Nehimaia 10 - Edo Bible (E Baibol Ẹdo) Version 1996

¹ Ọmwa nokaro ne ọ rhie obọ ye ehe ni kegha re ne ọ khaemwisẹ ighẹ Nehimaia ne ovbi e Hakalaia, vbe iyeke ọnii, e Zedekaia keghi vbe rhie obọ yọ. Iran na vbe rhie obọ yọ:

^2-8 Avbe ohẹn: E Seraia, Azaraia, e Jerimaia, e Pasiọ, Amaraia, e Malkija, e Hatus, e Siebanaia, e Maluk, e Harim, e Meremot, Obedaia, e Daniẹl, e Gineton, e Barọk, e Mẹsiulam, Abija, e Mijamin, e Maazaia, e Bilgai kevbe Siemaia.

^9-13 Avbe Livai: E Jesua ne ovbi Azanaia, e Binnui ne ovbi ẹwae Henadad, e Kadmiẹl, e Siebanaia, e Hodaia, e Kelita, e Pelaia, e Hanan, e Mika, e Rehọb, e Hasiabaia, e Zakọ, e Siẹrebia, e Siebanaia, e Hodaia, e Bani, kevbe Beninu.

^14-27 Ọkaolotu Emwa nii: E Parọs, e Pahat Moab, Ẹlam, e Zatu, e Bani, e Bunni, Azgad, e Bebai, Adonaija, e Bigvai, Adin, Atẹ, e Hẹzekaia, Azọ, e Hodaia, e Hasium, e Bezai, e Harif, Anatọt, e Nebai, e Magpaias, e Mẹsiulam, e Heze, e Mesiezabel, e Zadọk, e Jadua, e Pelatia, e Hanan, Anaia, e Hosea, e Hananaia, e Hasiub, e Halohes, e Pilha, e Siobek, e Rehum, e Hasiabna, e Maaseia, Ahaia, e Hanan, Anan, e Maluk, e Harim kevbe Baana.

Ebe Ne A Rhie Obọ Yi

²⁸ Ma ne ivbi Izrẹl, avbe ohẹn, avbe Livai, iran ni khẹ Ọgua Osa avbe ikpemaba Ọgua Osa, iran ni winna vbe Ọgua Osa, ke iran nekpa hia, ne a miẹn wẹ, ọ ru vbene Uhi Osanobua khare, ma na wannọ egbe ima hin ehe ne avbe erhunmwuyẹn ni rre otọ ima ye rre, ma, do deba avbe amwẹ ima, deba avbe ivbi ima hia, ni wan sẹ nẹ ne ọ gha na rẹn otọ ẹre.

²⁹ Ma deba avbe ọkaolotu ima vẹn ihẹn, ne a miẹn wẹ, a deghẹ ma rhie obọ gberra, emwi gha rruan ima, wẹ, ma gha ya Uhi Osanobua ru emwi, uhi ne ọ rhie ne Mosis ne ọguọmwadia ẹre rhie rre, wẹ ma gha ru zẹ vbene e Nọyaẹnmwa khare hia, wẹ ma gha rhie uhi ẹre mwẹ, ma ghi vbe gha ru vbene ọ ho.

³⁰ Ma i ra rhie okhuo vbe uwu avbe orhunmwuyẹn ni rre ehe ne ima ye.

³¹ Avbe orhunmwuyẹn gha mu ọka ra emwi ọvbehe gie ima dẹ vbe ẹdẹ ikẹtin ra vbe ẹdẹ iruemwi ọvbehe ma i ra dẹ. Ukpo ne ọ ya gba vbe ihinrọn hia, ma i ra gbe ugbo vbe otọe na, ma ghi vbe ya osa ma emwa hia ni rri osa.

³² Ukpukpo ma gha zẹ obọ ọkpa vbe a gha uwan ne kherhe ọghe esiliva ye ihẹ erẹnrẹn, ne a miẹn ya gha ha osa emwi ne a lo vbe Ọgua Osa.

³³ Ma gha viọ avbe emwi na rre ne a ya gha ru ugamwẹ vbe Ọgua Osa: ebrẹd itaemwi, ọka imuohan ẹdẹgbegbe, aranmwẹ ne a gha giẹn ya gha zọ ese ẹdẹgbegbe, emwi ne a ya zọ ese vbe Ẹdẹ ikẹtin, Emwiukpo Uki Ọgbọn, kevbe avbe emwiukpo ọvbehe, avbe emwi imuohan ni dekẹe, emwi izọ ese ne a ya khiẹn orukhọ ivbi Izrẹl kua kevbe avbe emwi ọvbehe hia ne a ghi gualọ vbe Ọgua Osa.

³⁴ Ma kevbe avbe ohẹn kevbe avbe Livai gha yan uta yọ ukpukpo ne a ya rẹn ẹwae ne ọ gha ho erhan ne a ya giẹn ese ne a zọ ghe Nọyaẹnmwa ne Osanobua mwa zẹ vbene Uhi khare.

³⁵ Ukpo ukpo, ma gha viọ avbe emwiokọ ne ima gha rhọ ya gha mu ohan vbe Ọgua Osa, kevbe avbe ọmọ erhan ne ọ ka gha vbọ vbe emwiokọ mwa.

³⁶ Emọ ikpia hia ne ima ka gha biẹlẹ, ma gha viọ iran bu ohẹn vbe Ọgua Osa ne a ya iran fi ohan ne Osanobua vbe evba zẹ vbene Uhi kha re. Erriọ ma gha vbe ye ọwẹe ne ẹmila mwa, ke ẹwe mwa kevbe ohuan mwa ka gha biẹlẹ fi ohan.

³⁷ Ma gha mu Igharhuarhua ne a ye amẹ gbe, ne ima ye ọka ne a ka gha fian vbe ugbo mwa rre gie avbe ohẹn, erriọ vbe nọ ne emwi imuohan nekpa, ayọn ofigbọn oliv kevbe avbe ọmọ erhan ne a rhọ re ughughan. Ma gha viọ a ghae ye ihẹ igbe ọghe emwiokọ mwa gie avbe Livai ne ọ koko aghaeyihigbe vbe agọ ne ima na gbe ugbo.

³⁸ Avbe Livai gha koko aghaeyihigbe vbe obọ emwa, avbe ohẹn ni re ivbi uniẹn Errọn ghi mudia ke iran, avbe Livai ghi viọ obọkpa vbe uwu igbe vbe aghaeyihigbe ne iran koko, ye aza vbe Ọgua Osa ne a miẹn gha lo vbe Ọgua Osa.

³⁹ Ivbi Izrẹl kevbe avbe Livai ghi viọ emwi ne emwa zẹe nii ighẹ ọka, ayọn, kevbe ofigbọn oliv gha rrie uwu aza ne a viọ avbe ọkpan ne a lo vbe Ọgua Osa yi, ehe ne iran vbe dia ighẹ avbe ohẹn ne iwinna sẹ ọre egbe vbe Ọgua Osa kevbe avbe iran ni khẹ Ọgua Osa kevbe avbe iran ni so ihuan vbe Ọgua Osa.