Nehimaia 12 - Edo Bible (E Baibol Ẹdo) Version 1996

Eni Avbe Ohẹn Kevbe Livai

¹ Eni avbe ohẹn kevbe avbe Livai ni lele Zerubabẹl ne ovbi e Sieatiẹl kevbe Jọsua ne Ogie Ohẹn ke iwe rre ọre ena khin.

^2-7 Avbe Ohẹn: E Seraia, e Jerimaia, Ẹzra, Amaraia, e Malọk, e Hatus, e Siekanaia, e Rehum, e Meremot, Ido, e Ginetoi, Abija, e Mijamin, e Maadaia, e Bilga, e Siemaia, e Joiarib, kevbe Jedaia, Salu, Amok, Hilkaia kevbe Jedaia. Iran na, ọkaolotu iran gha khin vbe uwu ẹbu avbe ohẹn ne ihua iran vbe ẹghẹ ọghe Jọsua.

⁸ Avbe Livai: Iran na ọre a mu ẹmwẹ ihuan ekpọnmwẹ ne a so ye ọre obọ: E Jesua, e Binnui, e Kadmiẹl, e Siẹrebia, e Juda kevbe Matanaia.

⁹ Iran ni mu otu ne a ya so ihuan ne a rra vbọ kegha re Bakbukaia, Uno kevbe avbe Livai ne ihua iran.

Ivbi Uniẹn E Jọsua Ne Ogie Ohẹn

¹⁰ E Jọsua ọ re ọ biẹ Joiakim, e Joia kim keghi biẹ Eliasib, Eliasib ọ re ọ biẹ Joiada.

¹¹ E Joiada keghi biẹ e Jonatan, e Jonatan ọ re ọ biẹ Jadua.

Ekaẹgbẹe Uniẹn Avbe Ohẹn

^12-21 Ẹghẹ ne Joiakim na gha re Ogie Ohẹn, avbe Ohẹn na ọ re ọ gha re ekaẹgbẹe uniẹn avbe ohẹn: Ohẹn Uniẹn e Meraia e Seraia e Hananaia e Jerimaia e Mẹsiulam Ẹzra e Jehohanan Amaraia e Jonatan e Maluki e Josẹf e Siebanaia Adna e Harim e Helkaia e Meraiọt e Zẹkaraia Ido e Mẹsiulam e Gineton e Zikri Abija … e Miniami e Piltai e Moadaia e Siamua e Bilga e Jehonatan e Siemaia e Matenai e Joiarib Uzi e Jedaia e Kalai e Salai Ebe Amok e Hasiabaia e Hilkaia e Netanẹl e Jedaia

Ohẹn Uniẹn Ebe Uniẹn Avbe Ohẹn Kevbe Avbe Livai

²² Vbe ẹghẹ avbe igie ohẹn na ighẹ Eliasib, e Joiada, e Jonatan kevbe Jadua, a keghi gbẹnnẹ eni avbe ekaẹgbẹe uniẹn avbe Livai kevbe ọghe uniẹn avbe ohẹn ye otọ. Ẹghẹ ne Dariọs na gha re ọgbaisi e Pẹsia, ọ re a ghi na gbẹnnẹ ọẹn fo.

²³ Sokpan, avbe ekaẹgbẹe uniẹn avbe Livai vbọ, ẹghẹ ọghe Jonatan ne eyẹ Eliasib ọ re a gbẹnnẹ ọẹn ye ebe ẹvbo sẹ.

Vbene A Ghae Iwinna Ọgua Osa Hẹ

²⁴ Avbe Hasiabaia, e Siẹrebia, e Jesua, e Binnui kevbe Kadmiẹl keghi mu olotu ya ghae avbe Livai ye ọka. Ọka eva vbọ ghi gba gha so ihuan ne a rra ya rho Osanobua, iran ghi vbe gha kpọnmwẹ ọẹn, zẹ vbene ọ mwamwa ẹn ye otọ ighẹ Devid ne ọba, ne ọmwa Osanobua.

²⁵ Vbe uwu iran ni khẹ Ọgua Osa, iran na vbọ kegha re ni khẹ aza ni rre onurho Ọgua Osa, e Matanaia, e Bakbukaia, Obedaia, e Mẹsiulam, e Talmọn kevbe Akub.

²⁶ Ẹghẹ ne iran na na gha rrọọ kegha re ẹghẹ ọghe Joiakim ne ovbi e Jọsua kevbe eyẹ ọghe Jehozadak, kevbe ẹghẹ ọghe Nehimaia ne ne ọ khaemwisẹ, kevbe ẹghẹ ọghe Ẹzra ne ohẹn ne ọ vbe gha re ọmwa ne ọ rẹn Uhi dinmwi.

E Nehimaia Ye Ekẹn Ọlẹga Ẹvbo Ni Fi Ohan

²⁷ Ẹghẹ ne a na ye ekẹn ne a gbe lẹga Jerusalẹm fi ohan, a keghi ya viọ avbe Livai ke ehe ne iran a rhirhi a gha ye rre ne iran deba emwiukpo a ya fi ohan ni vbene iran gha na so ihuan ekpọnmwẹ deba isẹ kevbe akpata ne a kpee.

²⁸ Uniẹn avbe Livai ni so ihuan keghi ke ehe ne iran ye vbe ọkpẹn Jerusalẹm gha dee, kevbe avbe ẹvbo ni lẹga Nẹtofa,

²⁹ kevbe Betgigal, e Geba kevbe Azmavẹt.

³⁰ Avbe ohẹn kevbe avbe Livai keghi ya egbe iran ye ulamwẹ ihọnmwegbe, kevbe ne emwa ni, avbe onurho kevbe ekẹn ẹvbo ni.

³¹ I keghi si avbe ọkaolotu e Juda koko vbe uhunmwu ekẹn nii, I na ghae emwa nii ye otu nekhua eva ne iran gbe ukpukpẹ lẹga ẹvbo nii, ne iran gha kpọnmwẹ Osa. Otu ne okaro keghi gbe ẹe la obọ erhọmwa vbe uhunmwu ekẹn ni ghe odẹ Urho Iku.

³² E Hosiaia keghi lele iran ni so ihuan odieke vbene obọkpa vbe a gha wa avbe ọkaolotu Juda ye iheva na lele ẹe.

^33-35 Avbe ohẹn ni gha kpe okpe keghi lele iran iyeke Azaraia, Ẹzra, e Mẹsiulam, e Juda e Bẹnjamin, e Siemaia kevbe Jerimaia. Ọmwa ne ọ ghi lele iran ni kegha re Zẹkaraia ne ovbi e Jonatan kevbe eyẹ Siemaia. (Usun avbe erha ẹe odede ọ re iran vbe ye ighẹ Matanaia, e Mikaia kevbe Zakọ ne uniẹn Asaf.)

³⁶ Emwa ẹwae ẹre ọvbehe kevbe lele ẹe, avbe Siemaia, Azarẹl, e Milali, e Gilalai, e Maai, e Netanẹl, e Juda kevbe Hanani iran na hia keghi viọ emwi ne a kpee mwẹ obọ, egbe ne Devid ne ọba ne ọmwa Osanobua ghaa kpee. Ẹzra ne ọ rẹn ebe dinmwi ọ re ọ viọ iran na mwẹ obọ gha khian.

³⁷ Iran ghi sẹ Urho Uhunmwu ẹzẹ, iran keghi hin ikpawẹ ne ọ rrie Ẹvbo e Devid, iran keghi gberra ẹguae Devid, iran na dọlegbe do hin ekẹn nii vbe Urho Amẹ vbe odẹ ahọ ẹvbo nii.

³⁸ Otu nọkpa ne ọ vbe kpọnmwẹ keghi laghe obọ iyọmwa lele uhunmwu ekẹn nii, mẹ keghi lele obọkpa vbe uwu iran na gha khian. Ma keghi si ukpukpẹ gberra Owa Ọkhẹ Ne gelete ọghe Aroewu kevbe ya sẹ Ekẹn Negbadaa.

³⁹ Ma keghi ke evba ya la Urho Ifreim gberra, Urho e Jesiana, Urho Ehẹn, Owa Ọkhẹ Ne gelete ọghe Hananẹl, kevbe Owa Ọkhẹ Ne gelete ọghe iran ne Iyisẹn ya sẹ Urho Ohuan. Ma keghi do mu ẹẹn ye otọ vbe ọkpẹn Urho Ọgua Osa.

⁴⁰ Erriọ ọ re otu eva na ni rhie ekpọnmwẹ ne Osanobua na do sẹ ehe ne Ọgua Osa ye. Vbe ọ ghi vbe lahin avbe ọkaolotu ni deba mwẹ rre,

⁴¹ avbe ohẹn na kevbe gha rre nene usun, iran na gha kpe okpe: Eliaikim, e Maaseia, e Miniami, e Mikaia, Ẹliọnai, e Zẹkaraia kevbe Hananaia.

⁴² Avbe emwa ni ghi vbe lele iran kegha re Maaseia, e Siemaia, Eliaza, Uzi, e Jehohanan, e Malkija, Ẹlam kevbe Ezẹ. Iran ni so ihuan, ne ọ viọ mwẹ obọ ighẹ Jezrahaia, keghi wa kie urhu hia ya gha so ihuan.

⁴³ Emwi ni bun ọre a ya zẹ ese ẹdẹ ne ẹdẹrriọ, ẹko kegha sẹ emwa hia ọyẹnmwẹ, rhunmwuda, Osanobua ọ re ọ rhie ọyẹnmwẹ ne iran. Avbe ikhuo kevbe ibiẹka keghi vbe deba emwiukpo na, a keghi gha họn urhu uwemwẹ iran ya sẹ arria ọvbehe.

Emwi Ne A Viọ Rrie Ugamwẹ Ọgua Osa

⁴⁴ Vbe ẹghẹ nii, a keghi do viọ emwa yọ ne iran gha gbe aro ghe avbe aza ne a viọ emwi ne emwa viọ rrie Ọgua Osa yi, usun avbe aghaeyihigbe kevbe ọka ne a ka fian kevbe ọmọ erhan ne ọ ka vbọ ukpo ukpo. Iwinna iran na vbe nọ ne iran gha miẹn avbe ẹvbo ni sikẹ ugbo nii emwi ne iran viọ gie avbe ohẹn kevbe avbe Livai zẹ vbene Uhi khare. Emwa e Juda keghi gha ta ẹmwẹ avbe ohẹn kevbe Livai ne ọ maa.

⁴⁵ Rhunmwuda ne iran na ru ulamwẹ ihọnmwegbe kevbe avbe itaemwi ọvbehe hia zẹ vbene Osanobua khare. Avbe ikpemaba Ọgua Osa kevbe abodẹ Ọgua Osa keghi vbe winna iwinna iran zẹ vbene Devid kevbe Solomọn ne ovbi ẹre mwamwa ẹẹn.

⁴⁶ Ke ẹghẹ e Devid ne ọba kevbe Asaf ne ọkpezikẹn gha dee, avbe ọsian ọ re ọ ghi karo vbe ihuan urhomwẹ ne a so ghe Osanobua.

⁴⁷ Vbe ẹghẹ e Zerubabẹl kevbe ẹghẹ Nehimaia, te ivbi Izrẹl hia gha zọhẹ ẹdẹgbegbe ne a miẹn ya gha gaga avbe ọsian kevbe abodẹ Ọgua Osa. Avbe emwa ni ghi gha zẹ ọhẹ iruemwi gie avbe Livai, avbe Livai ghi vbe viọ inu ne a mwamwa ẹn yi gie avbe ohẹn.