Nehimaia 1 - Edo Bible (E Baibol Ẹdo) Version 1996

¹ Iyẹn ọghe emwi ne Nehimaia ne ovbi e Hakalaia sẹtin ru ọ re ena khin. Vbe uki e Kislev, vbe ọ rre ukpo ugie ne Atakzaziz kegha re ọgbaisi e Pẹsia, me ne Nehimaia kegha rre Susa ne igiogbẹ otọe nii.

Vbene Nehimaia Gha Mu Ẹmwẹ Jerusalẹm Ro Hẹ

² E Hanani, ọkpa vbe uwu etẹn mwẹ, kevbe emwa ọvbehe eso, keghi ke Juda rre. I keghi nọ iran vbene ọ ghi ye hẹ ighẹ e Jerusalẹm kevbe avbe Ju ne ihua mwẹ ni ke Babilọn kevbe iwe gha dee.

³ Iran keghi tama mwẹ wẹ uwu ọlọghọmwa nọkhua ọ re iran ye ighẹ iran ni miẹn uhunmwu ya sẹ owa, kevbe wẹ avbe erhunmwuyẹn ni yin lẹga iran I zẹdẹ ghe iran sọmwa, iran kevbe tama mwẹ wẹ te ekẹn ne a gbe gaa e Jerusalẹm he ye rẹnkhuan kevbe wẹ a ma he ye dọlegbe bọ onurho ẹre ke ẹghẹ ne iran ya giẹn ọnrẹn gha dee.

⁴ Ugbẹn vbe I ghi họn ẹmwẹ na, I na de tota, I na gha viẹ egbe mwẹ. I ma rri evbare vbe ikpẹdẹ ni bun, I kegha khiẹ, I na gha na erhunmwu ghe Osanobua,

⁵ “E Nọyaẹnmwa, Osanobua ọghe Ẹrinmwi! Ọmwa nọkpọlọ ẹsẹse wẹ khin Ohan ruẹn vbe mu mwa. We i hiẹ ọmwa ne ọ ho ẹmwẹ ruẹn ọ na vbe gha ru vbene u khare.

⁶ Ghe mwẹ Nọyaẹnmwa ne u họn erhunmwu mwẹ ne I na ne ivbi Izrẹl asọn kevbe avan. I miẹnkue wẹ ma ne ivbi Izrẹl ru orukhọ. Mẹ kevbe avbe erha mwẹ odede ru orukhọ.

⁷ Uyinmwẹ dan ma yin ghe ruẹ, ma ma vbe ru vbene u gie mwa. Uhi ne u rhie ne Mosis ne ọguọmwadia ruẹ rhie gie ima, ma ma mu ẹẹn sẹ.

⁸ Yerre nian, vbene u tama Mosis hẹ wẹẹ, ‘A deghẹ wa ne ivbi Izrẹl ma rhie egbe mu mwẹ ẹse, I gha zagha uwa a lele otọe ẹvbo ọvbehe.

⁹ Sokpan a deghẹ wa ghi vbe werriegbe bu mwẹ rre, wa na gha ru vbene I gie, I gha viọ uwa werriegbe gha rrie ehe ne I zẹe wẹ ne a na gha ga mwẹ, ọ gha khọn rẹn wẹ ehe ne agbọn na sẹe ọ re a zagha uwa kua gha rrie.’

¹⁰ “E Nọyaẹnmwa, eguọmwadia ruẹ ena khin, emwa ruẹn iran khin. Ẹtin kevbe iwegbe ruẹ nọkhua ọ re u ya miẹn iran fan.

¹¹ Rhunmwuda ọnii họn erhunmwu mwẹ kevbe ọghe eguọmwadia ruẹ nekpa ni yọghọ ne uẹn. Rhie ọdunna mẹ ẹrẹna, nẹ u gie ọgbaisi tohan mwẹ.” Vbe ẹghẹ nii, mẹ ọrọre ne ọ sa ayọn ne ọgbaisi.