran minọ alimo vbe Ẹdẹ Ikẹtin. Eso ọvbehe kegha kun ihẹ ọka, ayọn alimo, ọmọ ohọ kevbe ọvbehe yan ekẹtẹkẹtẹ iran ne iran viọ rrie Jerusalẹm. I keghi ya obọ sekhae ne iran wẹ ne iran ghẹ khiẹn emwi vbe Ẹdẹ Ikẹtin.

¹⁶ Emwa eso ni ke Taia rre kegha rre Jerusalẹm. Iran viọ ehẹn kevbe emwi atẹ ọvbehe ni bun rre, ne iran do khiẹn ne emwa ima vbe Ẹdẹ Ikẹtin.

¹⁷ I keghi gu avbe ọkaolotu e Ju gui, I tama iran wẹẹ, wa ghe emwi dan ne uwa ru, wa gha ru Ẹdẹ Ikẹtin awua.

¹⁸ Ọna ọ sii ẹe ne Osanobua na rri avbe erha uwa odede oya, ne ọ na si ọfuan ye ẹre ẹvbo. Sẹ evba, te uwa ye ru yan, ne uwa si ohu Osanobua yan Izrẹl uhunmwu vbe ekpa ne uwa na ru Ẹdẹ Ikẹtin awua.

¹⁹ Rhunmwuda ọnii, ọ re I na yi iyi wẹ ne a gha khui urho ne a la la ore ẹvbo vbe omuhẹn Ẹdẹ ikẹtin hia, vbe ebi a wa da suẹn gha ro, kevbe wẹ ne a ghẹ dọlegbe kie ẹre ọvbehe ọ te ya sẹ ẹghẹ ne Ẹdẹ Ikẹtin ya gberra. I keghi viọ eso vbe uwu emwa mwẹ wẹ ne iran ghẹ gia viọ emwi la ore ẹvbo vbe Ẹdẹ Ikẹtin.

²⁰ Uhukpa ra igbaeva, avbe ekpatẹ ni khiẹn emwi atẹ ughughan keghi vbiẹ ọkpẹn ekẹn ne a gbe lẹga ẹvbo vbe ẹdẹ e Fraide.

²¹ I keghi ye obọ sekhae ne iran wẹẹ, “Wa ghẹ zẹdẹ mudia ye evba gha khẹ ne ẹdẹ gbe wa gha ye danmwẹ emwi na, I gha ye obọ ne ọ tọn mu uwa.” Ke ẹdẹ ne ẹdẹrriọ kpao, iran ma ghi rre vbe Ẹdẹ Ikẹtin.

²² I keghi tama avbe Livai wẹ ne iran họnmwẹ egbe ne iran ya gha khẹ Urho, ne iran miẹn wẹ a ma ru Ẹdẹ Ikẹtin awua. Osanobua vbe ye mwẹ rre vbe ọnọna, ne u vbe fan mwẹ ye otọ rhunmwuda ahọ ẹmwẹ ọmwa ruẹn.

²³ Ẹghẹ nii, I kevbe do miẹn wẹ ikpia ni bun vbe uwu avbe Ju viọ ikhuo vbe ivbi Asdọd, Amọn kevbe Moab.

²⁴ Obọkpa vbe a gha wa ivbi iran ye ihẹ eva kegha zẹ ẹvbo Asdọd ra ẹvbo ọvbehe eso, iran i guara zẹ ẹvbo ima.

²⁵ I keghi gu avbe ikpia nii gui, I na rhovbiẹ iran an, I keghi gbele iran, I na silo iran eto vbọlọ kua. I na ya iran vẹn ihẹn vbe eni Osanobua wẹ, ọ re iran nọ ra ivbi iran nọ ne ọ gha dọlegbe rhie ikhuo ẹvbo ọvbehe vbe uwu iran ẹ i ghi rrọọ.

²⁶ I keghi tama iran wẹẹ, “Ikhuo ẹvbo ọvbehe ọ re ọ si e Solomọn la orukhọ na ru. Ghe okpia na ne ọ te kpọlọ sẹ avbe ọba ẹvbo ọvbehe hia fẹẹrẹ. Osanobua ho ẹmwẹ ọnrẹn ọ kevbe ya ẹe rrioba yan ivbi Izrẹl, sẹ evba ọ keghi ye de ye orukhọ na.

²⁷ Te ima ghẹ ghi ye egbe ba uwa ra, ne ima ru emwi ne Osanobua mwẹ wẹ ne ima ghẹ ru vbe ekpa ne a gha na gha viọ ikhuo ẹvbo ọvbehe rọnmwẹ.”

²⁸ Ovbi e Eliasib ne Ogie Ohẹn ọre Joiada gha khin. Sokpan, ọkpa vbe ivbi e Joiada keghi rhie ovbi e Sanbọlat ne ovbi ẹvbo ne a tie ẹre Bẹt Horọn rọnmwẹ. I keghi rhunmwuda ọnii wẹ ne Joiada kpao vbe Jerusalẹm.

²⁹ Osanobua, ye rre vbene emwa na ru ẹre awua hẹ ighẹ ukpo avbe ohẹn kevbe ile ne u gu avbe ohẹn kevbe Livai ta.

³⁰ I keghi họnmwẹ awua emwi erriọvbe hin emwa nii hia egbe rre. I keghi do ru emwamwa ne avbe ohẹn kevbe avbe Livai vbene edọmwadẹ ọghọe gha na gha rẹn iwinna ne ọ khẹ ke ẹe hẹ.

³¹ I keghi mwamwa ẹn wẹ ne iran gha ho erhan ne a ya giẹn emwi izọ ese rre vbe ẹghẹ, kevbe wẹ ne emwi ni gha viọ emwi imuohan ọghe ọka ne a ka fian kevbe ọmọ erhan ne ọ ka vbọ rre. Ye ena hia rre Osanobua, ne u san mwẹ ẹse ẹre.