Matiu 10 - Edo Bible (E Baibol Ẹdo) Version 1996

Avbe Erhaunegbe Iweva

¹ Jesu keghi tie iran iweva ne erhuanegbe ẹre si koko. Ọ rhie ẹtin ne iran ne iran ya gha khulo avbe orhiọn esu ladian, ne iran gha sinmwi emwa nikhuọnmwi kevbe ni huẹhuẹ hia.

² Eni iran iweva ni ọre ena khin: Okaro Saimọn (ne a vbe tiẹre Pita) kevbe ọtiọnrẹn ighe Andru Jems kevbe Jọn ne ọtiọnrẹn ivbi e Zẹbede.

³ Filip kevbe Batolomiu Tọmọs kevbe Matiu ne ọ koko igho uhunmwu, Jems ovbi e Alfiọs, kevbe Tadiọs.

⁴ Saimọn ne Oya a ya sinmwi ẹvbo ọmwa kevbe Judas Iskariọt, ọmwa ne ọ rhie Jesu maa.

Okhian Ne Iran Ne Iweva Yo

⁵ Jesu keghi tie iran ne iweva, ọ keghi gie iran uhunmwu, ọ yi iyi ne iran wẹẹ, “Wa ghẹ van iwewe avbe iran nẹ i re Ju ra ẹvbo emwa Sameria.

⁶ Wa bu ohuan ni wiri ni rre ivbi Izrẹl gha khian.

⁷ Wa ya kporhu wẹẹ, ‘Arriọba ẹrinmwi sẹ otọ fo.’

⁸ Wa mu iran ni khuọnmwi egbe rran, huẹn iran ni wulo kpaegbe, wa khue avbe ekhọnmwoti huan, wa khulo avbe orhiọn esu ladian. Te a rhie ne uwa ọghe ọhẹ, ọhẹ ọre uwa vbe rhie ẹre ne emwa ọvbehe.

⁹ Wa ghẹ viọ igoru, igho ẹrọnmwọ ra oze ye ẹkpo.

¹⁰ Wa ghẹ rhie ẹkpo ọ vbu evbare mwẹ obọ, wa ghẹ rhie ẹwu ra ibata ọvbehe ya gbe akhua, wa ghẹ rhie ọkpọ mwẹ obọ, ọmwa ne ọ winna, te a gha rhie emwi ne ọ khẹ kẹe nẹẹn.

¹¹ “Ẹvbo ne uwa a rhirhi lao, ọ kpọlọ ra ọ kanmwa, wa gualọ ọmwa ne ọ gha miẹn uwa yi ne uwa di owa ẹre ya, wa te do kpao vbe ẹvbo ni.

¹² Wa gha la uwu owa, wa ghi kha wẹẹ, ‘Ọfumwegbe guwa rrọọ.’

¹³ Deghẹ emwa ni rre owa ni rhie ehọ ne uwa ta yi, wa ghi sẹ otuẹ ọfumwegbe ne uwa rhie ne iran rae ne iran, sokpan a deghẹ iran ma rhie ehọ ne uwa ta yi, wa kie ẹre werriegbe.

¹⁴ Deghẹ a miẹn ẹvbo ne ọ ma rhan obọ miẹn uwa ra iran ma rhie ehọ ne uwa ta yi, wa ghi kevba ladian, wa ghi vbe bọnmwẹ ebubẹ ni rre uwa owẹ ye otọ.

¹⁵ Ne I tama uwa ọ gha sẹ ẹdẹ ibuohiẹn, Osanobua gha tohan emwa ni rre Sọdom kevbe Gomorra sẹ emwa ni rre ẹvbo ni.

Ukpokpo Ne O Dee

¹⁶ “Wa danmwehọ! Te I gie uwa ladian zẹ vbe ohuan la uwu oghẹn oduma. Wa ghi gha begbe vbe ẹyẹn, wa ghi vbe fu vbe idu.

¹⁷ Wa yegbe, rhunmwuda emwa eso gha dekun uwa mu gha rrie iko, a gha vbe gbe uwa asan vbe Ọgua ediọn iran.

¹⁸ A gha gu uwa gui ma enibuohiẹn kevbe avbe ọba rhunmwuda mwẹ, ne uwa miẹn ehe na kporhu Iyẹn Ne ọ maa ma iran kevbe iran ne ẹ i re Ju.

¹⁹ Iran gha viọ uwa ye erhan ẹzọ, wa ghẹ mu udu kee ba ẹmwẹ ne uwa gha ta ra vbene uwa gha tae hẹ. Ọ gha sẹ ẹghẹ, a gha rhie ẹmwẹ ne uwa gha ta ye uwa unu.

²⁰ Rhunmwuda ẹ i re ẹmwẹ obọ uwa ọre uwa ra ta. Orhiọn Erha uwa ne ọ rre uwu uwa ọre ọ ra rhie ẹmwẹ ne uwa gha ta ye uwa unu.

²¹ “Emwa gha silo etẹn iran ladian ne a gbelua, erriọ ọre erha gha vbe ru emọ. Emọ gha mu aro da erha iran, iran ghi gbele iran an.

²² Emwa hia gha mu ohu uwa rhunmwuda mwẹ. Sokpan ọmwa ne ọ mu uhunmwu kọe ya sẹ ufomwẹ, a gha miẹn rẹn fan.

²³ Deghẹ iran zẹ uwa owẹ vbe ẹvbo ọkpa, wa lẹ gha rrie ọvbehe. Ne I tama uwa, ẹ i kẹ uwa ya winna la otọe Izrẹl hia fo Ovbi Ọmwa ke rre.

²⁴ “Ọmwa ne a ma ẹre emwi, ẹ i kpọlọ sẹ ọmwa ne ọ ma ẹre emwi. Ọviẹn i sẹ enarẹn.

²⁵ Ọmwa ne a ma ẹre emwi sẹtin hia ne ọ vba ne ọ ma ẹre emwi. Ra ne ọviẹn vba enarẹn. Adeghẹ iran tie ọdafẹn nọyan owa Bẹlzibọb, inu ghi nọ ne iran ni rre owa ni!

Ọmwa Ne A Gha Mu Ohan Rẹn

²⁶ “Rhunmwuda ọnii, wa ghẹ mu ohan emwa. Emwi ne a guere hia gha khian ne a we rua, emwi ẹkhokho hia gha khian ne a rẹnrẹn.

²⁷ Emwi ne I tama uwa vbe ebiebi, wa gha rrie azagba ya tae ladian, emwi ne uwa họn ẹn vbe ẹkhokho, wa ya wewẹe vbe ẹrhunrhun owa.

²⁸ Wa ghẹ mu ohan iran ni gbe ikinnegbe ne ẹ i sẹtin gbe orhiọn, sokpan wa mu ohan Osanobua ne ọ sẹtin fuẹn egbe kevbe orhiọn uan vbe ẹrinmwi nehianmwivin.

²⁹ A miẹn ogbodu dẹ ọre eva ikọbọ. Sevba ọkpa kẹkan i sẹtin de fi otọ vbene Erha uwa ma na kue yọ.

³⁰ Sokpan eto ne uhunmwu uwa hia ọre a ka gba totooto.

³¹ Rhunmwuda ọnii, wa ghẹ gie ohan mu uwa. Wa ya ọgbin igho maa sẹ ogbodu!

Ne A Miẹn Kristi Kue Ra Ne A Siẹn ọẹn

³² “Ọmwa ne ọ rhirhi miẹn kue vbe azagba ighe ọghomwẹ rẹn khin, erriọ mẹ gha vbe miẹn rẹn kue vbe odaro Erha mwẹ ne ọ rre ẹrinmwi.

³³ Ọmwa ne ọ rhirhi siẹn mwẹ vbe azagba, mẹ gha vbe siẹn ọẹn vbe odaro Erhamwẹ ne ọ rre ẹrinmwi.

Ẹ I Re Ọfumwegbe, Umozo Nọ

³⁴ “Wa ghẹ ro ighe ọfumwegbe mẹ rhie rrie agbọn, hiehiere, ẹ i re ọfumwegbe, umozo nọ.

³⁵ Te I do viọ emọ ikpia aro da erha iran, emọ ikhuo da iye iran kevbe amwẹ ọmọ da iye ọdọ emwa.

³⁶ Ẹgbẹe ọmwa ọre ọ ra gha re oghian ne ọ khọ ẹko ọmwa sẹ.

³⁷ “Ọmwaikọmwa ne ọ ho ẹmwẹ erha ẹe ra iye ẹe sẹ mwẹ, ọ ma ke vbe ọghomwẹ, ọmwa ne ọ vbe ho ẹmwẹ ovbi ẹre nokpia ra nokhuo sẹ mwẹ, ọ ma ke vbe ọghomwẹ.

³⁸ Ọmwaikọmwa ne ọ ma mu ugbugbe ẹre ne ọ gha lele ukpowẹ mwẹ, ọ ma ke vbe ọghomwẹ.

³⁹ Ọmwaikọmwa ne ọ ho ne irẹn da orhiọn rẹn yi gha mu ẹn fua. Ọmwaikọmwa ne ọ mu orhiọn rẹn fua rhunmwuda mwẹ, ọ gha miẹn ọẹn rhie.

Ere

⁴⁰ “Ọmwaikọmwa ne ọ miẹn uwa yi, miẹn mwẹ yi, ọmwaikọmwa ne ọ miẹn mwẹ yi, miẹn ọmwa ne ọ gie mwẹ yi.

⁴¹ Ọmwa ne ọ miẹn ọguọmwadia Osanobua yi rhunmwuda ighẹ ọguọmwadia Osanobua nọ, ọ gha ghae vbe ere ẹre. Ọmwa ne ọ vbe miẹn ọmwa esi yi rhunmwuda ighẹ ọmwa esi nọ, ọ gha vbe ghae vbe ere ẹre.

⁴² Wa vbe yerre wẹẹ, ọmwaikọmwa ne ọ sa ukpu amẹ nọfurre ne ne ọ kanmwa sẹ vbe uwu iran ni lele mwẹ na, rhunmwuda ighẹ ọmwa ne ọ lele mwẹ nọ, ẹ i mwẹ ọ ma rri ere ẹre.”