Matiu 6 - Edo Bible (E Baibol Ẹdo) Version 1996

Ẹmwẹ Ẹse Ne A Ru

¹ “Mu egbe ruẹ ye ọghọ ne iwinna ugamwẹ iyayi ruẹ ghẹ gha re ọghe nababẹghe mwẹ, ọ gha khian ọghe ne a ya voro vberriọ nẹ, Erhaa ne ọ rre ẹrinmwi i ghi san ruẹ ẹse.

² “Rhunmwuda ọnii, u gha rhie emwi ne nẹi mwẹ, ghẹ yae khian wa do ghe, zẹ vbe ne avbe iran ni zẹ imamase ru vbe ada kevbe Ọgua ediọn. Te iran ruẹe ne a ba gha tian iran. Ere ne ọ rrọọ ne iran wa vbe fo nẹ vbe vba.

³ U gha ru ẹse ne nẹi mwẹ, giee gha re uma uwẹ vbe ọre ọkpa, vbe ne ose ruẹ ne ọ sikẹ ruẹ sẹ i na rẹn.

⁴ Erhaa ne ọ bẹghe emwi ne u ru vbe ẹkhokho de ra do san ruẹ ẹse.

Ẹmwẹ Erhunmwu Ne A Na

⁵ “U gha na erhunmwu, ghẹ ya egbe ta avbe ni zẹ imamase ni mudia na erhunmwu vbe Ọgua ediọn kevbe ihuada ne agbọn miẹn ehe na gha dẹghe iran, Ne I tama uwa, ere ne ọ rre iran re wa vbe fo ye evba nẹ.

⁶ Sokpan wẹ gha ra na erhunmwu, la ughugha ruẹ, khui urho, na erhunmwu ghe Erhaa ne a i bẹghe. Erhaa ne ọ bẹghe emwi ne u ru vbe ẹkhokho, gha san ruẹn ẹse.

⁷ “U gha na erhunmwu, ghẹ gha talọ kpẹrẹ vbe ne iran ne enigẹbọ ru. Iran ro wẹẹ erhunmwu gha tan ọre Osanobua gha na họn erhunmwu iran.

⁸ Wa ghẹ ye egbe ta iran. Erha uwa rẹn emwi ne uwa i mwẹ nẹ wa te do nọ rẹn.

⁹ Vbenian ọre uwa ya gha na erhunmwu, “ ‘Erha mwa ne ọ rre ẹrinmwi: Gia ya ọghọ ne eni ruẹ nọhuanrẹn,

¹⁰ gie Arriọba ruẹ rre, gia gha ru iho ruẹ vbe agbọn vbe ne iran ru vbe ẹrinmwi.

¹¹ Rhie evbare ne ọ sẹe ne ima ẹre na.

¹² Ya orukhọ mwa hia bọ mwa, vbe ne ima ya bọ enirumwakhọ.

¹³ Ghẹ gia danmwẹ mwa ghe, rhie mwa lẹre hin obọ Ọkaẹrhia Nii.’

¹⁴ “Wa gha ya emwi ne emwa ru uwa re khọ bọ iran, erha uwa ne ọ rre ẹrinmwi gha vbe ya bọ uwa.

¹⁵ Sokpan, deghẹ wa ma ya bọ emwa ni ru uwa khọọ, Erha uwa ne ọ rre ẹrinmwi i vbe ya orukhọ uwa bọ uwa.

Vbekpa Aguẹ Ra Ilọnu

¹⁶ “Wẹ gha rre aguẹ, ghẹ suku aro ua vbene avbe ni zẹ imamase ru. Iran ghi sẹ ohanmwẹ ye aro vbe iran a gha khian vbe adesẹ ore ẹvbo, vbene agbọn hia gha na rẹn ighe aguẹ iran ye. Ne I tama uwa, ere ne ọ rre iran re wa vbe fo ye evba nẹ.

¹⁷ Wẹ gha rre aguẹ, sa amẹ kpe aro ua, salọ eto ruẹ,

¹⁸ ne emwa ọvbehe ghẹ rẹn ighe aguẹ ọre u ye, na miẹn wẹ Erhaa ne a i bẹghe ọkpa ọre ọ rẹnrẹn. Erhaa ne ọ rẹn emwi ne u ru vbe ẹkhokho gha san ruẹn ẹse.

Ẹfe Vbe Ẹrinmwi

¹⁹ “Wa ghẹ si ẹfe koko ye agbọn na ne egbe ruẹ, ehe ne ọkhọe kevbe ọtọn na sẹtin rhia rua, ehe ne avbe oyi na gbe urho ya gha rhaa.

²⁰ Sokpan wa si ẹfe koko ye ẹrinmwi, ehe ne ọkhọe kevbe ọtọn i na sẹtin mu ẹn rhiaa, ehe ne avbe oyi i na gbe urho ya gha rhaa.

²¹ Rhunmwuda ehe ne ẹfe uwa ye ọre ekhọe uwa gha vbe gha ye ẹghẹ hia.

Uwanmwẹ Egbe

²² “Aro ọrọre uwanmwẹ egbe, a deghẹ aro ruẹ hianrẹn, egbe ruẹ hia ghi vuọn ne uwanmwẹ.

²³ Sokpan a deghẹ aro ruẹ i maa, ikinnegbe ruẹ hia ghi gha rre uwu ebiebi, u miẹn vbe ebiebi ni gha mu ohan sẹ hẹẹ!

Osanobua Kevbe Emwi Ne A Mwẹ

²⁴ “Orhunmwu ọkpa ne ọ gha sẹtin ga arowa eva, ẹ i rrọọ. Ọ gha ho ẹmwẹ ọkpa, ọ ghi gha khuiwu enogieva, ọ gha họn ẹmwẹ ne ọkpa, ọ ghi gha yan enọkpa zẹ, wẹ i sẹtin ga Osanobua ga igho.

²⁵ “Ọ na ọ zẹẹ ne I na khama uwa wẹẹ, ne uwa ghẹ hagha ba ẹmwẹ emwi ne uwa gha re ra ne uwa gha da ya da orhiọn yi, ra ba ẹmwẹ ukpọn ẹkun. Tama mwẹ, orhiọn ma sẹ evbare? Egbe ma sẹ ukpọn?

²⁶ Wa ghe avbe ahianmwẹ ni tin yo tin rre. Iran i kọ, iran i rhọ, iran i mwẹ erru. Erha uwa ne ọ rre ẹrinmwi ọre ọ koko iran. Ive ne ọ rre uwa uhunmwu ma ye ọgbin igho sẹ ọghe ahianmwẹ ra!

²⁷ De ọmwa ne ọ gha sẹtin ye ohawa fian ba utọmwẹ ọnrẹn vbe uwu uwa?

²⁸ “Vbọzẹ ne uwa na si osi ba ẹmwẹ ukpọn? Wa ghe vbene avbe obobo ni rre oha wan hẹẹ, iran i winna, iran i do ukpọn ne egbe iran.

²⁹ Ne I tama uwa wẹẹ, vbene Solomọn ghi vbe fe sẹ, ọ ma gha mwẹ ukpọn ne ọ mose vba ọkpa vbe uwu avbe obobo na.

³⁰ Osanobua ọre ọ rhuan iran ukpọn ighe avbe irunmwu ne oha na, irunmwu nọ gha wan rre ẹre na, akhuẹ a giagiae hẹ ku erhẹn. Wa ma ghi la evba rẹn ighe ẹ i mwẹ ọ ma rhuan uwa ukpọn! Iyayi uwa kanmwa gbe.

³¹ “Rhunmwuda ọnii, wa ghẹ ghi si osi ba ẹmwẹ vbia gha re e? Vbia gha da? Vbia gha rhuan?

³² (Emwi na hia ọre enimayayi si osi ba.) Erha uwa ne ọ rre ẹrinmwi rẹnrẹn ighe ẹ i mwẹ amamwẹ ọnrẹn avbe emwi na hia khin ne uwa.

³³ Emwi ne uwa gha ru ọrọre ne uwa ka mu aro ye ẹmwẹ Arriọba Osanobua kẹe kevbe emwi ni lelẹe khian nẹ, rẹn gha ye emwi ni ghi dekẹe hia sẹ uwa ọkẹn.

³⁴ Rhunmwuda ọnii, wa ghẹ mu udu kee ba ẹmwẹ ẹdẹ na khuẹ. Akhuẹ gha vbe gha mwẹ oyanghan ọghe obọ re. Ọma kei ne a vbe silo ivboo gbe orueghe ne ikpẹdẹ ọkpọkpa hẹ mwẹ obọ rre.