Matiu 27 - Edo Bible (E Baibol Ẹdo) Version 1996

Iran Si Jesu Bu Pailet

¹ Vbe owiẹ vbirrivbirri, avbe igie ohẹn hia kevbe avbe ediọn avbe Ju keghi ya si uma ne iran gbe Jesu ua.

² Iran keghi ya ọgiọrọ de ẹre, iran keghi si ẹe gie Pailet.

Uwu Judas

³ Ugbẹn vbe Judas ne ọ rhie ẹre maa ghi miẹn ighe iran bu ohiẹn uwu gbe Jesu, ọ roiro fi ekhọe werriẹ, ọ keghi viọ igho ẹrọnmwọ ọgban nii werriegbe gie avbe igie ohẹn kevbe avbe eniwanrẹn, ọ wẹẹ,

⁴ “I ru orukhọ ne I na rhie ọmwa ne ọ ma rukhọ maa ne a gbe ẹe rua.” Iran wanniẹn tama rẹn wẹẹ, “Ọ ni ma kan ima. Iwinna ne egbe uẹ nọ.”

⁵ Judas keghi rhurhẹ igho nii ku otọ vbe Ogiukpo, ọ keghi sẹ ọe rae ye evba, ọ ghi ke evba kpao, ọ keghi ya zẹgbẹle.

⁶ Avbe igie ohẹn keghi si igho ni koko iran wẹẹ, “Igho esagiẹn ọ na khin, uhi ima ma ye obọ yọ ne a viọ igho vberriọ ba igho aza ọghe Ọgua Osa.”

⁷ Iran ghi zẹ iro ẹre kugbe nẹ, iran keghi ya igho nii dẹ otọ Ọmakhe ya ru ite avbe orhunmwuyẹn.

⁸ Ọnii ọ zẹẹ ne a na tie otọe nii “Otọe Esagiẹn” do sẹ ẹdẹnẹrẹ na.

⁹ Ẹghẹ nii ọre ẹmwẹ ne akhasẹ Jerimaia tae na do sẹ wẹẹ, “Iran keghi viọ igho ẹrọnmwọ ọgban nii igho ne ivbi Izrẹl kue yi ne iran hae yọ.

¹⁰ Iran keghi yae de otọ ọmakhe zẹ vbene Nọyaẹnmwa yi ẹre iyi mẹ.”

Pailet Nọ Jesu Ota

¹¹ Jesu keghi mudia ye odaro Nọkhaemwisẹ ne ọ gha nọ rẹn ọta. Rẹn keghi nọ Jesu wẹẹ, “Wẹ ọrọre ọba avbe Ju ra?” Jesu wanniẹn tama rẹn wẹẹ, “Erriọ u khare.”

¹² Sokpan ọ ma zẹdẹ guan kan ifi ẹzọ ne avbe igie ohẹn kevbe ediọn ba ẹre re.

¹³ Rhunmwuda ọnii Pailet tama rẹn wẹẹ, “Wẹ ma họn ifi ẹzọ ne iran ba ruẹ re na?”

¹⁴ Sokpan Jesu ma rhie ewanniẹn ye ifi ẹmwẹ ọkpa kẹkan sẹrriọ ne unu na yan Nọkhaemwisẹ.

Iran Buohiẹn Uwu Gbe Jesu

¹⁵ Ẹghẹ Emwiukpo Alagberra hia fẹẹrẹ ọre Nọkhaemwisẹ ya fan oghunmwu ọkpa fua ne iran, ọmwa ne avbe emwa a rhirhi gha ho.

¹⁶ Vbe ẹghẹ nii oghunmwu ọkpa ne emwa hia rẹnrẹn keghi rrọọ, a kegha tie eni ẹnrẹn Jesu Barabbas.

¹⁷ Rhunmwuda ọnii, ugbẹn vbe emwa hia ghi si koko, Pailet nọ iran wẹẹ, “De ọmwa ne uwa ho ne imẹ fan fua ne uwa, Jesu Barabbas ra Jesu ne a tie ẹre Kristi?”

¹⁸ Rẹn wa rẹn ighe ikhuiwu ọre iran ya si Jesu gie irẹn.

¹⁹ Pailet ghi tota ye ugha ne ọ na bu ohiẹn, amwẹ ọnrẹn gie uhunmwu giẹ wẹẹ, “Ghẹ mwẹ obọ vbe egbe ọmwa ne ọ ma rukhọ nii, rhunmwuda, I rrioya emwi ni bun vbe imina vbe ekpa ẹre ne asọn.”

²⁰ Avbe igie ohẹn kevbe avbe eniwanrẹn keghi kpikpi avbe emwa wẹ ne iran khama Pailet ne ọ fan Barabbas fua ne iran, ne ọ gbe Jesu.

²¹ Sokpan Nọkhaemwisẹ nọ iran wẹẹ, “De ne uwa ho ne I fan fua ne uwa vbe iran eva na?” Iran keghi wanniẹn wẹẹ, “Barabbas.”

²² Pailet nọ iran wẹẹ, “Vbe uwa ghi wẹ ne I ru Jesu ne a tie ẹre Kristi hẹẹ?” Iran hia keghi wanniẹn wẹẹ, “Kan rẹn mu ugbugbe.”

²³ Sokpan Pailet nọ iran wẹẹ, “De emwi dan ne ọ ru?” Iran keghi wa suẹn gha go gboo tie, “Kan rẹn mu ugbugbe!”

²⁴ Pailet ghi miẹn wẹẹ rẹn gha wẹ ne irẹn gha gui ẹzọ nii khian ẹ i mwẹ esa, kevbe wẹ otutu gha tu, ọ keghi sa amẹ ya kpe obọ sirra iran hia, ọ wẹẹ, “I i mwẹ obọ vbe ẹmwẹ uwu okpia na. A lẹ ọre ginna uwa obọ.”

²⁵ Emwa ni hia keghi wa wanniẹn wẹẹ, “Gie emwi dan ne ọ gha rhunmwuda uwu ẹre na sunu gha rre uhunmwu ima kevbe ọghe ivbi ima.”

²⁶ Pailet keghi fan Barabbas fua ne iran, ọ ghi gbe Jesu asan nẹ, ọ keghi rhie ẹre ne iran, ne iran ya kan rẹn mu ugbugbe.

Avbe Ivbiyokuo Ya Jesu Gbe Ogiẹ

²⁷ Avbe ivbiyokuo keghi rhie Jesu gha rrie ẹguae Nọkhaemwisẹ, emwa hia keghi wa do lẹga ẹre.

²⁸ Iran keghi kie ẹre ẹwu ẹre, iran na mu ẹwu ododo yọ ẹe.

²⁹ Iran keghi ya erhan igban do ẹdẹ mu rhu ẹre uhunmwu, iran na rhie ọkpọ ye ọre obọ erha ọmwa, iran kegha diguẹ ye ọre odaro, iran keghi ya ẹe gbe ogie wẹẹ, “U gha tọ u kpẹre Ọba avbe Ju!”

³⁰ Iran tu asẹn ku ọre, iran keghi rhie ọkpọ ne ọ rre ọre obọ, iran na gbẹe yọ re uhunmwu.

³¹ Ugbẹn vbe iran ghi ya ẹe gbe ogie fo nẹ, iran bannọ ẹre ẹwu ododo nii, iran viọ ukpọn rẹn yo ẹe, iran keghi rhie ẹre ladian ne iran ya kan rẹn mu ugbugbe.

A Kan Jesu Mu Ugbugbe

³² Ugbẹn vbe iran ghi ladian, iran miẹn ọmwa Sairin ọkpa ne a tie ẹre Saimọn, iran keghi ya ẹtin mu ẹn ne ọ mu ugbugbe Jesu.

³³ Iran keghi do sẹ ihe ọkpa ne a tie ẹre Gọlgọta, ọnii nọ wẹẹ, “Isi ugboloko uhunmwu ọmwa.”

³⁴ Evba iran na mu ayọn ne a ya okikan gua ne ẹn da, sokpan ugbẹn vbe ọ ghi danmwẹ ọẹn ọ ma dae.

³⁵ Iran ghi kan rẹn mu ugbugbe nẹ vbe evba, iran keghi yan uta ya ghae ukpọn rẹn.

³⁶ Vbe iyeke ọna iran keghi tota gha ghe ẹre vbe evba.

³⁷ Iran keghi gbẹnnẹ ẹzọ ne a guẹe gui mu ye odukhunmwu ẹnrẹn. “Ọna ọrọre Jesu, Ọba avbe Ju.”

³⁸ Iran kevbe kan izigan eva ba Jesu, ọkpa vbe obọ erha ọmwa kevbe nọkpa vbe obọ iye ọmwa.

³⁹ Avbe ilavbodẹ kegha fieghe uhunmwu iran, iran keghi vbe gha ya ukpẹ sakan Jesu wẹẹ,

⁴⁰ “Ẹ i re uwẹ ọre ọ wẹ, u gha guọghọ Ọgua Osa sẹ otọ, ne u vbe dọlọ ẹe bọ vbe ikpẹdẹ eha! A deghẹ Ovbi Osanobua u gele khin, fan egbe ruẹ fua nian. Tuorre vbe ugbugbe.”

⁴¹ Erriọ zẹẹ iran ne avbe igie ohẹn, iran ni ma emwa Uhi kevbe avbe ediọn vbe ya ẹe gbe ogie wẹẹ,

⁴² “Ọ miẹn emwa ọvbehe fan, ọ ma sẹtin miẹn egbe ẹre fan. Ẹ i irẹn ọrọre Ọba Izrẹl ra? Ọ gha tuorre vbe ugbugbe banbanna, ma gha wa ya ẹe yi.

⁴³ Ọ mu ẹtin yan Osanobua, ọ wẹ Ovbi Osanobua irẹn khin. Wa gia dia gha ghe deghẹ Osanobua gha do miẹn rẹn fan nian.”

⁴⁴ Erriọ zẹẹ, avbe izigan ne a kan mu ugbugbe ba ẹre vbe gha ye ukpẹ sakan ẹn.

Uwu Jesu

⁴⁵ Owẹn ghi wa sẹ adesẹ ukhunmwu, ebiebi keghi wa so vbe ẹvbo ni hia, ọ keghi so ya omwa ẹgogo eha.

⁴⁶ Ọ ghi sẹ odẹ ihe ẹgogo eha, Jesu keghi datu, “El, El, lema sabaktani?” Ne a zẹ edu ẹre wẹẹ, “Osanobua mwẹ Osanobua mwẹ, vbọzẹ ne u na he mwẹ ye otọ?”

⁴⁷ Emwa eso ni mudia vba ghi họn, iran wẹẹ, “Gha họn vbe ọ tie Elaija.”

⁴⁸ Ọkpa vbe usun iran keghi wa zẹgiẹ rhulẹ ya rhie ihiọn ihuawa, ọ dinmwi ẹn ye uwu ayọn, ọ keghi rhie ẹre ye ukpẹ ọkpọ erhan mu nẹ ne ọ hiẹnhiẹn ọẹn wọn.

⁴⁹ Sokpan iran nekpa keghi wẹẹ, “Wa zin egbe, wa gia dia gha ghe deghẹ Elaija gha do miẹn rẹn fan.”

⁵⁰ Jesu keghi dọlegbe ya urhu ne ọla datu, ọ keghi hẹwẹ fo.

⁵¹ Ẹghẹ nii, ọre ukpọn ne a tan ya fian Ọgua Osa na wa sọ ye iheva ke odukhunmwu do sẹ otọ. Otọe keghi mu rueghe, okuta kegha valọ.

⁵² Idin ni bun keghi we unuan, emwa Osanobua ni bun ni ka wulo yi keghi rhiọkpaegbe.

⁵³ Iran kpao hin idin rre. Iyeke vbe Jesu ghi rhiọrre nẹ vbe idin, iran kegha rrie Ẹvbo Ne ọ huanrẹn nii, emwa ni bun keghi miẹn iran.

⁵⁴ Ugbẹn vbe ọkaokuo kevbe ivbiyokuo ẹre ni mudia gha ghe Jesu ghi miẹn igbohiotọ kevbe emwi hia ni sunu, ohan keghi mu iran, iran wẹẹ, “Vbe ẹmwata, Ovbi Osanobua te gele nọ.”

⁵⁵ Ikhuo ni bun keghi rre evba, iran ni lele Jesu ke Galili gha dee, iran ni vbe gha ye ọre obọ, iran keghi mudia ye urria gha ghe emwi ni sunu.

⁵⁶ Eso vbe uwu iran keghi re Meri Magdalen, Meri ne iye Jems kevbe Josẹf kevbe iye avbe ivbi e Zẹbede.

Uremwẹ Jesu

⁵⁷ Ugbẹn vbe ọ ghi sẹ ota, okpia ne ọ fe ọkpa ne a tie ẹre Josẹf, ne ọ vbe re ọkpa vbe uwu avbe erhuanegbe Jesu, keghi ke Arimatia gha dee.

⁵⁸ Ọ bu Pailet gha khian, ọ keghi ya nọọn ikun Jesu. Pailet keghi yi iyi ne a mu ikinnegbe ẹre ne Josẹf.

⁵⁹ Josẹf keghi mu ẹn tuorre, ọ keghi ya ọgbọnmwọkpa ọgbọngbọn vbuẹ ọre.

⁶⁰ Ọ na wa ẹre ye idin irẹn tobọre ne ọ da fian ye uwu okuta. Ọ keghi werriẹ okuta ẹrẹkhẹrẹ gue unu idin ni, ọ na gha rrie.

⁶¹ Meri Magdalen kevbe Meri nọkpa keghi tota viọ aro da nene idin vbe ẹghẹ ni.

Iran Ni Khẹ Idin

⁶² Vbe ẹdẹ ne ọ lelẹe, ọnii nọ wẹẹ, ẹdẹ ne ọ lele ikpẹdẹ nogisẹn vbe izọla, avbe igie ohẹn kevbe avbe Farisi keghi bu Pailet gha khian.

⁶³ Iran tama rẹn wẹẹ, “Dọmọ o, ma yerre wẹ ẹghẹ ne ọhọn ohoghe nii na rre agbọn, ọ tae wẹẹ, ‘A gha huẹn mwẹ kpaegbe vbe iyeke ikpẹdẹ eha.’

⁶⁴ Rhunmwuda ọnii, yi iyi ne emwa ya gha khẹ idin nii ọ te ya sẹ ikpẹdẹ eha, ne avbe erhuanegbe ghẹ miẹn ehe na ya do ikun ẹnrẹn mu ne iran vbe ya gha wewe ẹe ma emwa hia wẹẹ, ‘A huẹn ọnrẹn kpaegbe vbe orinmwi.’ Ohoghe ne okiekie ghi do khọ sẹ ne okaro.”

⁶⁵ Pailet tama iran wẹẹ, “Wa viọ emwa ni khẹ odẹ ne uwa ya gha khẹ idin ni vbene uwa sẹtin ruẹe sẹ.”

⁶⁶ Rhunmwuda ọnii, iran keghi kpao iran na ya ru ẹmwẹ idin ni gbua vbekpa ne iran na ya ama ye okuta ni, iran na vbe zẹ emwa yọ ne iran gha khẹ ọre.