Matiu 7 - Edo Bible (E Baibol Ẹdo) Version 1996

Ohiẹn Ẹrrẹe

¹ “Wa ghẹ buohiẹn ẹrrẹ, ne Osanobua ghẹ vbe bu ohiẹn uwa.

² Rhunmwuda vbene uwa ya bu ohiẹn ẹrrẹ, ọre Osanobua ra vbe ya bu ọghe uwa. Omwa ne uwa ya mwa ne ẹrrẹ, ọre a ra vbe ya mwa ne uwa.

³ Vbọzẹ ne uwẹ na ghe iku erhan ne ọ rre ọtuẹn aro yi vbe u ma zẹye ẹmwẹ ike erhan ne ọ rre uwẹ aro?

⁴ Ekhue imuẹn vbe uwẹ a khama ọtuẹn wẹẹ, ‘Gunmwẹ rhie iku erhan hin ruẹn aro rre,’ ugbẹn vbe ike erhan rre uwẹ aro?

⁵ Wẹ ne ayunukpaegbe! Ka mu ike erhan hin aro ruẹ rre nẹ, erriọ ọre u gha na bẹghe odẹ ya rhie iku erhan hin ọtuẹn aro rre.

⁶ “Ghẹ rhie emwi nọhuanrẹn ne ekita, te ọ ra gha gbọọ ruẹ kẹkan. Ghẹ rhie emwi uzọmọ ye odaro esiebo, te ọ ra ya owẹ rri ẹe ginna otọ.

Nọọn, Gualọ, Sobọ

⁷ “Nọọn, ọ gha suọ obọ, gualọ, u gha miẹn, sobọ, a gha kie nuẹn.

⁸ Rhunmwuda ne ọ nọrẹn ọre a rhie na, ne ọ gualọe ọre ọ miẹn, ne ọ sobọ ọre a kie na.

⁹ Wa ne erha emọ, ovbi uwa gha nọ uwa eka, wa gha mu okuta ye ọre obọ ra.

¹⁰ Ra wa gha rhie ẹyẹn ne ne ọ nọ ehẹn?

¹¹ Vbene uwa ghi vbe rhia sẹ, wa ye rẹn ya gha rhie emwi ne ọ maa ne ivbi uwa, wa ma ghi la evba rẹn ighe Erha uwa ne ọ rre ẹrinmwi gha viọ emwi esi ne iran ni nọrẹn vbe obọ ẹre.

¹² “Ru ne emwa ọvbehe egbe emwi ne uwẹ ho ne iran ru ne uwẹ. Emwi na ya Uhi Mosis kevbe avbe akhasẹ kha ọre ọnii khin.

Odẹ Ne Wẹnrẹn

¹³ “Wa la onurho ne wẹnrẹn la owa, rhunmwuda, te onurho ẹrinmwi erhẹn ye gbodoo, odẹ ne a la sọe vbe rriẹ, emwa ni lae wa vbe bun.

¹⁴ Sokpan te onurho arrọọ ye wẹnrẹn, odẹ ne a la sọe ma vbe rriẹ, ibozẹghẹ ọre ọ vbe lae.

Erhan Kevbe Ọmọ Ne Ọmọẹn

¹⁵ “Wa gha ba avbe akhasẹ ohoghe. Iran gha mu akpa ohuan khuẹrhẹ yọ bu uwa rre, sokpan oduma dan iran wa khọ vbe uwu egbe.

¹⁶ Uyinmwẹ iran ọre uwa gha ya rẹn iran. Ọkhuẹnkhuẹn i mọ azara ra ne ogigban mọ ohọ.

¹⁷ Erhan esi ọre ọmọ ọmọ esi, erhan dan ọre ọ vbe mọ ọmọ dan.

¹⁸ Erhan esi i sẹtin mọ ọmọ dan, erhan dan i sẹtin mọ ọmọ esi.

¹⁹ Erhan ne ọ ma mọ ọmọ esi, a gha tọẹn gbe otọ, a ghi hiọrọe fi erhẹn.

²⁰ Uyinmwẹ iran ọre uwa gha ya rẹn avbe akhasẹ ohoghe na.

I Ma Rẹn Uwa

²¹ “Ẹ i re emwa hia ni tie mwẹ ‘Nọyaẹnmwa, Nọyaẹnmwa’ ọre ọ gha la Arriọba Osanobua, sokpan emwa ni ru iho erha mwẹ ne ọ rre ẹrinmwi.

²² Ogha sẹ ẹdẹ ne a kha na, emwa nibun gha khama mwẹ wẹẹ, ‘Nọyaẹnmwa, Nọyaẹnmwa, ma ya eni ruẹn kporhu Osanobua. Ma khulo orhiọn dan nibun ladian. Ma winna iwinna ọyunnuan nibun vbe eni ruẹn.’

²³ Ẹghẹ ni ọre I gha na tama iran wẹẹ, ‘I ma rẹn uwa, wa ladian mwa, wa ni winna iwinna orukhọ.’

Arhiẹn Eva Ni Bọ Owa

²⁴ “Rhunmwuda ọnii, ọmwaikọmwa ne ọ họn ẹmwẹ mwẹ na, ọ na vbe yae gha yin, I gha yae gie umẹwaẹn ọkpa ne ọ bọ owa yan okuta.

²⁵ Okpamẹ keghi daa, ezẹ hia keghi ro dinna oke, ẹhoho keghi dekun owa ni, sokpan ọ ma de rhunmwuda okuta ọre a bọe yan.

²⁶ Sokpan ọmwaikọmwa ne ọ họn ẹmwẹ na ighe ọ ma yae yin, I gha yae gie ọzuọ ọkpa ne ọ bọ owa ẹre yan uzekhae.

²⁷ Okpamẹ keghi daa, ẹzẹ hia keghi ro dinna oke, ẹhoho keghi dekun owa ni, ọ keghi de, ọ na rẹnkhuan.”

Asẹ Ọghe Jesu

²⁸ Ugbẹn vbe Jesu ghi guan ẹmwẹ na hia nẹ, unu keghi yan emwa ni rre evba rhunmwuda, vbene ọ ya ma emwa emwi hẹ.

²⁹ Ọ ma ye vbe iran ni ma emwa Uhi. Ẹmwẹ asẹ ọghe obọ ẹre ọre ọ ta.