Matiu 5 - Edo Bible (E Baibol Ẹdo) Version 1996

Ikporhu Vbe Uhunmwu Oke

¹ Jesu ghi miẹn ẹvbo ni gbe ẹbu, ọ keghi hin uhunmwu oke, avbe erhuanegbe keghi tota lẹga ẹre,

² ọ keghi suẹn gha ma iran emwi, ọ wẹẹ:

Ọyẹnmwẹ Ẹmwata

³ “Ọ maa ne iran ni rẹnrẹn ighe ivbiogue iran khin vbe orhiọn, iran ọre ọ yan Arriọba ẹrinmwi!

⁴ Ọ maa ne iran ni khiẹ, Osanobua gha fu iran ẹko rre!

⁵ Ọ maa ne iran ni fu, iran ọre emwi ne Osanobua ve gha sẹ ọre obọ!

⁶ Ọ maa ne iran ni rhiegba ye ẹmwẹ ne a ru nọ yẹ Osa, Osanobua gha gie ẹko vuọn iran fẹfẹfẹ!

⁷ Ọ maa ne iran ni tohan emwa ọvbehe, Osanobua gha tohan iran!

⁸ Ọ maa ne iran ne ekhọe ẹre hianrẹn, iran gha miẹn Osanobua aro!

⁹ Ọ maa ne iran ni gualọ ọfumwegbe emwa, Osanobua gha tie iran ivbi irẹn!

¹⁰ Ọ maa ne iran ne a zẹ ọre owẹ, rhunmwuda ighe iran ru ne Osanobua ho, iran ọre ọ yan Arriọba ẹrinmwi.

¹¹ “Ọ maa ne uwa vbe emwa a gha zan uwa, vbe iran a gha zẹ uwa owẹ, ighe iran vbe ba uwa ẹmwẹ, rhunmwuda ighe wa re emwa ni lele mwẹ.

¹² Wa gha ghọghọ, wa gie ẹko gha sẹ uwa ọyẹnmwẹ rhunmwuda, ere nọkhua ọre ọ rre otọ khẹ uwa vbe ẹrinmwi. Erriọ zẹe emwa vbe ya obọ dan mu avbe akhasẹ ni ke odaro ne uwa.

Umwẹ Kevbe Uwanmwẹ

¹³ “Wa ọrọre umwẹ agbọn, a deghẹ orhiẹnrhiẹn umwẹ fafaa, a i miẹn emwi ne a gha ya ru ẹe ne ọ dọlegbe gha rhiẹnrhiẹn, ọ la ọrhiae rrie nẹ. Te a ghi ra mu ẹn kua ne emwa gha ya owẹ rri ẹe mu otọ.

¹⁴ “Wa ọrọre uwanmwẹ agbọn na hia, ẹvbo ne a bọ ye uhunmwu oke i gia rhie lẹre.

¹⁵ A i ra rhukpa nẹ ne a ya ọkpan rhuẹe ginna otọ, erhan ọmukpa ọre a mu ẹn yan ne emwa ni rre owa hia miẹn ehe na yae gha bẹghe odẹ.

¹⁶ Erriọ nọ zẹẹ, wa gie ukpa rua gha ba ẹse vbe odaro agbọn, ne iran miẹn ehe na lekpa uyinmwẹ esi ne uwa yin gha rho erha uwa ne ọ rre ẹrinmwi vbe uyi.

Iruemwi Vbekpa Uhi

¹⁷ “Wa ghẹ ro ighe te imẹ rre do gbe ukhu Uhi e Mosis kevbe ẹmwẹ avbe akhasẹ rua. I ma rre do gbe ukhu ẹre rua, te I rre do rhie ugue yọ.

¹⁸ Ne I tama uwa, omwa vbene ẹrinmwi vbe agbọn na he ye rrọọ, a i ra vbọ irọn ọkpa fua vbe egbe uhi rhinrin a te do miẹn wẹ emwi hia sẹ ufomwẹ.

¹⁹ Rhunmwuda ọnii, ọmwaikọmwa ne ọ rra ọkpa ne ọ kanmwa sẹ vbe uwu avbe Uhi na, ọ na vbe ma emwa ọvbehe re ne iran ru vberriọ, rẹn ọre ọ gha re ne ọ kanmwa sẹ vbe Arriọba ẹrinmwi. Odẹ nogieva, ọmwaikọmwa ne ọ mu avbe uhi na sẹ, ọ na vbe ma emwa ọvbehe re ne iran ru vberriọ, rẹn ghi gha re ne ọkpọlọ ẹsẹse vbe Arriọba ẹrinmwi.

²⁰ Ne I tama uwa, deghẹ ẹ i re te uyinmwẹ ẹmwata ọwua maa sẹ ọghe avbe ni ma emwa Uhi kevbe Farisi, wa i sẹtin la Arriọba ẹrinmwi.

Vbekpa Ohu Ne A Mu

²¹ “Wa họn ẹn vbene a tama emwa nẹdẹ hẹ wẹẹ, ‘Ghẹ de izigha, ọmwa ne ọ rhirhi de izigha, a ghi siẹe gie nọbuohiẹn.’

²² Mẹ tama uwa nian, ọmwa ne ọ rhirhi mu ohu ọtiọnrẹn, a gha siẹe gha rrie ọghe nọbuohiẹn. Ọmwaikọmwa ne ọ tama ọtiọnrẹn wẹẹ, ‘Wẹ ne agbọn fi’ a gha siẹe gha rrie ọghe eghaẹvbo. Ọmwa ne ọ vbe tie ọtiọnrẹn ‘Emazurọkọ’, te ọ gbẹn odẹ ẹrinmwi ne ehianmwẹ ivin.

²³ Rhunmwuda ọnii, a deghẹ wẹ viọ emwi ne u ra ya yo imuohan gie Osanobua sẹ odaro ogiukpo nẹ, u na do yerre vbe evba nii ighe imuaẹmwẹ rre ẹkpo uwẹ vbe ọtuẹn,

²⁴ sẹ emwi imuohan ni rae ye evba, wẹ vbe ọtuẹn ka ya dọlọ nẹ, u kegha de do yo imuohan ruẹn gie Osanobua.

²⁵ “A deghẹ ẹzọ sunu ne uwẹ vbe ọmwa, ọ na muẹn gha rrie iko, adeghẹ ẹkpotọ rrọọ, guẹ ta ẹre ọghe owa ne ọ ghẹ ghi sẹ iko. Ọ gha sẹ iko, ọ gha fiọ ne nọbuohiẹn, nọbuohiẹn ghi rhie ruẹ ne ọgbalegbe, a ghi fian an fi eghan.

²⁶ Ne I tama ruẹn, u ma ha ukpogho nọdekẹe vbe igho ne a fian ruẹn re nẹ, u i ke evba ladian.

Ẹmwẹ Oghẹ

²⁷ “Wa họn ẹn vbene a tae wẹẹ, ‘Ghẹ ghẹẹ,’

²⁸ Sokpan mẹ tama uwa nian, ọmwaikọmwa gha ghe okhuo sẹrriọ ighe te aro ẹre ghi viẹn yọ, ọ gu okhuo ni ru oghẹ nẹ usin vbe ekhọe ẹre.

²⁹ Rhunmwuda ọnii, adeghẹ aro ruẹ ne obọ erha ọmwa ọre ọ ya a ru orukhọ, wọlọe fua. Egbe ma gba nuẹn ọre ọ maa sẹ ne a mu egbe ne a wẹ ọ gba nuẹn fi ẹrinmwi nehianmwivin.

³⁰ Deghẹ obọ erha ọmwa ruẹn ọre ọ ya a ru orukhọ, fiaẹn fua. Egbe ma gba nuẹn ọre ọ maa sẹ a muẹn mu egbe ne ọgbae fi ẹrinmwi nehianmwivin.

Ẹmwẹ Ne Ọdọ Vbe Amwẹ Na Ban Egbe

³¹ “Avbe tae wẹẹ, ‘Okpia gha khu amwẹ ọnrẹn, ọ ghi gbẹn ebe ne ọ ya khu ẹe rhie nẹẹn.’

³² Sokpan mẹ tama uwa nian wẹẹ, deghẹ ọmwaikọmwa khu amwẹ ọnrẹn vbe ne okhuo ni ma na ghẹẹ, rẹn ọre ọ gie ẹre oghẹ, deghẹ okhuo ni ya rọnmwẹ ọdọ ọvbehe. Ọmwa ne ọ rhie okhuo ne a khu ni rọnmwẹ, ọ vbe ru oghẹ.

Ẹmwẹ Emwi Ne A Ve Ye Urhu

³³ “Wa họn ẹn vbene a tama emwa hẹ ẹghẹ nẹdẹ wẹẹ, ‘U gha yan eyan, u ghi muẹn sẹ, u gha ya ihen ve emwi ye urhu vbe odaro Nọyaẹnmwa, ghe mwẹ u ma ruẹe.’

³⁴ Sokpan mẹ tama uwa nian, ghẹ vin ihen hiehiere. Ghẹ ya ẹrinmwi vin ihen rhunmwuda ẹkete Osanobua nọ.

³⁵ Ghẹ ya agbọn vin ihẹn, rhunmwuda, ehe ne ọ viọ owẹ yan nọ. Ghẹ ya Jerusalẹm vẹn ihẹn, ẹvbo Ọba Nọkhua nọ.

³⁶ Ghẹ ya uhunmwu ruẹn vin ihen rhunmwuda, wẹ iran sẹtin ya eto ọkpa khian nọfua ra nekhui.

³⁷ Deghẹ ‘Ẹn ẹn’ nọ wẹ ‘Ẹn ẹn’ Deghẹ ‘Ẹn o’ nọ wẹ ‘Ẹn o’ ẹmwẹ ne ọ ghi gberra vberriọ, esu mwẹ obọ vbọ, obọ ọmwa dan ni ọre ọ ke rre.

Ẹmwẹ Ikhi Ne A Rria

³⁸ “Wa họn ẹn vbene a ka tae yi wẹẹ, ‘Ọmwa gha kpan ruẹn akọn ọkpa, vbe kpan ọghọe ọkpa ha osa, ogha rhu uwẹ aro ọkpa, vbe rhu ọghọe ọkpa ha osa.’

³⁹ Sokpan, mẹ tama uwa nian, ghẹ rria ọmwaikọmwa ne ọ ruẹ khọ ikhi. Ọmwa gha gbe ubi ye uwẹ irho obọ erha ọmwa, giee wa vbe gbe ye ọghe obọ iye ọmwa.

⁴⁰ Ọmwa gha muẹn gha rrie iko ba ẹmwẹ ẹwu ne u yọ ke otọ, gie ẹe wa vbe mu ne u yọ ke odukhunmwu ba ẹre.

⁴¹ Ewọe iran ni yan ẹvbo gha ya ẹtin ya mu ihẹ ọre la ibiriki ọkpa, wa guee muẹn la ibiriki ogieva.

⁴² Ọmwa gha vbuẹ emwi, rhie nẹẹn. Ọmwa gha vbe nọ emwi na mọmọ, rhie nẹẹn mọmọ.

Ne A Na Ho Ẹmwẹ Avbe Eghian

⁴³ “Wa họn ẹn vbene a ka tae wẹẹ, ‘Ho ẹmwẹ ne ọ ho ẹmwẹ ruẹn, khuiwu ne a khuiwu ruẹ.’

⁴⁴ Sokpan, mẹ tama uwa nian, gha ho ẹmwẹ nọkhuiwu ruẹ, gha na erhunmwu ne iran ni zẹ uwẹ owẹ.

⁴⁵ Ne uwa miẹn ehe na gha re ivbi erha uwa ne ọ rre ẹrinmwi. Rhunmwuda, ọ gie ovẹn ọnrẹn gha yunmwu ne emwa esi kevbe emwa dan, ọ ghi vbe gie amẹ gha rhọ ne iran ni ru emwi esi kevbe ni ru emwi dan.

⁴⁶ De emwi ne Osanobua gha san ruẹn ẹse ba, deghẹ iran ni ho ẹmwẹ ruẹn ọkpa wẹ vbe ho ẹmwẹ ọnrẹn? Ẹ i re erriọ iran ni koko igho uhunmwu vbe ru!

⁴⁷ Deghẹ wẹ vbe ose ruẹ ọkpa ọre ọ gba guan ye egbe ẹmwẹ, de okpe emwi ne u ghi ru vba? Iran nigẹbọ vbe ru vberriọ.

⁴⁸ Wa gha re emwa ne uyinmwẹ ọnrẹn gbae, zẹẹ vbene Erha uwa ne ọ rre ẹrinmwi vbe re ne uyinmwẹ ọnrẹn gbae.”