Matiu 3 - Edo Bible (E Baibol Ẹdo) Version 1996

Ikporhu E Jọn Ne Ọsamẹ

¹ Ẹghẹ ni ọre Jọn ne Ọsamẹ na suẹn gha kporhu vbe uwu ato ọghe Judia, ọ wẹẹ,

² “Wa zobọ vbe orukhọ ne a ru rhunmwuda Arriọba ẹrinmwi sotọ fo.”

³ E Jọn na ọre Aizaia ne akhasẹ ta ẹmwẹ ọnrẹn wẹẹ, “Arhunmwu ọkpa gha vannọ vbe uwu ato: Wa zodẹ yotọ khẹ Nọyaẹnmwa, wa zodẹ ne ọ diae nẹẹn la.”

⁴ Ukpọn ne a ye eto aranmwẹ oha do ọre Jọn na gha mu rhuan, ọ ghi mu ugbẹkun ohian gba ẹkun, evbare ne ọ re keghi re irhiso kevbe owọn oha.

⁵ Emwa nibun keghi ke Jerusalẹm kevbe iwewe Judia kevbe isoko ni lẹga Jọdan hia bu ẹre rre.

⁶ Iran miẹn Orukhọ iran kue. Ọ keghi samẹ ne iran vbe ẹzẹ Jọdan.

⁷ Ugbẹn vbe Jọn ghi miẹn ighe avbe Farisi kevbe e Sadusi vẹ bu irẹn rre ne ọ do samẹ ne iran, ọ tama iran wẹẹ, “Wa ne ẹyẹn, gha ọ ghi giodẹ ne uwa gha na miẹn uhunmwu vbe obọ irriaikhi Osanobua ne ọ dee ma uwa yi?

⁸ Wa gie uyinmwẹ uwa rhie ma ighe wa gele zobọ vbe orukhọ ne a ru.

⁹ Wa ghẹ gha roro ighe uwa gha sẹtin mu Ebraham zasa ne uwa muẹn gba ye ukpẹ gha tie, ‘Ivbi Ebraham ma khin.’ Ne I tama uwa wẹ Osanobua gha sẹtin viọ vbe avbe okuta na ya ru uniẹn ne Ebraham.

¹⁰ A rhie ughanmwa yan dọmwadẹ erhan ẹzi nẹ, erhan ne ọ ma ghi mọ ọmọ esi, a gha tọn ẹn gbe otọ, a ghi giagia ẹe hẹku erhẹn.

¹¹ Amẹ ọre imẹ ya samẹ ne uwa ne ọ rhie ma ighe wa gele zobọ vbe orukhọ ne a ru. Sokpan ọmwa ne ọ ghi ra rre lele mwẹ gha ya Orhiọn Ne Ọ Huanrẹn kevbe erhẹn samẹ ne uwa. Rẹn kpọlọ sẹ mwẹ ẹsẹse, mẹ ma sẹ ne ọ gha ban ẹre ibata vbe owẹ.

¹² Ọ rhie ahẹn ne ọ ra ya khan ọka mwẹ obọ, ọ gha viọ ọka la owa, ọ ghi ya erhẹn ne ẹ i dọyọ giẹn ihunhun ni rrọọ.”

Isamẹ Ọghe Jesu

¹³ Ẹghẹ ni ọre Jesu na bu Jọn gha die Jọdan ne ọ do samẹn ne irẹn.

¹⁴ E Jọn keghi te gha tama Jesu ighe ọ ma la vberriọ, ọ wẹẹ, “Wẹ ọre ọ kere ne ọ gha samẹn ne imẹ, vbe uwẹ ghi na bu mwẹ gha dee hẹẹ?”

¹⁵ Jesu keghi tama rẹn wẹẹ, “Gie a ruẹe vbenian, ne a miẹn ehe na ru vbene Osanobua gie.” E Jọn ma ghi vbe muan rẹn.

¹⁶ Ugbẹn vbe a ghi samẹn ne Jesu nẹ, vbene ọ wa ladian vbe uwu amẹ, ẹrinmwi keghi kie ye otọ, rẹn keghi miẹn Orhiọn Osanobua vbe ọ tuorre, ọ yevbe idu, ọ keghi rhuẹ yan rẹn.

¹⁷ Urhu ọkpa keghi ke ẹrinmwi rre wẹẹ, “Ọna ọre ovbi mwẹ ni ho ẹmwẹ ọnrẹn, ọmwa ne ekhọe mwẹ rhiẹnrhiẹn ghe ẹsẹsẹmwẹse.”