Matiu 9 - Edo Bible (E Baibol Ẹdo) Version 1996

Jesu Sinmwi Omwa Ne Aro Kinmwi

¹ Jesu keghi la okọ, ọ na fian odighi rra gha rrie ẹvbo ẹre.

² Emwa eso keghi ya ewa dada ọmwa ọkpa ne arọ kinmwi bu ẹre rre. Jesu miẹn wẹ iran wa mwẹ iyayi, ọ keghi tama ọmwa ne arọ kinmwi ni wẹẹ, “Ovbi mwẹ dọlọ aro yi vbe uhunmwu. A ye avbe orukhọ ruẹ hia bọọ.”

³ Eso vbe uwu avbe Ọmaemwa uhi keghi suẹn gha gu egbe iran guan wẹẹ, “Okona fi unu gie Osanobua!”

⁴ Jesu rẹn iro ne iran zẹ, ọ keghi kha wẹẹ, “Vbọzẹ ne uwa na ro iro dan na yi?

⁵ De ne ọ fu egbe sẹẹ. Ne a kha wẹẹ, ‘A ye avbe orukhọ ruẹ bọọ’ ra ‘Kpaegbe ne u gha khian?’

⁶ I gha rhie ma uwa nian ighe Ovbi Ọmwa mwẹ asẹ ne a ya ye orukhọ bọ ọmwa.” Ọ keghi tama ọmwa ne arọ kinmwi ni, “Kpaegbe, tọn ukpo ruẹ mu ne u gha rrie owa!”

⁷ Okpia ni keghi guakpao, ọ na gha rrie.

⁸ Ugbẹn vbe avbe emwa ni ghi miẹn emwi na, ohan mu iran, iran keghi rho Osanobua vbe uyi ye ne ọ na rhie egbe ẹtin vberriọ ne emwa.

Jesu Tie Matiu

⁹ Jesu keghi kpao vbe evba rre, ugbẹn vbe ọ ghi khian ọ miẹn okpia ọkpa ne a tiẹre Matiu, ọ tota ye ehe ne ọ na koko igho uhunmwu. Ọ keghi khama rẹn wẹẹ, “Lele mwẹ.” Matiu keghi guakpao, ọ na lelẹe.

¹⁰ Jesu ghi rri evbare vbe owa ẹre, nibun vbe uwu iran ni koko igho uhunmwu kevbe avbe ẹwobi emwa keghi rre, iran deba irẹn kevbe erhuanegbe ẹre gha rri evbare.

¹¹ Ugbẹn vbe eso vbe uwu avbe Farisi ghi miẹn ọna, iran khama avbe erhuanegbe ẹre wẹẹ, “Vbọzẹ ne arowa uwa na gu avbe emwa vberriọ rri evbare yi?”

¹² Jesu ghi họn, ọ tama iran wẹẹ, “Ọmwa ne egbe rran rẹn i bu ọbo, sokpan iran nikhuọnmwi.

¹³ Wa gualotọ emwi ne a ya ẹmwẹ ne ọ rre ebe nọhuanrẹn na kha, ‘I ma wẹ ne uwa ye aranmwẹ zọ ese ghe mwẹ, itohan ọre iho.’ I ma rre do tie avbe adazẹ vbe ẹ i re avbe ẹwobi emwa.”

Ẹmwẹ Aguẹ

¹⁴ Avbe erhuanegbe Jọn ne Ọsamẹ keghi bu Jesu gha dee do nọ rẹn wẹẹ, “Vbe a na miẹn hẹ yi wẹ, ma kevbe avbe Farisi wa yo aguẹ ẹghẹ hia sokpan, erhuanegbe ruẹ i yo hiehie?”

¹⁵ Jesu wanniẹn tama iran wẹẹ, “Wa yayi ighe ọ kere ne emwa ne a tie do rri evbare irhiọha gha khiẹ vbe ọdafẹn ọha rre evba ra? Hiehie re! Sokpan ẹghẹ dee ne a gha na rhie ọdafẹn ọha hin ehe ne iran ye rre, ẹghẹ ni, iran sẹtin gha ya ohanmwẹ rrie egbe.

¹⁶ Ọmwa i ra rhie ukpọn ọgbọngbọn ya te ẹwu nọ rẹnhuan nẹ, rhunmwuda, te ne a ya tẹe ni ra yuo fua vbọ, ukpọn ni ghi vbe dọlegbe yanghan sẹ ayọ.

¹⁷ Erriọ vbe nọ, a i ra ruẹn ayọn ne ọ he ye fian ye ọgọ ohian ne ọ rẹnhuan nẹ, a gha ruẹe vberriọ, te ọgọ ni ra sa fua. Nene ayọn kevbe ọgọ ghi koko la ọrhiae rrie. A gha ruẹn ayọn ne ọ fian ye ọgọ ọgbọn, eveva ghi gu egbe ro.”

Ọmọ Okhuo ọghe Olotu Avbe Ju, Kevbe Okhuo Ne Ọ Yobọ Kan Ukpon Jesu

¹⁸ Vbene Jesu he wa ye guan, olotu avbe Ju ọkpa bu ẹre rre, ọ diguẹ nẹẹn, ọ wẹẹ, “Enọwanrẹn te ovbi mwẹ nokhuo wa da kpan udu na, sokpan, gha dee do rhie obọ ruẹ yan rẹn, ọ gha ye fe.”

¹⁹ Jesu keghi wa kpaegbe lelẹe, avbe erhuanegbe ẹre keghi vbe lelẹe gha khian.

²⁰ Okhuo ọkpa keghi rre evba ne ọ he ya ukpo iweva khuọnmwi emianmwẹ esagiẹn ne ọ tue, ọ keghi la odieke sikẹ Jesu, ọ na ya obọ kan ehọ ukpọn rẹn.

²¹ Rhunmwuda te irẹn wa gha tae wẹ, “I gha sẹtin ya obọ kan ukpọn rẹn, egbe gha rran mwẹ.”

²² Jesu keghi fi egbe werriẹ, ugbẹn vbe ọ ghi bẹghe ẹre ọ tama rẹn wẹẹ, “Ovbi mwẹ dọlọ aro yi vbe uhunmwu, iyayi ruẹ muẹn egbe rran nẹ.” Vbe ọwarọkpa ni, egbe keghi wa rran okhuo ni.

²³ Iyeke ọnii, ọre Jesu na gha rri owa olotu ni, ọ keghi do vba iran ni kpe ema irorinmwi kevbe emwa nibun ni hẹ yo hẹ rre.

²⁴ Ọ keghi tama iran wẹẹ, “Wa hẹ ọre hin emwa rre, ọmọ na ma wu, te ọ vbiẹ.” Iran hia kegha giọe.

²⁵ Ọ ghi khulo iran hia ladian nẹ, Jesu keghi la ughugha ne ọmọ ni ye, ọ keghi si ẹre obọ, ọmọ ni keghi kpaegbe.

²⁶ Iyẹn na keghi titi gba otọe ni hia.

Jesu Sinmwi Arhuaro Eva

²⁷ Jesu keghi kpa vbe evba rre, ugbẹn vbe ọ ghi khian, arhuaro eva keghi lelẹe, iran datu wẹẹ, “Ovbi e Devid, tohan mwa.”

²⁸ Ugbẹn vbe Jesu ghi la uwu owa, avbe arhuaro ni na bu ẹre gha dee, Jesu keghi nọ iran wẹẹ, “Wa yayi ighe mẹ gha sẹtin ruẹe?” Iran wanniẹn tama rẹn wẹẹ, “Ma yayi Nọwanrẹn.”

²⁹ Jesu keghi yobọ kan iran aro ọ wẹẹ, “Gie ẹe gha ye vbene iyayi uwa ho ẹre yi.”

³⁰ Aro iran keghi rhan. Jesu na tua unu muẹn tama iran wẹẹ, “Wa ghẹ tama ọmwa rhọkpa!”

³¹ Sokpan ugbẹn vbe iran ghi kpao vbe evba, iran keghi na iyẹn Jesu gba ikinkin ni hia.

Jesu Sinmwi Odin

³² Ugbẹn vbe iran na ghi wa kpao vbe evba rre, emwa eso keghi mu okpia ọkpa ne ẹ i sẹtin guan rhunmwuda ighe ọmwa orhiọn esu bu Jesu rre.

³³ Ọ ghi khu nene orhiọn esu ladian nẹ, okpia ni keghi suẹn gha guan. Unu keghi yan emwa hia, iran wẹẹ, “A ma he miẹn egbe emwi vbenian vbe Izrẹl ẹdẹ.”

³⁴ Sokpan avbe Farisi keghi kha wẹẹ, “Olotu avbe orhiọn esu ọre ọ rhie ẹtin nẹẹn ne ọ ya gha khulo avbe orhiọn esu ladian.”

Jesu Tohan Emwa

³⁵ Jesu keghi suẹn gha lele avbe ẹvbo nekhua kevbe ne giẹre ni rre enii khian, ọ kegha ma iran emwi vbe dọmwadẹ Ọgua ediọn, ọ keghi kporhu Iyẹn Ne ọ maa ọghe Arriọba Osanobua. Ọ keghi mu iran hia ni khuọnmwi kevbe ni huẹhuẹ egbe rran.

³⁶ Ugbẹn vbe ọ ghi miẹn avbe emwa ni gbe ẹbu, ekhọe ẹre keghi vuọn ne agiẹngiẹn, rhunmwuda ehia wa khọn yo khọn rre zẹ vbe ohuan ne ẹ i mwẹ nọ suẹe.

³⁷ Rhunmwuda ọnii, ọ tama avbe erhuanegbe ẹre wẹẹ, “Emwiorhọ bun ẹsẹse sokpan emwa ni rhọ emwiokọ ma sẹ hiehiere.

³⁸ Wa na erhunmwu ne Nọyaẹnmwa gie emwa nibun gha dee ne iran do rhọ emwiorhọ la owa.”