Matiu 16 - Edo Bible (E Baibol Ẹdo) Version 1996

Iran Nọ Iwinna Ọyunnuan

¹ Avbe Farisi kevbe Sadusi eso keghi bu ẹre rre. Iran gualọ odẹ vbene iran gha ya rhọ ẹre ye obọ hẹẹ. Iran nọ rẹn wẹẹ ne ọ winna iwinna ọyunnuan ọkpa ma iran ne ọ ya rhie ma ighe Osanobua rhie obọ ye iwinna rẹn.

² Sokpan Jesu wanniẹn iran ẹmwẹ wẹẹ, “Iso gha baa vbe ẹghẹ ne owẹn ya de okun, wa ghi wẹẹ, ‘ẹdẹ gha rran.’

³ Ovẹn gha yan rre ighẹ iso na gha baa, ọ na vbe bi nu nu nu, wa ghi wẹẹ, ‘Amẹ khian rhọ.’ Wa sẹtin ghe aro iso ya kha vbene ẹdẹ ra gha ye hẹ, vbọzẹ ne uwa i na sẹtin ghe ama ya ta umian ehe ne ẹghẹ na ye na gbe rrie?”

⁴ Jesu keghi kha wẹẹ, “Erriọ a vbe miẹn emwa dan kevbe ne ẹnina Osanobua izẹdẹ rre ọre ekhọe vbe ne orre na ye ra? Ẹ i re iwinna ọyunnuan wa gualọ vbe obọ mwẹ? Wa i ra miẹn ọvbehe nian gberra ọ ghe Jona ne akhasẹ.” Ọ keghi kpao sẹ iran rae, ọ na gha rrie.

Eyist Avbe Farisi Kevbe Sadusi

⁵ Avbe erhuanegbe keghi mianmian ne iran viọ ebrẹd mwẹ vbe iran fian odighi rra ghe obọ nọkpa.

⁶ Jesu keghi tama iran wẹẹ, “Wa mwẹ ẹwaẹn, ne u wa vbe gha begbe vbe obọ eyist avbe Sadusi kevbe Farisi.”

⁷ Iran khama egbe iran wẹẹ, “Rhunmwuda ne ima ma na viọ ebrẹd mwẹ ọre ọ na ta ẹmwẹ na.”

⁸ Jesu rẹn emwi ne iran roro, ọ keghi tama iran wẹẹ, “De emwi ne uwa talọ ye ẹmwẹ ebrẹd ne uwa i mwẹ yi? a miẹn vbe iyayi uwa kanmwa hẹ!

⁹ Wa ma he rẹn otọe ẹre ra? Wa ma ghi ye ẹdẹ ne I ghae ebrẹd isẹn ne arhunmwu arriaisẹn vbe ihe isẹn, inu okhuae ne uwa rhọ si koko?

¹⁰ Ẹdẹ ne I vbe ghae ebrẹd ihinrọn ne arhunmwu arriaisẹn vbe ihe enẹ, inu okhuae wa rhọ si koko?

¹¹ Wa i ghi la evba rẹn ighe ẹ i re ẹmwẹ ebrẹd ọre I gu uwa guan? Wa gha begbe vbe egbe eyist avbe Farisi kevbe Sadusi.”

¹² Ẹkpo nii ọre avbe erhuanegbe ghi na do rẹn ighe ẹ i re eyist na ya fian ebrẹd ọre ọ kha ighe iruemwi avbe Farisi kevbe Sadusi ọre ọ kha.

Pita Gbe Ẹmwẹ Jesu Ẹho

¹³ Jesu kegha rrie agbọn ẹvbo nọ sikẹ Sisaria Filipai, ọ keghi nọ avbe erhuanegbe ẹre wẹẹ, “De ọmwa ne emwa kha ighẹ Ovbi Ọmwa khin?”

¹⁴ Iran wanniẹn wẹẹ, “Emwa eso wẹ Jọn ne Ọsamẹ, eso wẹ Elaija eso vbe wẹ Jeremaia ra akhasẹ ọvbehe.”

¹⁵ Ọ nọ iran wẹẹ, “Wa tobọ uwa vboo? De omwa ne uwa roro ighe me khin?”

¹⁶ Saimọn Pita wanniẹn wẹẹ, “Wẹ ọrọre Mẹzaia, ovbi Osanobua ne ọ rrọọ.”

¹⁷ Jesu wanniẹn wẹẹ, “Saimọn ne ovbi Jona, ọ ma nuẹn ẹsẹse rhunmwuda ẹ i re ọmwa kẹkan ọre ọ rhie ẹmwata na ma ruẹn, obọ Erha mwẹ ne ọ rre ẹrinmwi taara ọre ọ ke bu ruẹ gha dee.

¹⁸ Mẹ tama ruẹn nian okuta ọre uwẹ khin Pita, okuta na ọre I gha bọ esọsi mwẹ yan. Uwu tobọ ọre i ra sẹtin khọnmiotọ vbe uhunmwu ẹnrẹn ẹdẹdẹmwẹdẹ.

¹⁹ I gha viọ isanhẹn Arriọba ẹrinmwi nuẹn, emwi ne u wẹ ne a ghẹ ru vbe agbọn, a wẹ ne a ghẹ ru ẹe vbe ẹrinmwi. Emwi ne u wẹ ne a ru vbe agbọn, a wẹ ne a ru ẹe vbe ẹrinmwi.”

²⁰ Jesu keghi tama avbe erhuanegbe ẹre ne iran ghẹ tama ọmwa rhọkpa ighe rẹn ọrọre ne ne Mẹzaia.

Jesu Guan Kan Ẹmwẹ Oya Kevbe Uwu Ere

²¹ Ke ẹghẹ ni kpao, ọre Jesu ke suẹn gha tua unu muẹn ma avbe erhuanegbe ẹre wẹẹ, “Ẹ i mwẹ I ma yo Jerusalẹm ne I ya rri oya emwi ni bun vbe obọ avbe eniwanrẹn, avbe igiohẹn kevbe avbe iran ni ma emwa Uhi. Iran gha gbe mwẹ uan, vbe ikpẹdẹ ne ogieha, a gha huẹn mwẹ kpaegbe.”

²² Pita keghi rhie ẹre ghe efẹn ọkpa, ọ kegha gu ẹe gui ọ wẹẹ, “Osanobua ghẹ gia miẹn emwi vberriọ Nọyaẹnmwa, emwi vberriọ ighe sunu vbe egbe ruẹ.”

²³ Jesu keghi fiegbe werriẹ, ọ tama Pita wẹẹ, “Kpao vbe ehe ne I ye rre, Setan. Idobo ọre u khin mwẹ re, rhunmwuda iro ne u zẹ ọghe emwa ne agbọn nọ, ẹ i re ọghe Osanobua.”

²⁴ Jesu keghi tama avbe erhuanegbe ẹre wẹẹ, “Ọmwaikọmwa ne ọ ho ne irẹn lele mwẹ, wẹ ne ọ mianmian enegbe ẹre, ne ọ mu ugbugbe ẹre, ne ọ lele mwẹ.

²⁵ Rhunmwuda, ọmwa ne ọ ho ne ọ sinmwi orhiọn rẹn gha muẹn fua, sokpan ọmwa ne ọ rhunmwuda mwẹ mu orhiọn rẹn fua, ọ gha miẹn ọẹn.

²⁶ De ere ne ọ rrọọ ne ọmwa adeghẹ agbọn na hia sẹ ọre obọ vbene ọ na mu orhiọn rẹn fua? Ẹ i mwẹ esa hiehie. Emwi ọkpa i rrọọ ne ọmwa gha ya sẹtin dẹ orhiọn irẹn werriegbe.

²⁷ Rhunmwuda ẹ i ghi rrie Ovbi Ọmwa la uwu uyi Erha ẹe gha khian, ke irẹn kevbe avbe odibosa ẹre, ẹghẹ nii, ọre ọ gha na ha osa ne edọmwadẹ ọghọe zẹ vbene iwinna rẹn ye.

²⁸ Sokpan wa ye rre o, emwa eso rre emwa na nian, ne ẹ i ra wu ọ te ya miẹn Ovbi Ọmwa vbe ọ gha rre zẹ vbe Ọba.”