Malakai 1 - Edo Bible (E Baibol Ẹdo) Version 1996

¹ Uhunmwu ne Nọyaẹnmwa giee Malakai re gie ivbi Izrẹl ọ re ọna khin.

Ahoẹmwọmwa Osanobua Ghe Ivbi Izrẹl

² E Nọyaẹnmwa tama emwa rẹn wẹẹ, “Te I wa ho ẹmwẹ ruẹn ẹdẹdẹmwẹdẹ.” Sokpan, iran wanniẹn wẹẹ, “Vbe u a ghi ya rhiema hẹ ighe u gele ho ẹmwẹ mwa?” E Nọyaẹnmwa wanniẹn wẹẹ, “Etẹn ọkpa ọ re Isọ kevbe Jekọb gha khin, sokpan mẹ keghi hoo ẹmwẹ e Jekọb kevbe ivbi uniẹn ọnrẹn.

³ I keghi vbe khuiwu Isọ kevbe ivbi uniẹn ọnrẹn. I dunmwu ẹvbo oke ọghe Isọ ua, I na se otọe ne o rro rae ne avbe aranmwẹ oha.”

⁴ Adeghẹ emwa Idọm ne ivbi uniẹn Isọ ghi vbe kha wẹẹ, “A guọghọ ima ẹvbo rua, sokpan, ma gha dọlegbe họlọ iran,” ẹghẹ nii, e Nọyaẹnmwa ghi vbe wanniẹn wẹẹ, “Gie iran dọlọ ẹe bọ, I gha dọlegbe dunmwu ẹẹn sẹ otọ. Emwa ghi gha tie iran ‘Ẹvbo dan’ kevbe ‘Uhunmwu ẹvbo ne ohu ẹre mu e Nọyaẹnmwa ẹdẹdẹmwẹdẹ.’ ”

⁵ Aro ivbi Izrẹl gha sẹ emwi na iran ghi vbe kha wẹẹ, “Ọmwa ne ọ mwẹ ẹtin ọre Nọyaẹnmwa khin, ya sẹ ẹgbẹ vbe avbe kpao hin otọ Izrẹl rre nẹ.”

E Nọyaẹnmwa Guu Avbe Ohẹn Gui

⁶ E Nọyaẹnmwa ne Oghodua tama avbe ohẹn wẹẹ, “Te ọmọ ya ọghọ ne erha ẹe, ọviẹn vbe ya ọghọ ne arowa ẹre. Mẹ ọrọre erha uwa, vbọzẹ ne uwa i na ya ọghọ mẹ? Mẹ ọrọre arowa uwa, vbọzẹ ne uwa i na lohan mwẹ? Wa zan mwẹ wa ghi ye vbe gha nọ wẹẹ, ‘Vbe ima ya zan ruẹn hẹ?’

⁷ Vbenian ọre nọ ne uwa na do gha ya evbare nọ ma maa zọ ese vbe Ogiukpo mwẹ. Wa ghi vbe nọ wẹẹ, ‘Vbe ima ma ya lohan ruẹn hẹ yi?’ I gha tama uwa, ne uwa ma na ka Ogiukpo mwẹ yọ.

⁸ “Ne uwa na mu aranmwẹ ne ọ rhu arọ ra ne ọ kunse ra ne ọ khuọnmwi do ya gha zọ ese ghe mwẹ ni, te uwa ro ighe emwi esi ọre ọnii khin ra? Wa mu egbe aranmwẹ vberriọ gie e gọvina ghe! Wẹ yayi wẹ ẹko ruẹ gha rhiẹnrhiẹn ọẹn ra ne ọ ru ẹse nuẹn?”

⁹ Wa ne avbe ohẹn, wa hia ne uwa nọ Osanobua wẹ ne ọ gha ye obọ esi mu ima. E I họn erhunmwu uwa, obọ uwa ọ re ọ ye.

¹⁰ E Nọyaẹnmwa ne Oghodua khare wẹẹ, “Akpawẹ a miẹn ọkpa vbe uwu uwa ne ọ gha khui urho Ọgua Osa nian ne uwa ghẹ ghi miẹn ehe na ya gha hie erhẹn nọ ma maa ye Ogiukpo mwẹ. Ẹko uwa i ma mwẹ hiehiere. I i ra rhan obọ miẹn emwi ihaoko ne uwa viọ gunmwẹ.

¹¹ Ke ehe ne agbọn sẹe vbe obọ na ya sẹ ehe ne ọ sẹe vbe obọ nọkpa, te emwa hia ya ọghọ mẹ. Ehe hia iran na giẹn eturari mẹ, iran ghi vbe gha zọ ese ne ọ gia rhan obọ miẹn. Te iran hia wa rhie ọghọ mẹ.

¹² Sokpan, te uwa yagha mwẹ vbe uwa a kha wẹ Ogiukpo nọ ma maa ọre ọghomwẹ khin, wa ghi vbe gha zọ ese evbare ne uwa wẹ ẹi ma vbe uhunmwu ẹnrẹn.

¹³ Wa ghi kha wẹẹ, ‘Ena hia wa khan ima,’ wa ghi gha tọn ukpihue mu ghe mwẹ, wa gha ra ha oko gunmwẹ, wa ghi mu aranmwẹ ne uwa do mu rre, ra ne ọ kun use ra ne ọ khuọnmwi. Wa yayi ighe mẹ gha rhan obọ miẹn uwa ọnii ra?

¹⁴ Emwi ọ gha rruan ne ọ mu ọmwa ru, ne ọ ye aranmwẹ nọ ma maa zọ ese ghe mwẹ, vbe aranmwẹ esiesi ne ọ yan rẹn wẹ rẹn gha mu gunmwẹ rre uwu oghẹn ọnrẹn! Rhunmwuda, ọba nọkhua ọre imẹ, khin, te emwa ni rre uhunmwu ẹvbo hia mu ohan mwẹ.”