Matiu 8 - Edo Bible (E Baibol Ẹdo) Version 1996

Jesu Sinmwi Okhọnmwọ Alalọ

¹ Jesu ghi tuorre vbe uhunmwu oke, emwa hia keghi vẹ lelẹe.

² Ọmwa ọkpa ne ọre ọkhọmwọ alalọ keghi bu ẹre rre, ọ keghi diguẹ nẹẹn, ọ wẹẹ, “Dọmọ o, deghẹ u hoo, u gha sẹtin sinmwi mwẹ.”

³ Jesu keghi nien obọ ya kan rẹn, ọ wẹẹ, “I wa ho ne egbe rran ruẹn.” Vbe ọwarọkpa ni, alalọ ni keghi lahin ẹre egbe rre.

⁴ Jesu keghi tama rẹn wẹẹ, “Danmwehọ, ghẹ tama ọmwa rhọkpa. Wa bu ohẹn gha khian nian ne ọ ghe ruẹ egbe, ya zọ ese ne Mosis fian yọ ne emwa miẹn ehe na rẹn ghe egbe rran ruẹn nẹ.”

Ọguọmwadia Ọkaokuo E Rom

⁵ Ugbẹn vbe Jesu ghi wa lao Kapaniọn, ọkaokuo e Rom ọkpa bu ẹre rre do nọ iyobọ, ọ wẹẹ,

⁶ “Dọmọ o, ọguọmwadia mwẹ ọkpa khuọnmwi vbe owa, obọ wa dae, ẹ i sẹtin kpaegbe, ẹ i sẹtin fiegbe werriẹ.”

⁷ Jesu keghi tama rẹn wẹẹ, “I de ne I do mu ẹre gbe rran.”

⁸ Ọkaokuo na wanniẹn tama rẹn wẹẹ, “Ẹ i re vberriọ, mẹ ma sẹ ne u gha bu gha die owa. Ke emwa na guan gha khian, egbe gha rran ọguọmwadia mwẹ.

⁹ Mẹ mwẹ emwa ne I gie mwẹ uhunmwu, I vbe mwẹ ne imẹ gie ẹre uhunmwu, I gha wẹ ne ọna gha khian, ọ ghi gha khian, I ghi vbe wẹ ọna gha dee, ọ ghi gha dee, I ghi vbe tama ọviẹn mwẹ wẹẹ, ‘Ru emwi na, ọ ghi gele ruẹe.’ ”

¹⁰ Ẹmwẹ na keghi wa yan Jesu unu an vbe ọ họẹn, ọ keghi tama iran ni lelẹe khian wẹẹ, “I ma he miẹn ọmwa ne ọ mwẹ iyayi vbenian vbe avbe emwa Izrẹl.

¹¹ Ne I tama uwa, emwa nibun gha ke ọlarre owẹn kevbe ọlarrie owẹn rre, iran ghi gu Ebraham, kevbe Aizik kevbe Jekọb tota rri evbare vbe Arriọba ẹrinmwi.

¹² A ghi khulo iran ne a mobọ roro ighe ọ yan nene Arriọba ku uwu ebiebi vbe ore. Iran ghi gha viẹ, iran, ghi gha rriakọn khuara vbe evba.”

¹³ Jesu keghi tama ọkaokuo ni wẹẹ, “Gha khian ọ gha sẹ nuẹn vbene u yayi.” Egbe keghi wa rran ọguọmwadia ọkaokuo ni vbe ọwarọkpa.

Jesu Sinmwi Emwa Nibun

¹⁴ Jesu kegha rrie owa Pita, Ọ keghi do vba iye amwẹ Pita lovbiẹ rhunmwuda emwirraro ruẹe.

¹⁵ Jesu keghi ya obọ kan rẹn obọ, emwirraro ni na wa sọrae. Rẹn keghi guakpao, ọ na mu ọghọ ye iran egbe.

¹⁶ Ugbẹn vbe ọ ghi sẹ ota, iran keghi viọ emwa nibun ni mwẹ orhiọn esu bu Jesu rre. Rẹn keghi ya ẹmwẹ unu khulo avbe orhiọn esu ni ladian, ọ keghi sinmwi iran nikhuọnmwi hia.

¹⁷ Jesu ru avbe emwi na, ne ẹmwẹ ne akhasẹ Aizaia tae miẹn ehe na sẹ wẹẹ, “Rẹn tobọre ọre ọ viọ emianmwẹ mwa, ọ keghi vbe viọ ohuẹhuẹ mwa hia gha rrie.”

Emwa Ni Te Ra Lele Jesu

¹⁸ Jesu ghi miẹn wẹ emwa wa vbe gbe ẹbu lẹga irẹn, ọ na wẹ ne iran fian odighi gberra ghe obọ nọkpa.

¹⁹ Ọma emwa Uhi ọkpa keghi bu ẹre rre, ọ wẹẹ, “Ọmamwa ne ọ ma emwa Uhi, I ho ne I gha leluẹ le ehe ne u rhirhi a gha rrie.”

²⁰ Jesu wanniẹn tama rẹn wẹẹ, “Avbe umuọkhọkhọ mwẹ uvun, avbe ahianmwẹ vbe mwẹ okọ, sokpan Ovbi Ọmwa i mwẹ ehe ne ọ mu uhunmwu yan hẹwẹ.”

²¹ Ọmwa ọkpa ne ọ vbe re ọrhuanegbe tama rẹn wẹẹ, “Nọyaẹnmwa gun mwẹ ka ya re orinmwi erhamwẹ nẹ.”

²² Jesu wanniẹn tama rẹn wẹẹ, “Lele mwẹ ne u gie avbe orinmwi gha re e emwa ni wulo iran.”

Jesu Dọ Ẹhoho Yọ

²³ Ugbẹn vbe Jesu ghi la okọ, avbe erhuanegbe ẹre keghi vbe lelẹe.

²⁴ Vbe udomwurri, okpẹhoho keghi wa suẹn gha la vbe odighi nii, amẹ na gha vẹ la okọ sokpan Jesu kegha vbiẹ.

²⁵ Avbe erhuanegbe keghi ya huẹn ọnrẹn, iran wẹẹ, “Nọyaẹnmwa, burre ighe ma wiri.”

²⁶ Jesu tama iran wẹẹ, “Vbọzẹ ne uwa na runran vberriọ yi, wa i mwẹ iyayi.” Ọ keghi kpaegbe, ọ gu amẹ kevbe ẹhoho ni guan, ehia keghi hunwan hii i!

²⁷ Unu keghi yan emwa hia, iran wẹẹ, “De ama ọmwa ne ọna khin, ne ẹhoho kevbe amẹ họn ẹmwẹ ọnrẹn na?”

Jesu Sinmwi Arhiẹn Eva Ni Mwẹ Orhiọn Esu

²⁸ Jesu keghi fian odighi rra gha rrie ẹvbo Gadara. Arhiẹn eva keghi ke uwu uvun okuta ni rre itẹ ladian bu ẹre gha dee. Iran na mwẹ orhiọn esu. Iran khọ sẹrriọ wẹ a i ghi miẹn ne ohan giee la odẹ ni.

²⁹ Iran keghi datu vbe udomwurri wẹẹ, “Vbọ kan ima kan ruẹn yi, wẹ ne Ovbi Osanobua? Te u rre do rri ima oya khẹ ọ dee ra?”

³⁰ Oghẹn esiebo ọkpa keghi sikẹ evba, iran gha rri irunmwu.

³¹ Avbe orhiọn esu ni keghi rinmwian Jesu wẹ, “Deghẹ te u ra khulo ima ladian, gie ima ya la uwu avbe esiebo ni.”

³² Jesu keghi khama iran wẹẹ, “Wa gha khian.” Iran keghi ladian, iran na la uwu avbe esiebo ni, ehia keghi wa khọn lele ehanhan oke la uwu ẹzẹ, ehia na wulo ye uwu ẹzẹ.

³³ Iran ni te gbe aro ghe avbe esiebo ni keghi rhulẹ gha rrie ore ẹvbo ya kha emwi ne aro iran miẹn kevbe emwi ne ọ sunu vbe egbe emwa ni te mwẹ orhiọn esu ni.

³⁴ Emwa ẹvbo ni hia keghi vẹ bu Jesu gha dee. Iran ghi miẹn ọẹn, iran rinmwian ne ọ kpao hin iran ẹvbo rre.