Matiu 14 - Edo Bible (E Baibol Ẹdo) Version 1996

Uwu Ọghe Jọn Ne Ọsamẹ

¹ Uwu ẹghẹ na ọre Hẹrọd ne ọ kha yan Galili na họn ẹmwẹ Jesu. Rẹn keghi tama avbe ekhaẹmwẹ ọnrẹn wẹẹ,

² “E Jọn ne Ọsamẹ nọ, te ọ rhiọrre vbe idin, ọre ọ zẹe ne ọ na sẹtin winna iwinna ọyunnuan vbenian.”

³ Rhunmwuda, Hẹrọd gie ne a mu e Jọn khui ye uwu eghan ba ẹmwẹ Hẹrodias ne amwẹ Filip ọtẹn e Hẹrọd.

⁴ Jọn ne Ọsamẹ tua unu muẹn ma Hẹrọd wẹ ọ ma kei ne ọ rhie ẹre rọnmwẹ.

⁵ Hẹrọd gha te wa gbe ẹe rua, sokpan ohan avbe Ju kegha muẹn rhunmwuda iran hia wa ka e Jọn ye akhasẹ ẹmwata.

⁶ Vbe ẹdẹ ne Hẹrọd ru ayere ẹdẹ ubiẹmwẹ ọnrẹn, ovbi e Hẹrodias ne okhuo keghi la iku gha gbee, iku ẹre keghi wa rhiẹnrhiẹn Hẹrọd sẹrriọ

⁷ ne ọ na ya ihen yan ma rẹn wẹẹ, “Nọ emwi ne u rhirhi gha ho vbe obọ mwẹ, I gha rhie ẹre nuẹn.”

⁸ Zẹ vbe iro ne iye ẹe gu ẹe zẹ, ọmọ ni keghi ya nọ e Hẹrọd wẹẹ, “Ya mu uhunmwu e Jọn ne Ọsamẹ ye ọkpan gunmwẹ vbe emwa na.”

⁹ Emwi na keghi da ọba ẹsẹse sokpan rhunmwuda ighe sirra emwa ni rre evba hia ọre ọ na vẹn ihẹn, ọ na wẹ ne iran ya mu gi ẹe vbene ọ nọ rẹn.

¹⁰ Rhunmwuda ọnii ọre iran na ya fian e Jọn uhunmwu vbe uwu eghan.

¹¹ Iran keghi mu uhunmwu ni ye ọkpan mu gie ọmọ okhuo ni, rẹn keghi vbe mu gie iye ẹe.

¹² Avbe erhuanegbe Jọn keghi ya mu ikun e Jọn, iran ghi re ẹre nẹ, iran na ya tama Jesu.

Jesu Koko Arhunmwu Arriaisẹn Vbe Ihe Isen

¹³ Ugbẹn vbe Jesu ghi họn ẹmwẹ na, ọ la okọ kpao vbe evba rre, rẹn ọkpa kegha rrie ehe ne ọmwa rhọkpa i ye. Emwa nii hia ghi họn ẹn iran keghi kpao vbe ẹvbo iran la otọ bu ẹre gha khian.

¹⁴ Jesu keghi kpao hin uwu okọ rre, ugbẹn vbe ọ ghi miẹn avbe emwa na, ohan iran to ẹe ẹsẹse, ọ keghi sinmwi ne egbe ma rran vbe uwu iran.

¹⁵ Ugbẹn vbe ọ ghi sẹ ota, avbe erhuanegbe do tama rẹn wẹẹ, “Te ẹdẹ ghi ra mu, ẹ i re adesẹ ẹvbo ọre a ye vbe emwa, zẹ iran urrie ne iran ya tobọ iran gualọ evbare dẹlẹ vbe ore ẹvbo.”

¹⁶ Jesu tama iran wẹẹ, “Vbe iran ghi kpao hẹẹ, wa rhie evbare ne iran re.”

¹⁷ Iran wanniẹn tama rẹn wẹẹ, “Ma i mwẹ gberra eka isẹn kevbe ehẹn eva vbe emwa na.”

¹⁸ Jesu khama iran wẹẹ, “Wa viọ gunmwẹ.”

¹⁹ Ọ keghi tama emwa hia ne iran tota ye otọ vbe uhunmwu irunmwu, ọ keghi viọ eka isẹn kevbe ehẹn eva nii, ọ keghi tọn aro mu ghe odukhunmwu, ọ kpọnmwẹ Osanobua ọ keghi giagia eka ni viọ ne avbe erhuanegbe ẹre, avbe erhuanegbe keghi vbe viọ ne avbe emwa nii.

²⁰ Dọmwadẹ ọghọe keghi re vbene ọ sẹtin. Avbe erhuanegbe keghi viọ ni dekẹe vuọn okhuae iweva.

²¹ Emwa ni rri evbare ni keghi re omwa arhin arriaisẹn vbe ihe isẹn vbe ne a i na ka ikhuo kevbe ibiẹka.

Jesu Khiaẹn Vbe Uhunmwu Amẹ

²² Ugbẹn vbe Jesu ghi ra zẹ avbe emwa ni urrie, ọ khama avbe erhuanegbe ẹre ne iran la okọ ya mudia khẹ irẹn vbe iyeke ẹzẹ nọkpa.

²³ Ugbẹn vbe ọ ghi zẹ iran urrie nẹ, rẹn ọkpa keghi hin uhunmwu oke ne ọ ya na erhunmwu. Ebi ro nẹ, Jesu ọkpa keghi ye gha rre evba.

²⁴ Iran ghi khian buan nẹ vbe uwu odighi, ẹhoho kegha hoho, ọ na gha bi okọ yo bi ẹe rre vbe uwu odighi.

²⁵ Ọ ghi rre omwa ẹkpo ẹgogo eha ya sẹ ẹgogo enẹ vbe owiẹ, Jesu keghi nana uhunmwu amẹ bu iran gha dee.

²⁶ Ugbẹn vbe avbe erhuanegbe ghi bẹghe ẹre vbe ọ nana uhunmwu amẹ dee, iran keghi wa runran. Iran da tu wẹẹ, “Ghe ẹrinmwi.”

²⁷ Vbe ọwarọkpa ni, Jesu tama iran wẹẹ, “Wa ghẹ runran Mẹ nọ. Wa ghẹ gie ohan mu uwa!”

²⁸ Pita keghi wanniẹn tama rẹn wẹẹ, “Nọyaẹnmwa, a deghẹ wẹ gele nọ, rhie ẹtin mẹ ne i bu ruẹ gha die uwu amẹ.”

²⁹ Jesu tama rẹn wẹẹ, “Gha dee.” Pita keghi ladian vbe okọ, ọ kegha nana uhunmwu amẹ bu Jesu khian.

³⁰ Sokpan ugbẹn vbe ọ ghi miẹn ẹhoho, ohan keghi muẹn ọ na suẹn gha dinmwi ye uwu amẹ. Ọwarọkpa nii, ọ keghi datu wẹẹ, “Bu mwẹ rre Nọyaẹnmwa.”

³¹ Vbe ọwarọkpa nii, Jesu keghi si ẹre obọ, ọ tama rẹn wẹẹ, “Iyayi ruẹ kanmwa gbe, vbọzẹ ne u na ziro eva?”

³² Iran eva keghi gba la okọ, ẹhoho keghi da obọ yi.

³³ Avbe, erhuanegbe ni rre uwu okọ keghi ya uhunmwu rhanmwẹ otọ ne Jesu, iran wẹẹ, “Vbe ẹmwata, Ovbi Osanobua ọre u gele khin.”

Jesu Sinmwi Avbe Ọkhọnmwọ Vbe Gẹnẹsarẹt

³⁴ Ugbẹn vbe iran ghi fian ẹzẹ rraa, iran keghi ya dunmwu vbe Gẹnẹsarẹt.

³⁵ Emwa ẹvbo ni keghi wa rẹn wẹ Jesu nọ, iran keghi ya viọ avbe ọkhọnmwọ hia ni rre iwewe ni lẹga iran bu Jesu gha dee.

³⁶ Iran rinmwiaẹn wẹẹ, ọ gha rhe gha re ehọ ẹwu ẹre ọkpa nọ ne ọ gie avbe ọkhọnmwọ ya obọ kan rẹn. Egbe keghi rran iran hia ni ya obọ kan rẹn.