Matiu 1 - Edo Bible (E Baibol Ẹdo) Version 1996

Ebe Ẹgbẹe Jesu

¹ Ebe uniẹn Jesu Kristi ne ọ re ovbi Devid ne ọ vbe re ovbi Ebraham ọre ọna khin.

² Ebraham ọrọre erha Aizik. Aizik keghi vbe re erha Jekọb. Jekọb ọrọre erha Juda kevbe etiọnrẹn.

³ Juda ọrọre erha Pẹrẹs kevbe Zẹra (a keghi tie eni iye iran Tema) Pẹrẹs ọrọre erha Hẹzrọn. Hẹzrọn keghi re erha Ram.

⁴ Ram ọre ọ biẹ Aminadab, Aminadab na biẹ Nasiọn ne ọ biẹ Salmọn.

⁵ Salmọn ọre ọ biẹ Boaz (a keghi tie iye ẹe Rehab.) Boaz ọre ọ biẹ Obẹd (a tie iye ẹe Rut) Obẹd ọre ọ biẹ Jese ne ọ biẹ Devid ne ọba.

⁶ Devid ọre ọ biẹ Solomọn (iye ẹe ọre ọ kagha re amwẹ Uraia.)

⁷ Solomọn ọre ọ biẹ Rehoboam, Rehoboam na biẹ Ahija ne ọ biẹ Asa.

⁸ Asa keghi biẹ Jehosafat ne ọ biẹ Joran. Joran ọre ọ biẹ Uzia.

⁹ Uzaia ọre ọ biẹ Ehaz. Ehaz keghi biẹ Hẹzekaia.

¹⁰ Hẹzekaia ọre ọ biẹ Manasẹ ne ọ biẹ Amọn. Amọn keghi biẹ Josaia,

¹¹ Josaia ọre ọ biẹ Jekonaia kevbe etiọnrẹn, ẹghẹ ni ọre a na viọ ivbi Izrẹl gha rrie Babilọn.

¹² A ghi viọ iran gha rrie Babilọn nẹ, Jekonaia keghi biẹ Sieatiẹl ne ọ biẹ Zerubabẹl.

¹³ Zerubabẹl ọre ọ biẹ Abiud ne ọ biẹ Eliaikim ne erha Azọ.

¹⁴ Azọ keghi biẹ Zadọk ne ọ biẹ Akim. Akim ọre ọ biẹ Eliub.

¹⁵ Eliub ọre ọ biẹ Eleaza ne ọ biẹ Maltọn ne erha Jekọb.

¹⁶ Jekọb na ọre ọ biẹ Josẹf ne ọre ọdafẹn e Meri ne ọ biẹ Jesu ne Mẹzaia.

¹⁷ Ke ẹghẹ Ebraham do sẹ egbe Devid kegha re orre iwenẹ. Vbe ke egbe Devid do sẹ ẹghẹ ne a na viọ ivbi Izrẹl gha rrie Babilọn, kevbe re orre iwenẹ, vbe ke ẹghẹ ni do sẹ ẹghẹ ne a na biẹ Mẹzaia kevbe gha re orre iwenẹ.

Ubiemwẹ Jesu Kristi

¹⁸ Vbene a ya biẹ Jesu hẹ ọre ọna khin. Josẹf ọre a ya Meri ne iye Jesu na. Sokpan vba te rhie ẹre rrie, a keghi miẹn wẹ ọ hanmwa vbekpa ẹtin Orhiọn Ne Ọ Huanrẹn.

¹⁹ Josẹf ne a yae na keghi re ọmẹhẹ, ọ ma ho ne ọ fa Meri ua ma emwa hia, ọ kegha gualọ odẹ vbene irẹn gha ya fẹko do sọrae hẹ.

²⁰ Vbene ọ wa ziro na vbekhọe, odibo ọghe Nọyaẹnmwa keghi rhiegbe ma rẹn vbe imina, ọ na tama rẹn wẹẹ, “Josẹf ne ovbi uniẹn Devid, ghẹ fian afianma ya rhie Meri ne amwẹ ọn la owa rhunmwuda ọmọ ne ọ hanmwa ni, ke obọ Orhiọn Ne Ọ Huanrẹn rre nọ.

²¹ Rẹn gha vbe biẹ ọmọ okpia ọkpa. Wẹ ghi he ẹre Jesu, rhunmwuda rẹn ọre ọ gha fannọ emwa rẹn hin obọ orukhọ iran rre.”

²² Avbe emwi na hia sunu ne ẹmwẹ ne Nọyaẹnmwa la unu akhasẹ ta miẹn ehe na sẹ wẹẹ,

²³ “Nene uvbi gha hanmwa, ọ gha vbe biẹ ọmọ okpia ọkpa, a ghi he ẹre Imanuẹl.” Emwi ne a ya ọnii kha ọrọre “Osanobua rrọọ yaba mwẹ.”

²⁴ Ugbẹn vbe Josẹf ghi rhiọrre, ọ keghi ru zẹ vbene odibo e Nọyaẹnmwa ni tama rẹn, ọ keghi ya rhie Meri la owa zẹ vbe amwẹ ọnrẹn.

²⁵ Sokpan iran ma miẹn egbe ọ te biẹ ọmọ okpia ni. Josẹf keghi he ẹre Jesu.