Nehimaia 11 - Edo Bible (E Baibol Ẹdo) Version 1996

Emwa Ni Yin E Jerusalẹm

¹ Avbe ọkaolotu ni rrọ keghi yin e Jerusalẹm, avbe emwa ni dekẹe keghi yan uta ya zẹ ẹgbẹe ọkpa vbe uwu igbe ne ọ gha ya yin ẹvbo nọhuanrẹn ọghe Jerusalẹm vbene avbe nekpa na ya yin avbe okpẹvbo kevbe ore nekhua nekpa.

² Emwa ni keghi tian avbe emwa ọvbehe ni tobọ iran kha wẹ iran gha yin adesẹ ore Jerusalẹm.

³ Vbe avbe okpẹvbo kevbe ore nekhua ọghe otọe Izrẹl ni dekẹe, avbe ohẹn avbe Livai, iran ni winna vbe Ọgua Osa, kevbe ivbi uniẹn eguọmwadia e Solomọn, iran ọ re ọ tobọ iran gha koko egbe iran vbe ẹvbo iran. Avbe ọkhaẹvbo ni rre otọe e Juda ni do yin e Jerusalẹm ọre ena khin:

⁴ Ivbi uniẹn ẹwae Juda: Ataia ne ovbi Uzaia, ne ọ vbe re eyẹ e Zẹkaraia. Usun avbe erha ẹe odede nekpa ọ re iran vbe ye ighẹ Amaraia, e Siefatia kevbe Mahalalẹ ni re ivbi uniẹn e Pẹrẹs ne ovbi e Juda.

⁵ E Maaseia ne ovbi e Barọk ne ọ vbe re eyẹ e Kọlhozẹ. Usun avbe erha ẹe odede nekpa ọ re iran ye ighẹ Hazaia, Adaia, e Joiarib kevbe Zẹkaraia ni re ivbie uniẹn Siẹla ne ovbi e Juda.

⁶ Iran ni yin e Jerusalẹm vbe ivbi uniẹn e Pẹrẹs kegha re erẹnrẹn yan iyeha yan arria eva (468).

⁷ Ivbi uniẹn ẹwae Bẹnjamin: E Salu ne ovbi e Mẹsiulam, ne ọ vbe re eyẹ Joed. Usun avbe erha ẹe odede ọ re iran ye ighẹ Pedaia, e Kolaia, e Maaseia, Itiel kevbe Jesaia.

⁸ E Gabai kevbe Salai, ni re etẹn ni sikẹ Salu ẹsẹse. Ivbi e Bẹnjamin ni ghi wa yin e Jerusalẹm hia kegha re erẹnrẹn yan ugie yan iyisẹn ihinrin (928).

⁹ E Joẹl ne ovbi Zikri ọ re ọ gha re ọkaolotu iran, e Juda ne ovbi e Hasẹnua kegha re azukpogieva vbe emwa ni rre asẹ vbe ẹvbo ni.

¹⁰ E Jedaia ne ovbi e Joiarib kevbe Jakin.

¹¹ E Seraia ne ovbi e Hilkaia ne ọ vbe re eyẹ e Mẹsiulam. Usun avbe erha ẹe odede ọ re iran ye ighẹ Zadọk, e Meraiọt kevbe Ahitub ne ọ gha re Ogie Ohẹn.

¹² Ivbi ẹwae na ni wa gha ga vbe Ọgua Osa kegha re eva yan ugie yan arriaenẹ (822). Adaia ne ovbi e Jeroham ne ọ vbe re eyẹ Pelaia. Usun avbe erha ẹe odede ọ re iran ye ighẹ Amzi, e Zẹkaraia, e Pasiọ kevbe Malkija. Inu ivbi ẹwae na ni gha re ekaẹgbẹe kegha re eva yan iyeva yan uri (242).

¹³ Amasia ne ovbi Azarẹl kevbe eyẹ Azai. Usun avbe erha ẹe odede ọre iran ye ighẹ Mesilemọt kevbe Imẹ.

¹⁴ Ivbi uniẹn ni wa gha re ivbiyokuo ni gbakhia kegha re erẹnrẹn yan iyehan (128). Ọkaolotu iran kegha re Zabdiẹl ne ọ vbe gha re ovbi ẹgbẹe ne ọ hin usi.

¹⁵ Avbe Livai: E Siemaia ne ovbi e Hasiub ne ọ vbe re eyẹ Azrikam. Usun avbe erha ẹe odede ọ re iran ye ighẹ Hasiabaia kevbe Bunni.

¹⁶ E Siabetai kevbe Jozabad, ni re Livai ni hin usi, ni vbe gha gbe aro ghe iwinna ne a winna hia ne ẹ i ghi re uwu Ọgua Osa.

¹⁷ E Matanaia ne ovbi e Mika, ne ọ vbe re eyẹ e Zabdi ne ovbi uniẹn Asaf. Rẹn ọ re ọ viọ avbe ọsian Ọgua Osa mwẹ obọ ya so ihuan urhomwẹ. E Bakbukaia ne ọ gha yi e Matanaia obọ. Abda ne ovbi e Siamua, ne ọ vbe re eyẹ e Galal ne ovbi uniẹn e Jedutun.

¹⁸ Avbe Livai hia ni wa yin ẹvbo nọhuanrẹn nii ighẹ Jerusalẹm kegha re eneyan iyenẹ yan uri (284).

¹⁹ Iran ni khẹ Ọgua Osa: Akub, e Talmọn kevbe etẹn iran, ehia kegha re erẹnrẹn irrọvbe iyenẹ yan iyisẹn (172).

²⁰ Avbe ivbi Izrẹl ni dekẹe kevbe avbe Livai, iran kegha rre avbe okpẹvbo kevbe ore nekhua ni rre Juda, iran na tobọ iran gha koko egbe iran.

²¹ Iran ni winna vbe Ọgua Osa kegha rre asefẹn ne a tie ẹre Ofẹl vbe Jerusalẹm e Ziha kevbe Gispa ọre ọ gha viọ iran mwẹ obọ winna.

²² Ọmwa ne ọ gbearoghe avbe Livai vbe iwinna, ne ọ gha rre Jerusalẹm vbọ kegha re Uzai ne ovbi e Bani, ne ọ vbe re eyẹ e Hasiabaia. Usun avbe erha ẹe odede ọ re iran ye ighẹ Matanaia kevbe Mika, ọ kevbe gha re ovbi ẹwae Asaf, ẹwae ne a mu ẹmwẹ emaba vbe ẹzi kẹn ne a kpe vbe ugamwẹ Ọgua Osa ye ọre obọ.

²³ Emwamwa ọghe ọba kegha rrọ vbene a gha ya gha ghae avbe ẹwae ni ye ẹdẹ ne ihuan ne a so sẹ iran egbe vbe ẹdẹ vbe ẹdẹ.

²⁴ E Pẹtahia ne ovbi e Mesiezabel ne ovbi ẹwae Zẹra kevbe ovbi uniẹn e Juda, ọ re ọ gha kha e ne unu Izrẹl vbe ẹguae Pẹsia.

Iran Ni Gha Rre Ẹvbo Kevbe Ore Nekhua Nekpa

²⁵ Nibun vbe uwu avbe emwa na keghi yin ẹvbo ni diake ugbo iran. Iran ni re ivbi uniẹn e Juda kegha rre kirriat Aba, e Dibọn kevbe Jekabzil kevbe avbe igue ni rre ọkpẹn avbe ore nekhua nii.

²⁶ Eso vbe gha rre Jesua, e Molada, e Bẹtpẹlẹt,

²⁷ kevbe Hazasual kevbe Biẹsiẹba, kevbe avbe igue ni lẹga ẹre.

²⁸ Iran kevbe gha rre Ziklag, Makona kevbe avbe igue ni lẹga iran.

²⁹ Iran kevbe gha rre Enrimọn, e Zora, e Jamut,

³⁰ e Zanoa, Adulam kevbe avbe igue ni lẹga avbe ẹvbo na. Iran kevbe gha rre Lakis kevbe avbe ugbo ni lẹga iran. Iran kevbe gha rre Azẹka kevbe avbe igue ni lẹga ẹre. Ọnii rhie ma wẹ emwa e Juda, otọ ne ọ rre ẹkpo Biẹsiẹba vbe odẹ ekẹn kevbe Iya e Hinọm vbe odẹ okuọ, ọ re iran yinrin.

³¹ Ivbi uniẹn e Bẹnjamin keghi yin e Geba ne ọ rre odẹ Ahọ e Mikmas, Eai, e Bẹtẹl kevbe avbe igue ni sikẹ iran.

³² Anatọt, e Nob, Ananaia.

³³ E Hazọ, e Rama, e Giteim,

³⁴ e Hadid, e Zẹboim, e Nebalat,

³⁵ e Lọd kevbe Ono, deba Iya avbe Owinna.

³⁶ Ivbi otu e Livai eso ni kagha rre otọ e Juda yi, a keghi wẹ ne iran ya yin otọe Bẹnjamin.