Matiu 24 - Edo Bible (E Baibol Ẹdo) Version 1996

Jesu Guanyan Uguọghọmwẹ Ọgua Osa

¹ Jesu keghi kpaegbe, vbene ọ wa ladian vbe Ọgua Osa, avbe erhuanegbe keghi do gha rhie vbene a bọ Ọgua Osa hẹ ma rẹn.

² Rẹn khama iran wẹẹ, “Erriọ nọ, wa ma dẹghe emwi na hia, ne I tama uwa, okuta ọkpa ne a ra sẹrae ye ihe ẹre, ẹ i rre emwa na, te a ra guọghọ ehia sẹ otọ.”

Orueghe Kevbe Ukpokpo

³ Jesu ghi tota ye uhunmwu oke Ọliv, avbe erhuanegbe keghi hẹko bu ẹre rre do nọ rẹn wẹẹ, “Ta ẹghẹ ne emwi na hia gha khin ma ima, de emwi ne ọ gha sunu ni ima gha ya rẹn ighe ẹghẹ ne u ya dee sẹ ne, kevbe wẹẹ a sẹ ufomwẹ agbọn nẹ?”

⁴ Jesu wanniẹn tama iran wẹẹ, “Wa ghi yegbe ne ọmwaikọmwa ghẹ mu uwa rẹrẹ.

⁵ Rhunmwuda, emwa ni bun gha rre vbe eni mwẹ wẹẹ, ‘Mẹ ọrọre nene Mẹzaia,’ iran ghi vbe rẹrẹ emwa ni bun re.

⁶ Wa gha họn ẹmwẹ okuo ne ọ rre urria kevbe ogbigbi okuo ne ọ sikẹ uwa, sokpan ọnii ma rhie ma ighe ufomwẹ sẹ otọ nẹ.

⁷ Ẹvbo na gha mu okuo gie nọkpa, otọ arriọba na ghi mu okuo gie nọkpa. Ukhumwu kevbe igbohiotọ ghi gha rre ehe hia.

⁸ Ena hia keghi yevbe emwi ubiẹmwẹ ne ọ ru okhuo vbe ọ te biẹ.

⁹ “A gha vbe munọ uwa, a ghi vbe viọ uwa gie emwa ni gha rri uwa oya. Emwa hia ghi gha khuiwu uwa ba ẹmwẹ mwẹ.

¹⁰ Emwa ni bun ọre ọ gha lahin iyayi rre vbe ẹghẹ ni. Iran ghi gha ye egbe dẹ, ẹko iran ghi gha khọ egbe.

¹¹ Ẹghẹ ni ọre akhasẹ ohoghe ni bun gha na ladian, iran ghi vbe rẹrẹ ọkhọngborrie re.

¹² Ọkhọ gha miotọ sẹrriọ ne a gha na miẹn wẹẹ aho ẹmwẹ ọmwa eni bun gha worua.

¹³ Sokpan ọmwa ne ọ da ẹe yi ya sẹ ufomwẹ, ọre a gha miẹn fan.

¹⁴ A gha kporhu Iyẹn Ne ọ maa ọghe Arriọba na la otọ agbọn hia nẹ zẹ vbe osẹe ghe emwa hia, iyeke ọnii, ufomwẹ ghi do rre.

Omurhia Ne O Gbe Orrirri

¹⁵ “Wa ghẹ ghi miẹn ighe Omurhia Ne ọ gbe orrirri ne Daniẹl ne akhasẹ ta ẹmwẹ ọnrẹn miẹn dia ye ehe ne ọ huanrẹn.” (Wẹ ne ọ tie ebe na, hia ne u rẹn evba yae kha.)

¹⁶ “Ẹghẹ ni wa ni rre Judia hia, wa lẹ gha rrie uhunmwu oke.

¹⁷ Ọmwa ne ọ rre ẹrhunrhun owa ẹre, wẹ ne ọ ghẹ wẹ rẹn ra tuorre ya viọ emwi ẹnrẹn vbe uwu owa.

¹⁸ We ne ọmwa ne orre ugbo ghẹ wẹ rẹn die owa do mu agbada ẹwu.

¹⁹ U miẹn vbene ogha ba so ikhuo-hanmwẹ kevbe ne emobọ gue hẹ ẹdẹnẹdẹrriọ.

²⁰ Wa rinmwian Osanobua, ne ẹdẹ ulẹ ghẹ i de fi ẹghẹ okhuakhua ra Ẹdẹ Ikẹtin.

²¹ Rhunmwuda ọkhọ ne ọ ra sunu ẹdẹnẹdẹrriọ keghi re egbe ne a ma he miẹn ke ne abuagbọn tuagbọn gha dee do sẹ ẹdẹnẹrẹ na. A i ra vbe dọlegbe miẹn egbe ọre ẹdẹ.

²² Sokpan Osanobua fian inu ẹdẹ ne ọ ra ya vbe otọ kanmwa nẹ. Akpawẹ ọ ma fian ẹdẹ ni kanmwa, orhiọnkpa ne ọ gha miẹn uhunmwu, ẹ i rrọọ. Sokpan Osanobua gha rhunmwuda iran ne ọ hannnọ zẹ fian ẹdẹ ni kanmwa.

²³ “Rhunmwuda ọnii, orhiọnkpa gha do khama ruẹn wẹẹ, ‘Do ghe Mẹzaia!’ ra ‘Ghe ẹre vba,’ ghẹ ya ẹe yi.

²⁴ Rhunmwuda, avbe akhasẹ kevbe Mẹzaia ohoghe gha rre. Iran gha winna iwinna ama kevbe iwinna ọyunnuan ni bun ne iran ya rẹrẹ emwa ne Osanobua hannọ zẹ re deghẹ ẹtin iran sọe.

²⁵ Ghe I tama uwa yotọ nẹ.

²⁶ “Ra deghẹ emwa eso vbe do tama ruẹn wẹẹ, ‘Ọ rre uwa ato,’ ghẹ yo ‘Do ghe vbe ọ lẹre ye emwa’ ghẹ yayi.

²⁷ Rhunmwuda te Ovbi Ọmwa ra rre vbe ayan ne ọ yan gbe iso dunmwu ke ọlarre ovẹn ya sẹ ọlarrie ẹre.

²⁸ Ehe ne emwi nọwu ye, ọre avbe ugu si koko yi.

Urremwẹ Ovbi Omwa

²⁹ “Avbe ọlọghọmwa na hia ghẹ ghi da obọ yi, owẹn ghi so ebiebi, uki i ghi ra ba ọvbehe, avbe orhọnmwẹ ghi gha ke iso kharha ku otọ, a ghi mu ẹtin ni re ideghedeghe iso rueghe.

³⁰ Ẹkpo ni ọre ama urremwẹ Ovbi Ọmwa gha na rhiegbe ma, vbe aro iso. Ẹghẹ ni, unu ne a zẹ hia ni rre otọ agbọn na, ghi gbe eve ua vbe iran a bẹghe vbe Ovbi Ọmwa a ya egbe ladian vbe odukhunmwu okuku ne ọ rre aro iso, ke irẹn kevbe ẹtin kevbe Uyi nọkhua.

³¹ Okpe nọkhua ghi tu, rẹn ghi gie avbe odibosa ẹre ladian gha rrie igie enenẹ agbọn. Iran ghi ya si e na hannọ zẹ ọghọe koko ke okhiẹ agbọn ọkpa ya sẹ nọkpa.

Iruẹmwi Erhan Ohọ

³² “Wa ghe igiemwi erhan ohọ. Abọ ẹre gha bi nunuunu ighe ọ vbe ye sọguọsọguọ, ọ na vbe gha họn ebe, wa ghi rẹn ighe ẹghẹ uyunmwu bu otọ.

³³ Erriọ vbe nọ zẹ, wa ghẹ ghi miẹn avbe emwi na, wa ghi rẹn wẹ ẹghẹ bu otọ, te ọ ghi ra suẹn.

³⁴ Wa rẹn nian wẹ, emwi na hia gha sunu avbe emwa ni rre agbọn ẹdẹnẹrẹ te do wulo fo.

³⁵ Ẹrinmwi kevbe agbọn gha gberra, sokpan, ẹmwẹ mwẹ i ra gberra.

Ọmwa Nọrẹn Ẹdẹ Ra Ẹghẹ Ne Ọ Khin Ẹ I Rrọọ

³⁶ “Sokpan, ọmwa ọkpa ne ọ rẹn ẹdẹ ra ẹghẹ ne emwi na gha ya sẹ, ẹ i rrọọ, avbe odibosa ni rre ẹrinmwi, ra Ọmọ tobọ ẹre, ne ọ rẹn ọnrẹn, ẹ i rrọọ, gberra Evbavba Ọkpa.

³⁷ Te urremwẹ Ovbi Ọmwa ra ye vbe emwi ne ọ sunu vbe ẹghẹ ọghe Noa.

³⁸ Zẹẹ vbe ne a miẹn wẹẹ, ọ te do sẹ ẹghẹ uromwẹ amẹ, emwa kegha re, iran na gha da, ikpia kevbe ikhuo na gha rọnmwẹ egbe, rhinrin ya sẹ ikpẹdẹ ne Noa la okọ zẹẹ.

³⁹ Iran ma rẹn enaye uromwẹ amẹ te do kpolo ehia gha rrie. Erriọ ọ gha ye vbe Ovbi Ọmwa a rre.

⁴⁰ Ẹdẹ ne ẹdẹrriọ, arhin eva ghi gha winna vbe ugbo, a gha rhie ọkpa, a ghi sẹ nọkpa rae.

⁴¹ Ikhuo eva ghi gha lọ ẹhiẹn vbe olọ, a gha rhie ọkpa, a ghi sẹ nọkpa rae.

⁴² Rhunmwuda ọnii, wa gha ba odẹ rhunmwuda wa ma rẹn ẹdẹ ne Nọyan uwa gha rre.

⁴³ Wa yerre wẹẹ, akpawẹ ọdafẹn ne ọ yan owa rẹn ẹghẹ ne oyi gha ya rre, te ọ gha kọnvbe, ẹ i ghẹ gie oyi kpahiẹ la irẹn owa.

⁴⁴ Rhunmwuda ọnii nian, wa khẹ ye egbe rhunmwuda Ovbi Ọmwa gha rre vbe ẹghẹ ne uwa ma ro wa ma kọọ.

Ọguọmwadia Esi Ra Ọghe Dan

⁴⁵ “Gha ọre ọguọmwadia esi kevbe ne ọ wan nii, ọnii ọrọre ne arowa ẹre ya ru ne ọ gbe aro ghe eguọmwadia ne ihua ẹre ne ọ gha rhie evbare ne iran vbe ẹghẹ ne ọkere.

⁴⁶ U miẹn vbe ọ gha ma ne ọguọmwadia ni hẹẹ vbe arowa ẹre a do vba ighe ọ gele ru vberriọ!

⁴⁷ Vbe ẹmwata, arowa ẹre gha ya ẹe ru ne ọ gbe aro ghe emwi ne ọ mwẹ hia.

⁴⁸ Sokpan, deghẹ ọguọmwadia dan nọ, rẹn ghi ye otọ ẹko ẹre kha wẹẹ, ‘Ọ gha kpee arowa mwẹ ke rre.’

⁴⁹ Ọ ghi suẹn gha gbele eguọmwadia nekpa, ọ ghi ya gu avbe Ọdayọn gha re gha da.

⁵⁰ Sokpan arowa ẹre gha rre vbe ẹdẹ ne ọ ma ro ọ ma kọọ.

⁵¹ Arowa ẹre gha giagia ẹre ukhiọnmwẹ ukhiọnmwẹ, ọ ghi ru ẹre emwi ne ọ ma ẹwobi. Evba ọ ra na ya gha viẹ, ọ ghi vbe gha rri akọn.