Matiu 28 - Edo Bible (E Baibol Ẹdo) Version 1996

Arhiọkpaegbe

¹ Ugbẹn vbe Ẹdẹ Ikẹtin ghi gberra nẹ, vbe owiẹ vbirrivbirri ọghe ẹdẹ Izọla nọkhua, Meri Magdalen kevbe Meri nọkpa keghi ladian ne iran ya ghe idin ghe.

² Vbe udomwurri, otọ keghi wa mu rueghe, odibosa Nọyaẹnmwa keghi tuorre ke ẹrinmwi rre, ọ werriẹ okuta ni hin evba, ọ keghi tota yan rẹn.

³ A gha ghe ẹre, ọ yevbe ayan, ukpọn rẹn keghi fua vbe isonorhọ.

⁴ Iran ni khẹ odẹ keghi runran, iran kegha guọ zẹzẹzẹ, iran keghi ye vbe emwa ni wulo.

⁵ Odibosa nii keghi gu avbe ikhuo ni guan, ọ wẹẹ, “Wa ghẹ gie ohan mu uwa, I rẹnrẹn ighẹ Jesu ne a kan ẹn mu ugbugbe ọre uwa gualọ khian.

⁶ Ẹ i ghi rre emwa na, ọ rhiọkpaegbe nẹ zẹ vbene ọ khare. Wa larre, wa do ghe eke ne ọ te lovbiẹ yi.

⁷ Wa zẹgiẹ gha khian, ne uwa ya khama avbe erhuanegbe ẹre wẹẹ, ‘A huẹn ọnrẹn kpaegbe vbe idin nẹ, wanwanna nian, rẹn ke odaro ne uwa, ọ rrie Galili, wa gha miẹn ọẹn vbe odọ.’ Wa ghẹ mianmian ẹmwẹ ne I tama uwa.”

⁸ Iran keghi wa zẹgiẹ ya ohan lẹ hin idin rre, sokpan ẹko hia sẹ iran ọyẹnmwẹ, iran keghi rhulẹ ya tama avbe erhuanegbe.

⁹ Vbe udomwurri, Jesu keghi bu iran rre, ọ wẹẹ, “Ọfumwegbe nọ ne uwa.” Iran keghi bu ẹre gha dee, iran ye obọ da ẹre owẹ yi, iran keghi ya uhunmwu rhanmwẹ otọ ne ẹn.

¹⁰ Jesu keghi tama iran wẹẹ, “Wa ghẹ gie ohan mu uwa, wa ya khama avbe etẹn mwẹ ne iran gha rrie Galili, evba iran gha na miẹn mwẹ.”

Iyẹn Ne Iran Ni Khẹ Odẹ Ghi Na

¹¹ Avbe ikhuo ni ghi kpao nẹ, avbe ivbiyokuo ni khẹ idin kegha rrie ore ẹvbo, iran keghi ya na iyẹn emwi ne ọ sunu hia ma avbe igie ohẹn.

¹² Avbe igie ohẹn keghi ya gu avbe ediọn do iko ne iran na ke ọta, iran keghi mu igho ọrhẹnrhẹn ne avbe ivbiyokuo wẹẹ,

¹³ “Wa kha wẹẹ ẹghẹ ne uwa na gha vbiẹ vbe asọn ọre avbe erhuanegbe na rre do do ikun ẹnrẹn mu.

¹⁴ Nọkhaemwisẹ gha họn ẹmwẹ na, ma gha ya guee guan vbene ẹko gha na vuọn ne uwa ghẹ fian afianma emwikemwi.”

¹⁵ Iran ni khẹ odẹ keghi mu igho ni, iran keghi ru zẹ vbene a tama iran. Erriọ avbe Ju ye ta ẹmwẹ na khian do sẹ ẹdẹnẹrẹ na.

Jesu Rhi Egbe Ma Avbe Erhuanegbe Ere

¹⁶ Avbe erhuanegbe owọrọ ni kegha rrie uhunmwu oke ne Jesu tama iran wẹ ne iran gha rrie vbe Galili.

¹⁷ Ugbẹn vbe iran ghi miẹn ọẹn, iran ya uhunmwu rhanmwẹ otọ ne ẹn a gha rhe miẹn wẹẹ eso vbe uwu iran gha a biro eva.

¹⁸ Jesu tama iran wẹẹ, “A rhie ẹtin hia ni rre ẹrinmwi kevbe agbọn mẹ nẹ.

¹⁹ Wa bu emwa hia gha rrie ehe hia ne uwa ya gha ya iran khian erhuanegbe mwẹ, wa gha samẹ ne iran vbe Eni ọghe Erha, kevbe Ọmọ kevbe ọghe Orhiọn Ne Ọ Huanrẹn.

²⁰ Wa ma iran ẹre ne iran gha yin zẹ vbene I yi ẹre iyi ne uwa. Wa yerre wẹ I gha gu uwa gha rrọọ vbe ẹghẹ hia rhinrin ya sẹ ufomwẹ agbọn.”