Maika 5 - Edo Bible (E Baibol Ẹdo) Version 1996

¹ Wa ne ivbi e Jerusalẹm, wa khẹ ye egbe! Ghe i ghẹ iran mu okuo gie ima. Iran gha gu ọkaolotu Izrẹl gbinna!

Osanobua Wẹ Rẹn Gha Rhie Nọkhaemwisẹ Ke Bẹtlẹhẹm Rre

² E Nọyaẹnmwa khare wẹẹ, “Bẹtlẹhẹm Efrata, ọkpa vbe uwu ẹvbo ni kanmwa sẹẹ vbe Juda ọre uwẹ khin, sokpan, uwu uwẹ ọ re I gha ke rhie ne ọ khaemwisẹ ladian ne Izrẹl, rẹn gha vbe ke uniẹn nẹdẹ ne a ka ya gha bu ẹvbo nii ladian.”

³ Erriọ, e Nọyaẹnmwa gha zẹ emwa rẹn obọ ne avbe eghian iran, a te do miẹn wẹ ọmwa ne ọ ra biẹ ọe biẹ ọmọ okpia. Ẹghẹ nii, a ghi do ku ivbi ẹvbo ẹre ni rre iwe koko ba emwa iran.

⁴ Ọ gha rre, ẹtin ne ọ ke ehe ne Nọyaẹnmwa ye rre ọre ọ ra ya gha khaemwisẹ yan emwa rẹn, deba orrirri ọba ọghe Nọyaẹnmwa Osanobua tobọ ẹre. Emwa rẹn gha rrọ vbe a i mwẹ ebe rhunmwuda, otọ agbọn hia gha miẹn ukpọlọmwẹ ọnrẹn kue.

⁵ Rẹn gha vbe rhie ọfumwegbe rre. Ivbi Asiria gha mu okuo la ẹvbo mwa, iran na vbe guọghọ emwi ne ima ya khẹ egbe, ma gha gie avbe ọkaolotu ima ni wegbe sẹẹ ne iran ya gu iran gbinna.

Imiẹnfan Kevbe Irrioya

⁶ Iran gha ya emwi igbinna khọn Asiria mu otọ, otọe nii ne ọ re ọghe Nimrọd, iran gha vbe fannọ ima ye otọ vbe obọ ivbi Asiria vbe iran a mu okuo la otọe ẹvbo mwa.

⁷ Ivbi Izrẹl ni miẹn uhunmwu vbọ, gha yevbe evbu ne ọ fu ọmwa egbe rre ne Nọyaẹnmwa gie gie uhunmwu ẹvbo nibun, zẹ vbe amẹ ne ọ rhọ yan emwiokọ ne ọ da zọ dee. Iran gha ye egbe yan Osanobua ighe ẹ i re ọmwa kẹkan.

⁸ A gha zagha iran lele uhunmwu ẹvbo, iran gha do yevbe oduma ni ru ohuẹ emwi ne ọ ra re vbe uwu ẹgbo ra oha ne aranmwẹ na rria: Ọ ghi la uwu ẹbu ohuan, ọ ghi san yan iran, ọ ghi yanghan iran ukhiọnmwẹ ukhiọnmwẹ, idaehọ ighe a gha miẹn ẹnrẹn fan i rrọọ.

⁹ Izrẹl gha khọn avbe eghian rẹn mu otọ, ọ ghi fuẹn iran hia a.

¹⁰ E Nọyaẹnmwa khare wẹẹ, “Ọ gha sẹ ẹghẹ nii, I gha viọ avbe ẹsin uwa kpao, I ghi vbe guọghọ ikẹkẹ okuo uwa a.

¹¹ I gha guọghọ avbe okpẹvbo ni rre otọe rua, I ghi vbe rẹnkhẹn avbe emwi ne uwa ya khẹ egbe ua.

¹² “I gha rhia rua ighe avbe ẹbọ ne uwa lo, I i ra vbe sẹ ọho ne ọ miẹn aro ọkpa kẹkan rae ne uwa.

¹³ I gha guọghọ amazẹ uwa kevbe avbe orre okuta ẹbọ rua, wa i ghi ra dọlegbe gha gho emwi ne uwa ya obọ uwa ru ọvbehe.

¹⁴ I gha guọghọ ehia sẹ otọ ighe amazẹ Asiẹrra ne ẹbọ ne okhuo vbe otọe uwa hia, I ghi vbe dunmwu ẹvbo uwa hia a.

¹⁵ Vbe uwu ohu mwẹ nọkhua, I gha rria iran ikhi ighe avbe ẹvbo ne ẹ i họn ẹmwẹ mẹ.”