Matiu 20 - Edo Bible (E Baibol Ẹdo) Version 1996

Iran Ni Winna Vbe Ugbo Emwiokọ

¹ “A ye Arriọba ẹrinmwi gie okpia ọkpa ne ọ mwẹ ugbo emwiokọ ne ovbe kpaegbe vbe owiẹ vbirrivbirri ya viọ emwa iwinna ye ugbo ẹre.

² Iran ghi gba tae ye ikọbọ ọkpa vbe ẹdẹ nẹ, iran na gha rrie ugbo ya winna.

³ Rẹn keghi vbe gha rrie ẹki vbe ihe ẹgogo ihinrin, ọ keghi do vba emwa eso ni i mwẹ emwi ne iran ru vbe evba.

⁴ Ọ kevbe tama iran wẹẹ, ‘Wa gha rrie ugbo mwẹ ya winna, I gha ha osa ne uwa vbe ne ọ ke yi.’

⁵ Iran ni keghi vbe gha khian. Erriọ zẹẹ ọre ọ vbe ru ẹe vbe ẹgogo iweva kevbe ẹgogo eha.

⁶ Ọ ghi bu ẹghẹ ne ẹgogo isẹn ra ya tu, ọ keghi vbe dọlegbe gha rrie ẹki, ọ keghi vbe do vba emwa eso ni mudia vbe evba. Ọ nọ iran wẹẹ, ‘vbọzẹ ne uwa i na mwẹ emwi ọkpa ne uwa rhie ru ẹre yi?’

⁷ Iran wanniẹn tama rẹn wẹẹ, ‘Ma ma miẹn ọmwa ne ọ viọ ima ye iwinna.’ Ọ khama iran wẹẹ, ‘Wa vbe gha rrie ugbo mwẹ khekherriọ.’

⁸ “Ọ ghi sẹ ẹghẹ akota, nọyan ugbo keghi tie ọgbẹn ebe ẹre ne ọ do ha osa ne iran ni ya winna, ọ na wẹ ne ọ ka ha osa ne iran ni kiekie rre. Ọ keghi ya sẹ egbe iran ni ka gha rre.

⁹ A keghi ha iran ni rre vbe odẹ ihe ẹgogo isẹn ikọbọ ọkpọkpa.

¹⁰ Ọ ghi sẹ egbe iran ni ka suẹn iwinna, iran keghi te rhie aro ye Igho ne ọ kpọlọ sẹ ọnii, sokpan ọ keghi vbe ha iran ikọbọ ọkpọkpa.

¹¹ Iran ghi miẹn igho nẹ, iran keghi suẹn gha gui ẹzọ uwunu da ne ọ viọ iran ye iwinna wẹẹ,

¹² ‘Iran ne u kiekie viọ na, ẹgogo ọkpa kẹkan ọre iran ya winna, sokpan ma na, te ima wa winna la ẹdẹ hoho vbe uwu akpan ovẹn, vbe u ghi na ha ima hia igho ọkpa hẹẹ?’

¹³ Nọyan ugbo keghi wanniẹn tama ọkpa vbọ wẹẹ, ‘Danmwehọ ose mwẹ, I ma mu uẹn ru. Ẹ i re ikọbọ ọkpa vbe ẹdẹ ma gba tae yi?

¹⁴ Rhie igho ruẹ ne u gha rrie owa. Inu igho ne I ha nu uẹn ọre I ra vbe hae ne iran ni kiekie rre na.

¹⁵ Wẹ ma yayi ighe I sẹtin lo igho mwẹ vbe ne ọ khọnmwẹ, ra te ohu mwẹ ghi mu uẹn rhunmwuda ighe I ze emwi obọ?’ ”

¹⁶ Jesu keghi gbe ẹe wanniẹn wẹẹ, “Erriọ ye zẹẹ. Ikaro gha khian ikiekie, ikiekie gha khian ikaro.”

Jesu Guan Kan Ẹmwẹ Uwu Ẹre Ukpogieha

¹⁷ Ugbẹn vbe Jesu ghi rrie Jerusalẹm, ọ viọ avbe erhuanegbe ẹre ghe efẹn ọkpa vbe odẹ, ọ hẹko tama iran wẹẹ,

¹⁸ “Wa danmwehọ, ma rrie Jerusalẹm nian, a gha sẹ evba, iran gha mu Ovbi Ọmwa gie avbe igiohẹn kevbe avbe iran ni ma emwa Uhi, iran gha bu ohiẹn uwu gbe ẹe.

¹⁹ Iran ghi vbe rhie ẹre ne iran ni i re Ju, iran ni gha ya ẹe gbe ogiẹ, iran ghi gbe ẹre asan, iran ghi kan rẹn mu ugbugbe, vbe ikpẹdẹ ne ogieha, a gha huẹn ọnrẹn kpaegbe.”

Iye Ọmọ Do Nọ Emwi

²⁰ Iye ivbi e Zẹbede keghi bu Jesu gha dee, ọ vbokho egbe rriotọ nẹẹn, ọ keghi rinmwian ẹre iyobọ.

²¹ Jesu nọ rẹn wẹẹ, “Vbe u wẹ ne I ru nuẹn?” Rẹn wanniẹn wẹẹ, “Yan ma mwẹ wẹẹ, u gha rriọba nẹ ivbi mwẹ ọre ọ ra gha tota ke uẹ, ọkpa vbe obọ erha ọmwa, kevbe nọkpa vbe obọ iye ọmwa.”

²² Jesu wanniẹn tama iran wẹẹ, “Wa ma kue rẹn emwi ne uwa nọọn. Wa gha sẹtin wọn ukpu ne imẹ ra wọn na ra.” Iran wanniẹn tama rẹn wẹẹ, “Ma gha sẹtin.”

²³ Jesu wanniẹn tama iran wẹẹ, “Ẹmwata nọ ighe wa gha wọn vbe uwu ukpu mwẹ. Sokpan, mẹ i mwẹ asẹ ne a ya zẹ ọmwa ne ogha tota ye obọ erha ọmwa kevbe obọ iye ọmwa mwẹ. Avbe emwa ne Erha mwẹ rhie ẹre ye otọ khẹ ọre ọ yan rẹn.”

²⁴ Ugbẹn vbe erhuanegbe ne igbe ni dekẹe họn ẹmwẹ na, iran kegha mu ohu iran ne etẹn eva nii.

²⁵ Jesu keghi tie iran hia, ọ tama iran wẹẹ, “Wa rẹnrẹn wẹ iran ni khaemwisẹ yan emwa, wa mwẹ ẹtin vbe uhunmwu iran kevbe wẹẹ, iran ne ọkaolotu iran wa guan yan iran.

²⁶ Sokpan ọ ghe uwa i sẹtin gha ye vberriọ. Ne ọ rhirhi gha ho ne irẹn gha re ne ọ kpọlọ vbe uwu uwa, wẹ nẹ ọ gha re ọguọmwadia ni dekẹe.

²⁷ Ne ọ vbe ho ne irẹn gha re okaro, giee gha re ọviẹn uwa hia.

²⁸ Zẹẹ vbe ne Ovbi Ọmwa ye, ọ ma rre ne a do gha ga ẹe, sokpan ne irẹn do ga emwa kevbe ne ọ ya orhiọn rẹn dẹ emwa ni bun werriegbe.”

Jesu Sinmwi Arhuaro Eva

²⁹ Iran ghi ke Jẹriko ladian, emwa nii bun keghi gha bi lele Jesu khian.

³⁰ Arhu aro eva nii tota ye ọkpẹn odẹ ghi họn ighe Jesu ọre ọ gberra, iran datu wẹẹ, “Ovbi e Devid, tohan mwa enọwanrẹn.”

³¹ Emwa nii rre evba keghi gu iran gui wẹ ne iran gue unu. Sokpan iran dọlegbe kakabọ datu wẹẹ, “Ovbi e Devid tohan mwa.”

³² Jesu keghi mudia, ọ ke tie iran, ọ nọ iran wẹẹ, “Vbe uwa ho ne I ru ne uwa?”

³³ Iran wanniẹn wẹẹ, “Ma ho ne u rhan ima aro.”

³⁴ Jesu keghi tohan iran, ọ keghi ya obọ kan iran aro, ọwarọkpa, iran keghi suẹn gha bẹghe, iran keghi lele Jesu.