Malakai 2 - Edo Bible (E Baibol Ẹdo) Version 1996

¹ E Nọyaẹnmwa ne Oghodua tama avbe ohẹn wẹẹ, “Wa ọre a gu guan na.

² Te ọ kere ne uwa gha ya uyinmwẹ uwa rhie ọghọ mẹ. Deghẹ wa wẹ wa i rhie ehọ ye ẹmwẹ ne I ta, te I ra fi uwa unu. I gha fi avbe emwi ne uwa miẹn ya gha da egbe yi unu vbe ẹmwata, I fi ehia unu nẹ, rhunmwuda I tie ẹmwẹ ne I tama uwa ẹmwẹ kpataki.

³ I gha rria ivbi uwa ikhi, i ghi ya uwa aro wiẹn isan avbe aranmwẹ ne uwa do ya zọ ese, a ghi vbe dada uwa ladian gha rrie otiku.

⁴ Ẹghẹ nii, wa gha rẹn wẹ mẹ ọ re ọ gu uwa guan na, ne a ghẹ miẹn ehe na rra ile ne I gu avbe ohẹn ne ivbi uniẹn e Livai ta.

⁵ “Vbe ile ne I gu iran taa, I khare wẹ, iran gha rre agbọn, agbọn gha vbe maa iran, emwi ne I rhie ne iran ọ re ọnii khin, ne iran miẹn ehe na gha ya ọghọ mẹ. Vbe ẹkpo nii, iran wa gha ya ọghọ mẹ, iran na vbe gha mu ohan mwẹ.

⁶ Iran wa gha ma emwa emwi ne ọ kere ighe ẹire emwi ne ọ ma gba. Iran wa gha gun mwẹ rrọ vbe ọfumwegbe, ẹire wẹ te iran tobọ iran wa gha ru emwi ne ọ gbae ọkpa, sokpan iran keghi gha yi emwa nibun obọ ne iran rhie obọ hin emwi dan ne a ru rre.

⁷ Iwinna avbe ohẹn nọ ne iran ma emwa irẹnmwi ẹmwata ọghe Osanobua. Te ọ kere ne emwa gha bu iran yo ne iran ya gha ruẹ emwi ne I ho, rhunmwuda iran ọrọre ukọ ọghe Nọyaẹnmwa ne Oghodua.

⁸ “Sokpan, banbanna nian, wa ne avbe ohẹn fi iyeke gbe odẹ ẹmwata ne ọ rrọ nẹ. Emwi ne uwa ma emwa ẹre wa sii emwa nibun ya gha ru emwi ne ọ ma kei. Wa rraa ile ne I gu uwa taa nẹ.

⁹ Rhunmwuda ọnii, te imẹ ghẹghi vbe ru ẹe wẹ ne ivbi Izrẹl gha zan uwa rhunmwuda wa ma ru vbene imẹ ho; wa gha ma emwa emwi, wa i ya obọkpa mu emwa hia.”

Emwa Ni Ma Ye Ekhọe Lele Osanobua

¹⁰ Ẹire erha ọkpa ọ re ima hia mwẹ? Ẹire Osanobua ọkpa ọ re ọ yii ima hia? Vbe ọ ghi zẹ khekherriọ ne ima i na mu eyan ne a yan ma egbe sẹ, vbọzẹ ne ima na zan ile ne Osanobua guu avbe erha ima odede taa? Ivbi e Juda ma mu eyan ne iran yaan ma Osanobua sẹ, iran keghi vbe ru emwi ne ọ khọrhiọn vbe Jerusalẹm kevbe vbe ẹvbo nii hia.

¹¹ Iran mu awua la uwu Ọgua Osa ne Nọyaẹnmwa ho ẹmwẹ ọnrẹn. Ikpia mwẹ ikhuo ne iran viọ re ni gho ẹbọ ẹrrẹe.

¹² Te Nọyaẹnmwa gha yuo emwa ni ru egbe emwi vbenian kua hin uwu ẹbu ivbi Izrẹl rre, ne ọ ghẹ ghi vbe gie iran mwẹ oghae vbe emwi ne ẹvbo mwa do ya gha ha oko gie Nọyaẹnmwa ne Oghodua.

¹³ Wa ghe emwi ọvbehe ne uwa vbe ru. Wa ye ameve uwa ro gue Ogiukpo Osanobua mu otọ, wa gha viẹ, wa gha kpe orhu eve rhunmwuda ighẹ e Nọyaẹnmwa i ghi rhan obọ miẹn emwi ne uwa ya ha oko gie ẹe.

¹⁴ Wa nọ emwi ne ọ zẹẹ ne ẹi ghi na rhan obọ miẹn rẹn. Emwi ne ọ sii ẹe ọrọre wẹ ọ rẹnrẹn wẹ, wa ma ghi mu eyan nii sẹ, ne uwa yan ma okhuo ne uwa rhiere ẹkpo ne uwa na rre igbama. Egbakhian ruẹn ọ re irẹn gha khin, u ma mu eyan ne u yaan ma rẹn sẹ egbe ne a ya miẹn wẹ odaro Osanobua ọ re u na yan wẹ wẹ i ra rhie aro ghe ehe ọvbehe.

¹⁵ Ẹre te Osanobua ya uwẹ khian egbe ọkpa kevbe orhiọn ọkpa ba irẹn? De emwi ne ọ ya ẹe ru ọna yi? Emwi ne ọ khin ọrọre wẹ ọ ho ne uwa biẹlẹ emọ ni wa re emwa Osanobua vbe ẹmwata. Rhunmwuda ọnii, wa gia miẹn wẹ a ma miẹn ọmwa ne ọ ma mu eyan ne ọ yan ma ọvbokhan rẹn sẹ.

¹⁶ E Nọyaẹnmwa Osanobua Izrẹl khare wẹẹ, “Ne a gha khu okhuo wa sọnnọ mwẹ. Te ọ wa sọnnọ mwẹ vbe ọmwaikọmwa vbe uwu uwa a ru amwẹ ọnrẹn emwi dan vberriọ. Gia miẹn wẹ, u ma rhie obọ gberra eyan ne u yaan ma amwọn wẹ u i ra rhie aro ye okhuo ọvbehe aro.”

Ẹdẹ Ibuohiẹn Sikẹ Otọe Nẹ

¹⁷ Te egbe etalọ ne uwa talọ ghi wọ e Nọyaẹnmwa. Sokpan, wa ghi vbe nọ wẹẹ, “Vbe ima ya ya egbe wọ ẹre hẹ yi?” Vbe ekpa ne uwa na kha wẹẹ, “E Nọyaẹnmwa ne Oghodua ro wẹ emwa esi ọre emwa hia ni ru; emwi dan khin, vbe ẹmwata, ọ wa ho ẹmwẹ iran.” Ra ne uwa na kha wẹẹ, “Rẹn ghi vbo yi ighẹ nene Osanobua ne a wẹ ẹmwata nọ?”