Matiu 19 - Edo Bible (E Baibol Ẹdo) Version 1996

Jesu Guan Kan Ẹmwẹ Ọdọ Vbe Amwẹ Ni Se Egbe Rae

¹ Jesi ghi guan avbe ẹmwẹ na fo nẹ, ọ keghi kpao vbe Galili rre, ọ na gha rrie iyeke nọkpa ọghe ẹzẹ Jọdan.

² Emwa ni bun keghi vẹ lelẹe, ọ keghi mu iran egbe rran vbe evba.

³ Avbe Farisi ni gualọ ẹre ẹmwẹ ne unu keghi rre, iran nọ rẹn wẹẹ, “Uhi ima fan obọ ẹre ne okpia ra ne ọ gha khu amwẹ ọnrẹn ba ẹmwẹ emwi ne ọ rhirhi khọn rẹn?”

⁴ Jesu wanniẹn tama iran wẹẹ, “Wa ma he tie ebe ẹre nọ kha re wẹẹ, ‘Vbe omuhẹn Ayi ne ọ yi ọmwa yi iran ọdọ vbe amwẹ.

⁵ Ọna ọre ọ siẹ ne okpia gha na sẹ erha ẹe kevbe iye ẹe rae, ọ ghi zẹ obọ lele amwẹ ọnrẹn, iran eva ghi do khian ọkpa.’

⁶ Rhunmwuda ọnii, iran i ghi re eva ọvbehe, iran khian ọkpa nẹ. Emwi ne Osanobua ya khian ọkpa nẹ, ọ ma kei ne ọmwa rhọkpa wannọ ẹn.”

⁷ Avbe Farisi keghi nọ rẹn wẹẹ, “Vbọzẹ ne Mosis ghi na wẹ ne okpia gbẹn ebe rhie ye amwẹ ọnrẹn obọ ighe rẹn khu ẹe, ne ọ we ẹre gha rrie?”

⁸ Jesu wanniẹn tama iran wẹẹ, “Rhunmwuda ighe wa lọghọ gbe ne a ma ẹre emwi, ọre Mosis na fan obọ ẹre ne uwa, ne uwa gha khulo amwẹ uwa. Sokpan ẹ i te ye erriọ ẹghẹ ne a na bu agbọn.

⁹ Ne I tama uwa nian, ọmwa ne ọ rhirhi khu amwẹ ọnrẹn vbe ẹ i re te ọ ru oghẹ, ighe ọ na vbe rhie okhuo ọvbehe, ọ ghẹ re.”

¹⁰ Avbe erhuanegbe ẹre tama rẹn wẹẹ, “A deghẹ erriọ ẹmwẹ ọdọ vbe amwẹ ye, a ma zẹdẹ rhie okhuo ọre ọwa fu egbe sẹ.”

¹¹ Jesu wanniẹn tama iran wẹẹ, “Iruẹmwi na i re ọ ghe umiẹnmwumiẹn vbe ẹ i re iran ne Osanobua rhie ẹre na.

¹² Rhunmwuda emwi ughughan ọre ọ si ẹe ne ọmwa i na sẹtin rhie okhuo, eso rrọọ ne a biẹ ọre ọghẹrriẹnoguan, eso rrọọ ne emwa ne agbọn ya khian vberriọ, emwa eso rrọọ ni rhunmwuda Arriọba Osanobua wẹ iran i rhie okhuo hiehie. A gie ne ẹtin ẹnrẹn ghi sẹ ọ rhan obọ miẹn iruemwi na.”

Jesu Fiangbe Ibiẹka Ne Giẹrẹ

¹³ Emwa eso keghi viọ ibiẹka giẹrẹ bu Jesu rre ne ọ viọ obọ yan iran na erhunmwu. Sokpan avbe erhuanegbe kegha gu iran gui.

¹⁴ Jesu keghi kha wẹẹ, “Gie avbe ibiẹka bu mwẹ gha dee, ghẹ de gbe iran odẹ rhunmwuda avbe iran orre ọ yan Arriọba Osanobua.”

¹⁵ Ọ ghi viọ obọ yan iran nẹ, ọ na si okhian.

Igbama Ne Ọ Fe

¹⁶ Ẹghẹ ọkpa, okpia ọkpa keghi rre do nọ Jesu wẹẹ, “Ọmaemwaemwi, de emwi esi ne I gha ru ne ẹfe ne ẹ i fo gha na sẹ mwẹ obọ?”

¹⁷ Jesu wanniẹn tama rẹn wẹẹ, “Vbọzẹ ne u na gualọ otọ emwi ne ọ maa vbe obọ mwẹ yi? Ọmwa Ne ọ maa ọkpa kẹkan ọre ọ rrọọ. Deghẹ u hoo ne ẹfe ne ẹ i fo sẹ uẹ obọ, gha mu uhi sẹ.”

¹⁸ Rẹn keghi vbe nọ Jesu wẹẹ, “De uhi ne ọ khin?” Jesu keghi wanniẹn, “Ghẹ de izigha, ghẹ ghẹẹ, ghẹ rhaa, ghẹ ta ohoghe.

¹⁹ Ya ọghọ ne erhaa kevbe iye uẹ, u ghi vbe gha ho ẹmwẹ ogieva ruẹ zẹ vbe ne u ho ẹmwẹ egbe ruẹ.”

²⁰ Igbama ni tama Jesu wẹẹ, “Mẹ mu ena hia sẹ nẹ. De emwi ọvbehe ne ọ ghi khẹ ke ne I ru?”

²¹ Jesu tama rẹn wẹẹ, “U gha ho ne ọ gba nuẹn fo, ya khiẹnnẹ emwi hia ne u mwẹ, viọ igho ẹre ne avbe ivbiogue, u gha mwẹ ẹfe vbe ẹrinmwi, bu mwẹ gha dee ne u do gha lele mwẹ khian.”

²² Ugbẹn vbe igbama nii họn ẹmwẹ na, ọ keghi khua uhunmwu gha rrie, rhunmwuda, ọ wa mwẹ emwi ẹsẹse.

²³ Jesu keghi tama avbe erhuanegbe ẹre wẹẹ, “Ne I tama uwa, ọ gha lọghọ gbe ọmwa ne ọ fe te do lao Arriọba ẹrinmwi.

²⁴ Ne I wa rhie tẹe wẹẹ, ne uhunmwu emwi vbe ẹmila la uvun olodẹ gberra ọre ọ gha kẹẹ sẹ ne ọmwa ne ọ fe la Arriọba Osanobua.”

²⁵ Ugbẹn vbe avbe erhuanegbe họn ẹmwẹ na, ọ keghi kpan iran odin. Iran keghi nọọn wẹẹ, “De ọmwa ne ọ ghẹ ghi fe khekherriọ?”

²⁶ Jesu keghi ghe iran, ọ wẹẹ, “Emwi ne ẹ i gia ru ọre ọna khin ne emwa ne agbọn sokpan a i miẹn emwi ne ẹ i gie Osanobua ru.”

²⁷ Pita keghi wa gbe ẹre ẹho rua ma Jesu wẹẹ, “Ma ni sẹ emwi hia rae do gha lele uẹ na, de emwi ne ọ ra sẹ ima obọ?”

²⁸ Jesu keghi tama iran wẹẹ, Ne I tama uwa, ẹghẹ ne Ovbi Ọmwa gha na tota ye ẹkete uyi ẹre vbe Agbọn Ọgbọn ne ọ dee, wa ne iweva ni lele mwẹ na, gha vbe tota ye ẹkete, wa ghi vbe gha bu ohiẹn ẹwae iweva ne ọ rre Izrẹl.

²⁹ Debare, ọmwaikọmwa ne ọ sẹ owa rae kevbe etẹn nikpia, etẹn nikhuo, erha ra iye, emọ ra ugbo rhunmwuda mwẹ, ukhukhu iyisẹn avbe emwi na hia gha sẹ ọre obọ deba ẹfe ne ẹ i mwẹ ọfo.

³⁰ Sokpan ni bun vbe uwu iran ni ke aro nian gha do khian ni ke iyeke, iran ni te ke iyeke ghi do ke odaro.