Matiu 11 - Edo Bible (E Baibol Ẹdo) Version 1996

Emwa Ne A Gie Ẹre Uhunmwu Ke Ọghe Jọn Rre

¹ Ugbẹn vbe Jesu ghi gu avbe erhuanegbe ẹre ne iweva guan avbe ẹmwẹ na hia fo nẹ, ọ keghi vbe kpao ya gha ma emwa emwi vbe ẹvbo ni lẹga enii.

² Jọn ghi họn vbe uwu eghan vbene Jesu winna hẹẹ, ọ gie eso vbe uwu avbe erhuanegbe ẹre.

³ Iran nọ Jesu wẹẹ, “Tama ima, wẹ ọrọre ọmwa ne Jọn wẹẹ ọ dee ra ne ima gha khẹ ọmwa ọvbehe?”

⁴ Jesu wanniẹn tama iran wẹẹ, “Wa ya tama e Jọn ẹmwẹ ne uwa họn ẹn kevbe emwi ne aro uwa sẹe na.

⁵ Avbe arhu aro bẹghe odẹ, avbe uke khiaẹn, a khue avbe ekhọnmwoti huan, avbe ayin ehọ họn ẹmwẹ, a huẹn avbe ni wulo kpaegbe, a kporhu Iyẹn Ne ọ maa ma avbe ivbiogue.

⁶ Afiangbe ọre ọghe ọmwa ne ọ ma gbe ọkhọnmwẹ ọkhọnmwẹ vbekpa mwẹ.”

⁷ Erhuanegbe Jọn ghi kpao nẹ, Jesu keghi suẹn gha ta ẹmwẹ Jọn ma iran ni gbe ẹbu ye ehe ne ọ ye wẹẹ, “Ẹghẹ ne uwa na bu Jọn gha rrie uwu ato, de egbe ọmwa ne uwa te ro ighe ọ khin? Ebe erhan ne ẹhoho biyo birre?

⁸ De emwi ne uwa ladian ya ghee? Ọmwa ne ọ ye ukpọn haan nọ ra? Ẹguae ọre a na miẹn egbe ọmwa vberriọ.

⁹ Wa tama mwẹ, vbe uwa te ya ghe? Akhasẹ nọ ra? Ẹmwata ọ ni khin, sokpan ne I tama uwa, ọ kpọlọ sẹ akhasẹ.

¹⁰ Jọn ọrọre ọmwa ne a gbẹn ebe ẹre wẹẹ, ‘Osanobua khare wẹẹ, Ọguọmwadia mwẹ ne I gha gie ne ọ do zẹ odẹ ye otọ khẹ ruẹ ọre ọna khin.’

¹¹ Ne I khama uwa, emwa ni he rrie agbọn na hia, Jọn ne Ọsamẹ ọrọre ne ọ kpọlọ sẹ vbe uwu ehia. Sokpan, ọmwa ne ọ vbe kanmwa sẹ vbe Arriọba ẹrinmwi kpọlọ sẹ ọre.

¹² Ke ẹghẹ ne jọn ya suẹn gha kporhu do sẹ banbanna, Arriọba ẹrinmwi ke khian ne a ya ẹkiudu dekun, emwa ni wegbe vbe hia ne iran ya ẹtin yae khian ọghe iran.

¹³ Ọ te do sẹ ẹghẹ e Jọn, avbe akhasẹ kevbe Uhi e Mosis, ẹmwẹ Arriọba ni ọre iran gha ta.

¹⁴ Adeghẹ wa gha ya ẹmwẹ iran yi, e Jọn ọrọre Elaija ne iran khare ighẹ ọ dee.

¹⁵ Ne ọ mwẹ ehọ gie ẹ họn.

¹⁶ “De emwi ne I gha ya ivbiorre na gie? Iran yevbe ibiẹka ni tota vbe ẹki. Otu ọkpa ghi van okan mu nọkpa wẹẹ,

¹⁷ ‘Ma kpe ema irhiọha ne uwa, wa ma ku. Ma so ihuan irorinmwi ne uwa, wa ma viẹ.’

¹⁸ Vbe Jọn ne Ọsamẹ rre, ọ kegha yo aguẹ, ẹ i vbe da ayọn. Emwa ghi ra kha, iran wẹ, ‘Te ọ mwẹ orhiọn esu.’

¹⁹ Ovbi Ọmwa ghi vbe rre, ọ kegha re, ọ kegha da. Emwa ghi ra vbe kha, iran wẹẹ, ‘U ghe ẹre ighe ọmwẹko, ọdayọn, rẹn vbe iran ni koko igho uhunmwu kevbe avbe ẹwobi emwa ọre ọ gba mu obọ!’ Vbene ọ rhirhi a gha ye hẹ, emwi ne a ya ẹwaẹn Osanobua miẹn, ọre ọ kha ene unu ẹwaẹn Osanobua.”

Okpẹvbo Ni Ma Yayi

²⁰ Jesu keghi suẹ gha ta ku avbe okpẹvbo hia ne ọ na winna iwinna ọyunnuan, rhunmwuda iran ma zobọ vbe orukhọ ne a ru.

²¹ “Ọ suẹ Korazin! Ọ suẹ Bẹtsaida! Akpawẹ te a winna iwinna ọyunnuan ne a winnaẹn vbe uwu uwa vbe Taia kevbe Saidọn, ẹ i re eban iran ghẹ ghi viọ osọnmwẹ ukpọn ye egbe, zẹ emuẹn yan uhunmwu ne iran ya rhie ma ighe iran zobọ vbe orukhọ ne iran te ru.

²² U ghi vbe rẹn nian wẹ, ọ gha sẹ Ẹdẹ Ibuohiẹn, Osanobua gha tohan Taia kevbe Saidọn sẹ uwa.

²³ Kevbe uwẹ Kapaniọn! Ẹ i re te u tera tọn egbe ruẹ mu ya sẹ ẹrinmwi? A gha sua ruẹ fi ẹrinmwi nehianmwivin! Rhunmwuda, akpawẹ te a winna iwinna ọyunnuan ne a winnaẹn vbe uwu uwẹ vbe Saidọn, ọ gha ye gha rrọọ do sẹ ẹdẹnẹrẹ na.

²⁴ Ne I guẹ rẹn nian wẹẹ, ọ gha sẹ Ẹdẹ Ibuohiẹn, Osanobua gha tohan Sọdom sẹ ruẹ.”

Bu Mwẹ Gha Dee Do Hẹwẹ

²⁵ Vbe ẹghẹ ọkpa ni, Jesu keghi kha wẹẹ, “Evbavba Nọyaẹnmwa ẹrinmwi kevbe agbọn, I kpọnmwẹ ọn rhunmwuda, emwi ne uwẹ rhie lẹre ne iran ne umẹwaẹn kevbe ni rẹn emwi, u keghi rhie ẹre ma iran ni ma rẹn emwirhọkpa.

²⁶ Erriọ wa nọ, Evba vba, vbene ọ yẹ ruẹ kevbe vbene ọ ke ekhọe ruẹ rre ọre u ru ẹe.

²⁷ “Erhamwẹ viọ emwi hia mẹ nẹ. Gberra Evbavba, ọmwa ọvbehe ne ọ rẹn ọmọ ẹ i rrọọ, gberra ọmọ, ọmwa ọvbehe ne ọ vbe rẹn Evbavba, ẹ i rrọọ, vbe ẹ i re iran ne ọmọ ho ne ọ rhie ẹre maa.

²⁸ “Wa bu mwẹ gha dee, wa hia ne ihẹ nọkhua ne ọ mu wọ ẹre egbe, I gha rhie ikẹtin ne uwa.

²⁹ Wa rhie urọnghọn mwẹ ye urhu uwa, wa do ruẹ emwi vbe ehe ne I ye rhunmwuda, ọmwa ne ọ fu kevbe ne ọ mu egberriotọ ọre imẹ khin, wa gha miotọ na hẹwẹ.

³⁰ Urọnghọn ne I gha rhie ne uwa ye rọkhọọ, ihẹ ne I gha mu ne uwa ye hogha aa.”