Matiu 2 - Edo Bible (E Baibol Ẹdo) Version 1996

Emwa Eso Ke Odẹ Ahọ Rre

¹ Ẹvbo Bẹtlẹhẹm ọghe Judia ọre a na biẹ Jesu vbe ẹghẹ ọba Hẹrọd. Vbe ọ ma ghi he kpẹe, avbe emwa eso ni ghe umian vbe orhọnmwẹ, keghi ke odẹ ahọ gha die Jerusalẹm.

² Iran do nọọn wẹẹ, “Ọmọ ne a biẹ ẹe ne ọ do rriọba avbe Ju vbo? Ma miẹn orhọnmwẹ ọnrẹn vbe ọlarre owẹn, ọre ima na gha de do ye uhunmwu rhanmwẹ otọ nẹẹn.”

³ Ugbẹn vbe Hẹrọd họn ẹmwẹ na, iro keghi han irẹn kevbe emwa hia ni rre Jerusalẹm.

⁴ Ọ keghi tie iko avbe igie ohẹn kevbe avbe ọ rẹn Uhi, ọ na nọ iran wẹẹ, “De ehe ne a wẹ a gha na biẹ Mẹzaia?”

⁵ Iran na tama rẹn wẹẹ, “Bẹtlẹhẹm ọghe Judia nọ. Rhunmwuda, vberriọ ọ re avbe akhasẹ gbẹn ọẹn:

⁶ “ ‘Bẹtlẹhẹm ne ọ rre Judia, wẹ i re ne ọ kanmwa sẹ, vbe ẹbu ẹvbo iriegie Judia Rhunmwuda, odọ ọwuẹ ọre ọkaolotu gha ke ladian rre ne ọ do ru arọndẹ ne Izrẹl, emwa mwẹ.’ ”

⁷ Hẹrọd keghi si avbe orhunmwuyẹn ni ke owẹn owiẹ rre na uma, ọ keghi nọ iran ẹghẹ ne nene orhọnmwẹ ya ladian zẹẹ.

⁸ Ọ keghi gie iran gha rrie Bẹtlẹhẹm ọ wẹẹ, “Wa ya gbe aro kotọ gualọ ọmọ na, wa ghẹ ghi miẹn ọẹn nẹ, wa do khama mwẹ ne imẹ miẹn ehe na vbe ya ya uhunmwu rhanmwẹ otọ nẹẹn.”

⁹ Iran keghi si okhian. Ugbẹn vbe iran ghi wa la odẹ, orhọnmwẹ ne iran ka miẹn vbe ọlarre ovẹn, kevbe ladian, ọ keghi ke odaro ne iran rhinrin ọ te ya demudia vbe ehe ne ọmọ ni ye.

¹⁰ Ugbẹn vbe iran miẹn orhọnmwẹ na, ẹko hia keghi sẹ iran ọyẹnmwẹ uan.

¹¹ Ugbẹn vbe iran ghi la owa, iran keghi miẹn nene ọmọ kẹe kevbe Meri ne iye ẹe. Iran keghi diguẹ ya emwi nẹẹn, igoru, eturari kevbe oziya.

¹² Osanobua keghi tama iran vbe imina wẹ ne iran ghẹ ghi van ọghe Hẹrọd, iran keghi la odẹ ọvbehe gha rrie.

A Mu Jesu Lẹ Gha Rrie Igipt

¹³ Ugbẹn vbe iran ghi kpao vbe evba nẹ, odibo e Nọyaẹnmwa keghi rhiegbe ma e Josẹf vbe imina, ọ tama rẹn wẹẹ, “Kpaegbe, mu ọmọ ni kevbe iye ẹe lẹ gha rrie Igipt, di evba ya I te do tama ruẹn ne ukpa vba. Hẹrọd gha gualọ ọmọ na ne irẹn gbe ẹe rua.”

¹⁴ Josẹf keghi rhunmwuda ọnii mu ọmọ ni kevbe iye ẹe gha rrie Igipt.

¹⁵ Evba iran gha ye Hẹrọd to do wu. Ọna sunu ne ẹmwẹ ne Nọyaẹnmwa la unu akhasẹ guan miẹn ehe na sẹ wẹẹ, “Mẹ tie ovbi mwẹ ke Igipt rre.”

Ugbelemwẹ Emobọ Negiẹrẹ

¹⁶ Ugbẹn vbe Hẹrọd ghi miẹn wẹ avbe emwa ni ke odẹ ahọ rre na rẹrẹ irẹn, okuosu keghi rriọe, ọ keghi yi iyi ọwarọkpa nii wẹ ne a gbele emọ ikpia hia ni rre ukpo eva gha di otọ vbe Bẹtlẹhẹm.

¹⁷ Ẹghẹ nii ọre ẹmwẹ Jerimaia ne akhasẹ na do sẹ wẹẹ,

¹⁸ “A họn ugomwẹ ọkpa vbe Rama, a họn ugomwẹ eve orriara, Rekiẹl viẹ avbe ivbi ẹre; ọ viẹ ẹe, ọ ma gia bọ ọ, rhunmwuda, ọ ma ghi kẹe vbọ hiehie.”

A Werriegbe Ke Igipt Rre

¹⁹ E Hẹrọd ghi wu nẹ, odibo e Nọyaẹnmwa keghi rhiegbe ma Josẹf vbe imina vbe otọ Igipt.

²⁰ Ọ wẹẹ, “Kpaegbe, mu ọmọ ni kevbe iye ẹe ne uwa gha rrie otọe Izrẹl rhunmwuda iran ni te gualọ ọmọ ni ne iran gbe ẹe rua wulo nẹ.”

²¹ E Josẹf keghi mu ọmọ ni kevbe iye ẹe, iran kegha rrie otọe Izrẹl.

²² Ugbẹn vbe ọ ghi họn ighẹ, Akilọs ne ovbi e Hẹrọd rriọba lele erha ẹe, ohan ma ghi gie Josẹf yakọ vbe evba. Ọ ghi rre imina, a keghi vbe dọlegbe bu ẹre ude emwi ne ọ gha ru. Ọ keghi kpao gha rrie otọe e Galili.

²³ Ọ keghi ya yin ẹvbo ne a tie ẹre Nazarẹt. Ọ ru vberriọ ne ẹmwẹ avbe akhasẹ miẹn ehe na sẹ wẹẹ, “A gha tie ẹre ovbi e Nazarẹt.”