Matiu 23 - Edo Bible (E Baibol Ẹdo) Version 1996

Jesu Wẹ Ne A Gha Ba egbe Vbe Obọ Iran Ni Ma Emwa Uhi Kevbe Avbe Farisi

¹ Jesu keghi tama avbe erhuanegbe ẹre kevbe emwa ni gbe ẹbu ye evba wẹẹ,

² “Iran ni ma emwa Uhi kevbe avbe Farisi ọre a rẹn ye ni rhan otọ uhi e Mosis.

³ Rhunmwuda ọnii, wa gha ru zẹ vbene iran ma uwa ẹre hia, sokpan wa ghẹ ye egbe ta uyimwẹ iran rhunmwuda, iran i ru emwi ne iran ta.

⁴ Iran ghi kun ihẹ ne ọ khuaa mu yan emwa uhunmwu sokpan ukpẹ ihen obọ iran ọkpa i dekan ihẹ nii ne iran ya kpa emwa ihẹ.

⁵ Iran ghi gha ru emwi hia ọghe ne emwa ba bẹghe mwẹ. Wa ma miẹn vbene ẹkpo ne a viọ uviẹn ebe na gbẹnnẹ kevbe Ebe ni re na a mu gba ye obọ kevbe uharo ọghe iran kọnkọn hẹẹ! Wa ma miẹn vbene ẹwu iran wa hiọrọ otọ hẹẹ!

⁶ Ehe ne ọ ghi maa sẹ vbe ehe ne a na ghe ẹbu gha rri evbare, ọre ọ yẹ iran ne a tota yi, erriọ vbe nọ vbe Ọgua ediọn.

⁷ Iran ho ne a gha tuẹ iran vbe obọ eva vbe ẹki, ne agbọn vbe ẹrinmwi gha tie iran ‘Ọmamwaemwi.’

⁸ Wa ghẹ gie a gha tie uwa ‘Ọmamwaemwi’ rhunmwuda etẹn ọkpa wa hia khin, Ọmamwaemwi ọkpa ọre uwa vbe mwẹ.

⁹ Wa ghẹ tie ọmwaikọmwa vbe agbọn na ‘Evbavba’ rhunmwuda Evbavba ọkpa ne uwa mwẹ, ẹrinmwi ọre ọ ye.

¹⁰ Wa ghẹ gie a tie uwa ‘Ọsuọmwa’ rhunmwuda Ọsuọmwa ọkpa ne uwa mwẹ ọrọre Mẹzaia.

¹¹ Ne ọ ghi kpọlọ sẹ vbe uwu wa, gie ẹe gha re ọguọmwadia uwa.

¹² Ọmwa ne ọ tọn egbe ẹre mu, a gha mu ẹn rriotọ, ọmwa ne ọ mu egbe ẹre rriotọ, a gha tọn ẹn mu.

Jesu Ta Ku Iran Baẹmwẹ Imamase

¹³ “U miẹn agbọn ne uwa ye eni ma emwa Uhi kevbe Farisi, ayunukpaegbe! Wa khui urho Arriọba ẹrinmwi ke emwa yi, wa tobọ uwa ma ho ne uwa la owa, emwa ni ho ne iran la owa, wa ma kie ne iran. [

¹⁴ “U miẹn agbọn ne uwa ye, eni ma emwa Uhi kevbe Farisi, ayunukpaegbe! Wa miẹn ehe na la avbe ẹgbẹ egbe, wa do iran emwi hia viọ fo, wa keghi gha na erhunmwu ne ọ taẹn ọ ghe ne a ba bẹghe mwẹ. Ena ọre a gha rhunmwuda ẹre rria uwa ikhi sayọ.]

¹⁵ “U miẹn agbọn ne uwa ye, enimaemwa Uhi kevbe Farisi, ayunukpaegbe. Wa ghi fian okun rra, wa ghi la ẹvbo hoho fo gha gualọ arhin ọkpa kẹkan ne uwa gha ya khian enọyayi, wa ghẹ ghi miẹn nẹ, wa ghi ya ẹe khian ọmwa ne ọ kei ye ẹrinmwi erhẹn ukhukhu eva sẹ egbe uwa.

¹⁶ “U miẹn agbọn ne uwa ye arọndẹ ni rhu aro, wa khare wẹẹ, ‘Ọmwa gha ye Ọgua Osa vẹn ihẹn, emwi rhọkpa i rrọ ẹre urhu sokpan deghẹ ọ ye igoru ne ọ rre Ọgua Osa vẹn ihẹn, emwi rre ọre urhu.’

¹⁷ Wa ne akpa vbe abobo! De ne ọkpọlọ sẹ, igoru ra Ọgua Osa ne ọ ya igoru khian ne ọ huanrẹn?

¹⁸ Wa vbe kha wẹẹ, ‘A gha ya Ogiukpo vẹn ihẹn, ẹ i mwẹ esa, sokpan, a gha ya emwi imuohan ni rre Ogiukpo vẹn ihẹn, emwi rre ọmwa ni urhu.’

¹⁹ Wa ma miẹn vbe ne uwa rhu aro hẹ. De ne ọ kpọlọ sẹẹ, emwi imuohan, ra Ogiukpo ne ọ ya emwi imuohan khian ni huanrẹn?

²⁰ Rhunmwuda ọnii, deghẹ ọmwa ya Ogiukpo vẹn ihẹn, Ogiukpo kẹe kevbe emwi ni rrọọ, ọre ọ ya vẹn ihẹn.

²¹ Ọmwa gha ya Ọgua Osa vẹn ihẹn, Ọgua Osa kẹe kevbe Osanobua ne ọ rrọọ, ọre ọ ya vẹn ihẹn.

²² Ọmwa gha ya ẹrinmwi vẹn ihẹn, ẹkete Osanobua kevbe ọmwa ne ọ tota yọ, ọre ọ ya vẹn ihẹn.

²³ “U miẹn agbọn ne uwa ye, enimaemwa Uhi kevbe Farisi, ayunukpaegbe. Wa ghi zẹ a ghae ye ihe igbe ebe uwọnmwẹ ne giẹrẹ hia, vbe ne avbe akpọkọ, ihiehie kevbe ebe aranmwọkhọ ye, vberriọ, wa sẹ emwi kpataki ni rre uwu Uhi rae, zẹ vbe a i bu eku, itohan, kevbe ne a i na sẹ ni dekẹe rae.

²⁴ Wa ne arọndẹ ni rhu aro, wa ne ọ gha khan ikian hin uwu ukpu ayọn uwa rre nẹ, wa ghi rhie ẹmila mi re!

²⁵ “U miẹn agbọn ne uwa ye enimaemwa Uhi kevbe Farisi ayunukpaegbe! Wa ghi kpe iyeke ukpu kevbe ọkpan uwa huan, vberriọ emwi ne uwa ye iwo vbe egbe aro kevbe arovbẹmwẹ miẹn emwa re ọre ọ vuọn uwa ẹre.

²⁶ Farisi ne arhu aro, wa ka kpe emwi ni rre uwu ukpu huan nẹ, iyeke ẹre gha vbe huan.

²⁷ “U miẹn agbọn ne uwa ye, enimaemwa Uhi kevbe Farisi, ayunukpaegbe! Wa ye vbe idin ne a ye orhue dọlọ, ne odukhunmwu ẹnrẹn ye mose mose, sokpan uwu ẹre vuọn ne ugboloko orinmwi kevbe osọnnọ ẹwia.

²⁸ Erriọ ọre uwa ye zẹẹ, agbọn ghi gha ghe uwa ighẹ uwa maa, sokpan ẹko uwa vuọn ne ohoghe kevbe orukhọ.

Jesu Ta Emwi Ne O Ra Rruan Iran

²⁹ “U miẹn agbọn ne uwa ye enimaemwa Uhi kevbe Farisi, ayunukpaegbe. Wa mannọ idin avbe akhasẹ mose mose, wa keghi te idin ne a mannọ ne iran ne eni yin ẹse egbe.

³⁰ Wa keghi kha wẹẹ, ‘Akpawẹ ma ọre ọ rre agbọn vbe ẹghẹ avbe erha mwa odede, ma ighẹ yin uyinmwẹ ne iran yinrin ne iran na gbele avbe akhasẹ ẹghẹ ni.’

³¹ Ẹ i re te uwa ghi ya ọnii miẹn kue nian ighẹ ivbi avbe emwa ni gbele avbe akhasẹ wa gele khin!

³² Wa gie obọ gha kẹe, wa winna iwinna ne avbe erha uwa suẹnrẹn fo.

³³ Wa ne ẹyẹn, wa ne ivbi ẹyẹn, vbọzẹ ne uwa na te ro yi ighẹ wa gha miẹn uhunmwu vbe obọ abe ẹrinmwi ne ehianmwẹ ivin?

³⁴ Ne I tama uwa nian: I gha gie avbe akhasẹ, umẹwaẹn kevbe emamwaemwi gie uwa. Wa gha gbele eso ua vbọ, wa gha kan eso mu ugbugbe, wa gha gbe eso asan vbe Ọgua ediọn uwa, wa ghi vbe khulo iran ke ẹvbo ọkpa la ọvbehe.

³⁵ Rhunmwuda ọnii, ikhi ne a ra rria ye ẹmwẹ emwa ni ma rukhọ ne a gbele ua na, wa ọre ọ ra ya uhunmwu tọn ẹn mu. Ke egbe Ebel ne ọ ma rukhọ gha dee do sẹ egbe Zekaraia ne ovbi e Barakaia, ne uwa gbe ua ye ẹkpo Ọgua Osa kevbe ogiukpo.

³⁶ Ne I tama uwa, orre na ọre ọ ra rrioya ye ẹmwẹ na hia!

Vbene Jesu Ho Ẹmwẹ Jerusalẹm Hẹ

³⁷ “Jerusalẹm, Jerusalẹm, wẹ ne ọ gbele avbe akhasẹ, u na vbe ye okuta gbele emwa ne Osanobua gie bu ruẹ gha dee! Inugba inugba I he te gha ho ne I tan obọ mwẹ ga emwa ruẹn zẹ vbene iye ọkhọkhọ tan ifuẹn gue ivbi ẹre, sokpan, u ma kue yọ.

³⁸ Banbanna nian, ẹvbo ruẹ khian evba he!

³⁹ Ne I tama ruẹn nian, ke ẹghẹ na gha rae, u i ghi ra miẹn mwẹ ọvbehe rhinrin u te do kha wẹẹ, ‘Afiangbe Osanobua nọ ne ọmwa ne ọ dee vbe eni Nọyaẹnmwa.’ ”