Matiu 18 - Edo Bible (E Baibol Ẹdo) Version 1996

Gha Ọkpọlọ Se?

¹ Ẹghẹ ni ọre avbe erhuanegbe na bu Jesu rre, iran nọ rẹn wẹẹ, “Gha ọ kpọlọ sẹ vbe Arriọba ẹrinmwi?”

² Rẹn keghi tie ọvbokhan ọkpa, ọ rhie ẹre mudia ye odaro iran.

³ Ọ wẹẹ, “Ne I khama uwa, vbe ẹ i re te uwa fiwerriẹ ne uwa do gha ye vbe ibiẹka, wa i sẹtin la Arriọba ẹrinmwi.

⁴ Ọmwa ne ọ mu egbe ẹre rriotọ ọ na do gha ye vbe ọvbokhan na, ọrọre ne ọ kpọlọ sẹ vbe Arriọba ẹrinmwi.

⁵ Ọmwa ne ọ vbe rhan obọ miẹn egbe ọvbokhan nekherhe na vbe eni mwẹ, ọ rhan obọ miẹn mwẹ.

Edanmwẹ Orukhọ Ne A Ru

⁶ “Ne ọmwaikọmwa gha ya ye ọkpa vbe uwu iran ne giẹrẹ ni ya mwẹ yi na ba odẹ mwẹ ku, ọ gha ma nẹẹn sẹ ne a de olọ ye ọre urhu, ne a dinmwi ẹn ye uwu amẹ okun.

⁷ Ohan agbọn to mwẹ rhunmwuda avbe emwi ne ọ de ọmwa odẹ ni rrọọ. Ẹ i mwẹ ne emwi ni si ọmwa fi orukhọ ghẹ sunu. Sokpan u miẹn vbe ọ gha ba so ọmwa ne ọ la obọ ẹre sunu hẹẹ.

⁸ “Deghẹ obọ ruẹ ra owẹ ruẹ ra ya a bibi odẹ, fian ẹn mu fua, u ya obọ ọkpa ra owẹ ọkpa la uwu ẹfe, ọre ọ maa sẹ ne a mu ẹn mu obọ eva ra owẹ eva fi uwu erhẹn etẹbitẹ.

⁹ Deghẹ aro ruẹ ọre ọ ra ya de odẹ, wọlọe rhie fua. U ya aro ọkpa la ẹfe ọre ọ maa sẹ ne u gha mwẹ aro eva ne a mu ẹn fi uwu erhẹn ẹrinmwi ne ehianmwẹ ivin.

Itan Ohuan Ne O Wiri

¹⁰ “Wa ghẹ zan ọkpa vbe uwu iran ne giẹrẹ na. Ne I tama uwa, ẹghẹ hia ọre odibosa iran ya mudia ye odaro Erha mwẹ ne ọ rre ẹrinmwi. [

¹¹ Rhunmwuda te Ovbi Ọmwa rre do miẹn iran ni wiri fan.]

¹² Vbe uwa ro ẹmwẹ na hẹẹ? Ọmwa ne ọ mwẹ ohuan iyisẹn, deghẹ ọkpa wiri vbọ, de emwi ne ọ gha ru? Te ọ gha sẹ ọkpa i rrọ vbe iyisẹn ni dekẹe rae ye ehe ne iran na rri irunmwu ne ọ ya gualọ ohuan ne ọ wiri nii.

¹³ Ọ gha miẹn ọẹn, ẹko ẹre ghi rhiẹnrhiẹn uan ba ẹmwẹ ọkpa ne ọ te wi nii sẹ ẹmwẹ ọkpa i rrọ vbe iyisẹn ni ma wii.

¹⁴ Erriọ ọre ọ ye zẹẹ erha uwa ne ọ rre ẹrinmwi i ho ne a miẹn ọkpa ne ọ wiri vbe uwu iran ne giẹrẹ na.

Ọtẹn Ne Ọ Ru Emwi Khọọ

¹⁵ “Ọtuẹn gha ru uẹ emwi khọ, bu ẹre gha khian, ya rhie ma rẹn. Sokpan wẹ vbe ọre ọkpa ghi gba ta ẹre ọ ghe uwu owa. a deghẹ ọ rhie ehọ nuẹn ta yi, te usi atua ye ẹmwẹ iku uwẹ vbe ọre.

¹⁶ Sokpan deghẹ ọ ma zẹ ye uẹ re. rhie arhin ọkpa ra eva ba egbe, ne a miẹn ehe na miẹn arhin eva ra eha ne ọ sẹ osẹe ye ẹzọ ne a gu ọmwa ni gui zẹẹ vbe ne a gbẹn ọẹn ye otọ.

¹⁷ Sokpan deghẹ ọ ma vbe zẹ ye iran ẹre, ya gui ẹzọ ruẹ hia ma esọsi. Deghẹ ọ ma vbe zẹ ye esọsi re, u ghi wa kae ba ọrriọvbe ra iran ni koko igho uhunmwu.

Emwi Ne A Fan Obọ Ẹre Kevbe Ne A Ma Fan Obọ Ẹre

¹⁸ “Ne I tama uwa hia nian, emwi ne uwa fan obọ ẹre vbe agbọn, a vbe fan obọ ẹre vbe ẹrinmwi. Emwi ne uwa ma vbe fan obọ ẹre vbe agbọn, a ma vbe fan obọ ẹre vbe ẹrinmwi.

¹⁹ “Ne I vbe rhie tẹe wẹẹ, wa eva gha sẹtin ku ekhọe gbe ya na erhunmwu nọ emwi ọkpa, Erha mwẹ ne ọ rre ẹrinmwi gha ruẹe ne uwa.

²⁰ Rhunmwuda arhin eva ra eha gha si uhunmwu koko nẹ vbe eni mwẹ, mẹ wa gu iran rre evba.”

Itan Ọguọmwadia Ne Ẹ I Yabọ

²¹ Pita keghi bu Jesu gha dee, ọ nọ rẹn wẹẹ, “Inu igba ọre I gha yabọ ọtẹn mwẹ sẹ vbe ọ gha ho mwẹ ẹmwẹ? Igba ihinrọn nọ ra?”

²² Jesu wanniẹn tama rẹn wẹẹ, “Ẹn o, ẹ i re igba ihinrọn sokpan igba ihinrọn vbe ihe ekigbe sẹ iyenẹ.

²³ Rhunmwuda, a ye Arriọba ẹrinmwi gie ọba ọkpa ne ọ wẹ ne avbe eguọmwadia ẹre viọ ebe ne iran gbẹnnẹ igho yi gie irẹn ne iran ghe ẹre.

²⁴ Ọwarọkpa vbe ọ wa da suẹn, iran mu ọguọmwadia ọkpa ne ọ rri ẹre osa enaira arriaisẹn vbe ihe arriaisẹn inu ihe ne ọ khin, bu ẹre rre.

²⁵ Ọ ma miẹn igho ya ha osa rhunmwuda ọnii, arowa ẹre na wẹ ne a khiẹn ọẹn khiẹn amwẹ ọnrẹn kevbe ivbi ẹre kevbe emwi hia ne ọ mwẹ ya ha osa ni.

²⁶ Ọguọmwadia na keghi fan fi guẹ vbe odaro arowa ẹre, ọ rinmwian ẹn wẹẹ, ‘Lahọ ziengbe mẹ, I gha ha osa na hia nuẹn.’

²⁷ Ohan rẹn keghi wa to arowa ẹre ni, ọ keghi ya igho ni hia ma rẹn, ọ na wẹ ne ọ gha rrie.

²⁸ “Okpia na ghi ladian, ọ dekun ọguọmwadia ne ihua ẹre ọkpa ne ọ mwẹ ọre osa enaira eso. Ọ keghi de obọ muẹn, ọ na gha wọ ẹre ẹho, ọ tama rẹn wẹẹ, ‘Ha mwẹ osa ne u rriọ mwẹ rẹ.’

²⁹ Ọguọmwadia ne ihua ẹre ni keghi fan fi iguẹ, ọ rinmwian ẹn wẹẹ, ‘Lahọ ziengbe mẹ, I gha ha osa na hia nuẹn.’

³⁰ Sokpan, ọ ma kue. Ọ keghi ya muẹn khui ye eghan ne ọ gha rre evba ọ te do ha osa ni.

³¹ Eguọmwadia ne ihua ẹre ghi miẹn emwi ne ọ sunu, egbe keghi wọọ iran, iran na ya gbẹngbẹn emwi na hia ma arowa iran.

³² Arowa nii keghi tie ọguọmwadia nii, la owa, ọ khama rẹn wẹẹ, ‘Wẹ ne ẹwobi ọviẹn ọmwa, mẹ ya osa ne u rriọ mwẹ re hia ma ruẹn rhunmwuda ighe u rinmwian mwẹ.

³³ Ọ te kei ne uwẹ vbe tohan ọguọmwadia ne ihua zẹ vbene imẹ tohan ruẹn.’

³⁴ Ohu keghi mu arowa ẹre nii, ọ na ya mu ọguọmwadia ni fi eghan, ne a gha rri ọre oya vbe evba rhinrin ọ te do ha osa hia ne ọ ru.”

³⁵ Jesu keghi gbe ẹe wanniẹn wẹẹ, “Erriọ zẹẹ. Erha mwẹ ne ọ rre ẹrinmwi ra ru uwa, adeghẹ dọmwadẹ ọghọe vbe uwu uwa ma fan ekhọe rua yabọ ọtẹn ọnrẹn.”