Maika 7 - Edo Bible (E Baibol Ẹdo) Version 1996

Urhiamwẹ Uyinmwẹ Ivbi Izrẹl

¹ Ẹ i zẹdẹ maa, hiehie re! Te I ghi wa ye vbe ọmwa ne ohanmwẹ gbe ne ọ ma miẹn ọmọ erhan vbe uhunmwu erhan ra alimo ayọn vbe uhunmwu azara. Alimo ayọn hia kevbe avbe ọmọ erhan ni rhiẹnrhiẹn, iran kọlọ ehia fo nẹ.

² Ọmwa ẹmwata ọkpa ma ghi ke ẹe vbe otọe nii, ne ọ ye ekhọe ga Osanobua i ghi rrọ. Dọmwadẹ ọghe ọe wa gualọ ehe ne ọ gha na de izigha. Dọmwadẹ ọghe ọe wa ru ohuẹ ovbi ẹvbo ẹre.

³ Te emwi dan ne a ru wa gua iran hia obọ ro. Avbe ekhaẹmwẹ kevbe iran ni bu ohiẹn wa rri igho odieke. Ọmwa ne ọ hin usi ghi tama iran emwi ne irẹn ho, rhunmwuda ọnii, iran ghi gba si uma dan kugbe.

⁴ Iran ni maa sẹ, kevbe ne ẹ i ru ero vbe uwu iran, te ehia wa kuogboi zẹ vbe irunmwu. Ẹdẹ ni rre nẹ ne Nọyaẹnmwa gha rri avbe emwa oya, zẹ zẹ iran ighe avbe akhasẹ tama iran ye otọ. Banbanna nian, iro han iran hia.

⁵ Ghẹ ya ẹmwẹ ọmwa ẹdogbo ruẹ yi ra ne u mu ẹtin yan ọse ruẹ. Gha rẹn vbene u gu emwa guan hẹ, ya sẹ egbe amwọn.

⁶ Vbe agbọn ne a ghi ye na, emọ ikpia ghi ru avbe erha iran zẹ vbe akpa, emọ ikhuo ghi mu aro igbinna da iye iran, igbama ne ikhuo ghi gha gu iye ọdọ iran gui ẹzọ, emwa ẹgbẹe ọmwa ọrọre eghian rẹn.

⁷ Sokpan, mẹ gha rhie aro ye odẹ khẹ Nọyaẹnmwa. I gha ya iziengbe diakhẹ Osanobua, ọmwa ne ọ gha miẹn mwẹ fan. Osanobua mwẹ gha họn ọghomwẹ.

E Nọyaẹnmwa Rhie Imiẹnfan Dee

⁸ Emwi ne ọ gha zẹ ne eghian mwa gha na gha gbe ọvẹ yan mwa i rrọọ. Ma dele nẹ, sokpan, ma gha vbe kpaegbe. Uwu ebiebi ma ye na, sokpan Osanobua gha rhie uwanmwẹ ne ima.

⁹ Ma ru orukhọ ghe Nọyaẹnmwa nẹ, rhunmwuda ọnii, te ọ kere ne ima ziengbe ohu ẹre vbe omwa ẹghẹ eso, sokpan, vbe okiekie, ọ gha mu ẹzọ ima gui, ọ ghi kpe ima oya emwi ne a ya ru ima khọ ua.

¹⁰ Ẹghẹ nii, avbe eghian mwa gha miẹn ọẹn, efaa ghi rruan avbe eghian nii ni ye ima gbe ogie wẹẹ, “E Nọyaẹnmwa ne Osanobua uwa vboo?” Aro mwa gha sẹ ọe vbe a gha khọn miẹn iran otọ, a gha ya owẹ rrilo iran mu otọ zẹ vbe ọrho vbe adesẹ ore.

¹¹ Ivbi e Jerusalẹm, ẹghẹ dee ne a gha na dọlọ gbe ekẹn Jerusalẹm. Ọ gha sẹ ẹghẹ nii, a gha fian ba ehe ne otọe uwa sẹẹ.

¹² Emwa ruẹn gha dọlegbe ke ehe hia gha bu ruẹ rre, ke Asiria rre vbe owẹn owiẹ, ke Igipt rre vbe odẹ ekẹn, kevbe iwewe Ẹzẹ Yufretes rre, kevbe okun ne ọ rrei gha dee, kevbe ke oke ne ọ rre urria gha dee.

¹³ Sokpan otọ agbọn gha khian ato rhunmwuda uyinmwẹ dan ọghe emwa ni rrọọ.

Itohan Ne Nọyaẹnmwa Mwẹ Ghe Izrẹl

¹⁴ Nọyaẹnmwa, gha re ne ọ su ohuan avbe emwa ruẹn, emwa ne u hannọ zẹ. A gha rhe miẹn wẹ iran ọkpa ọ ya yin fua vbe otọ ẹgbo, otọe ne ọ maa emwiokọ lẹga iran. Gie iran ya gha koko egbe iran vbe ehe ne oha ne aranmwẹ na rri evbare ne ọ mobọ maa nii, vbe Basian kevbe Giliad, zẹ vbene iran gha ru vbe ẹghẹ ne ọ kpee fua.

¹⁵ Winna iwinna ọyunnuan ne ima, Nọyaẹnmwa, vbene u gha ru ẹe vbe ẹghẹ ne u na viọ ima ke Igipt ladian.

¹⁶ Avbe uhunmwu ẹvbo gha miẹn ọna, iro ghi han iran vbene iran ye wegbe sẹ nii. Vbe uwu iro ne ọ han iran, iran gha koko unu gbua, iran ghi ya obọ khiọ ehọ.

¹⁷ Iran gha wunnu la uzekhae vbe ẹyẹn. Iran gha ke owa ọkhẹ iran rre vbe uguọmwẹ kevbe ohan. Iran gha ya ohan bu e Nọyaẹnmwa Osanobua mwa rre.

¹⁸ Ẹbọ ọkpa ne ọ yevbe ruẹ i rrọọ Nọyaẹnmwa, wẹ ya orukhọ bọ avbe emwa ruẹn ni miẹn uhunmwu. U ma gie ohu wa mu uẹn ẹdẹdẹmwẹdẹ, sokpan, te ọ wa yẹ ruẹ ne u gha rhie itohan ruẹn ne ẹ i beghe ma mwa.

¹⁹ U gha dọlegbe tohan mwa uhukpa bare. U gha ya owẹ rrilo orukhọ mwa mu otọ u ghi kpolo ẹe ku ototọ okun!

²⁰ Wẹ gha rhie ẹmwẹ ọmwa rre ọmwa ekhọe kevbe aho ẹmwẹ ọmwa ne ẹ i beghe ma emwa ruẹn, ivbi uniẹn Ebraham kevbe Jekọb, zẹ vbene u yan ma avbe erha mwa odede ẹkporriọ.