Nahum 1 - Edo Bible (E Baibol Ẹdo) Version 1996

¹ Uhunmwu ne a giee vbe ekpa Ninevi ọ re ọna khin, zẹ vbene ọ gbẹn ọẹn ye otọ vbe ekpa umian ne ọ miẹn ighe Nahum ne ovbi ẹvbo ne a tie ẹre Ẹlkos.

Ohu E Nọyaẹnmwa Ghe Ninevi

² E Nọyaẹnmwa i zẹdẹ kue ne ọmwaikọmwa gu ẹe mwa ẹrrẹe; te ọ rri iran ni gbe odan ghe ẹre oya. Ọ ha ẹre werriegbe ne iran vbe ohu ẹre.

³ Ohu i rherhe mu e Nọyaẹnmwa sokpan rẹn mwẹ ẹtin, ẹ i gie ọmwa ne ọ rria abe gha rrie vbe ne ọ ma na rri oya. Okpẹhoho guakpao, vbe ehe ne Nọyaẹnmwa khian la; okuku amẹ, ebubẹ ne owẹ ọre gbe nọ!

⁴ Ọ gu okun guan ọ keghi ka mu otọ! Ọ ru ẹe ne avbe ẹzẹ ka mu otọ. Oha ni rre Basan luẹluẹe. Te Oke Kamẹl ghi ba rriẹrriẹ, obobo ni rre Lebanọn fafaa.

⁵ Avbe oke nekhua mu rueghe vbe ehe ne Nọyaẹnmwa ye avbe oke negiẹrẹ ranraẹn vbe odaro ẹre. E Nọyaẹnmwa gha ladian, otọe ghi mu rueghe.

⁶ Ohu gha mu ẹẹn, de ọmwa ne ọ gha miẹn uhunmwu? De ọmwa ne ọ gha miẹn uhunmwu vbe obọ ohu ẹre nọkhua? Ọ hihiẹ ohu ẹre ne ọ baa vbe erhẹn ladian, avbe okuta nekhua rẹnkhẹn uan iran khian ebubẹ vbe odaro ẹre.

⁷ E Nọyaẹnmwa wa maa ọ degue avbe emwa rẹn vbe ẹghẹ ibaro; ọ gbe aro ghe iran ni lẹ bu ẹre rre.

⁸ Ọ fuẹn avbe eghian rẹn uan fẹẹrẹ, zẹ vbe orogho nọkhua ne ọ khọn khian, iran ni gbe odan ghe ẹre, ọ gha wa viọ iran la uwu.

⁹ De uma ne uwa si ghe Nọyaẹnmwa yi? Ọ gha fuẹn uwa a. A i miẹn ne ọ sẹtin gbe odan ghe ẹre gberra uhukpa.

¹⁰ A gha giẹn uwa a, zẹ vbe igban ni kinnọ egbe kevbe ebe ne ọ kakae.

¹¹ E Ninevi ehe ne u ye ọ re okpia ọkpa kegha dee, ọmwa ne ọ vuọn ne uma dan, rẹn keghi vbe khuan khẹ e Nọyaẹnmwa.

¹² Vbenian ọ re Nọyaẹnmwa tama ivbi Izrẹl ne emwa rẹn: “A gha rhe miẹn wẹ ivbi Asiria wegbe, iran vbe bun, a gha fuẹn iran an, a ghi ho iran bẹkun. Wa ne emwa mwẹ, I gie uwa sẹ usẹ, sokpan, I i ghi dọlegbe ru ẹe vberriọ.

¹³ I gha dobọ ẹtin ne Asiria mwẹ vbe uhunmwu uwa yi, I ghi vbe bunnọ ọgiọrọ ne ọ ya munọ uwa gbalọ.”

¹⁴ Ẹmwẹ ne Nọyaẹnmwa ye ẹre iyi vbe ekpa Asiria ọ re ọna khin: “Iran i ra miẹn ivbi uniẹn iran ne ọ gha khuẹnniẹn eni iran khian, I gha guọghọ ehia ighe avbe amazẹ ni rre aro ẹbọ iran. I fian idin ye otọ khẹ ivbi Asiria nẹ. Ọ ma kei ne iran di agbọn ya.”

¹⁵ Ghe vbe odibo ọkpa rhie iyẹn ne ọ maa ke avbe uhunmwu oke ni yo dee! Ọ dee do na iyẹn akhọnmiotọ! Wa ne ivbi e Juda, wa do ugie emwiukpo uwa ne uwa ha emwi ne uwa ye ekhọe uwa ve ne Nọyaẹnmwa. Emwa dan i ghi dọlegbe mu okuo la otọ uwa ọvbehe. A fuẹn iran an nẹ fẹẹrẹ.