Maika 3 - Edo Bible (E Baibol Ẹdo) Version 1996

Maika Ta Ku Avbe Ekaolotu Izrẹl

¹ Wa danmwehọ, wa ni khaemwisẹ yan Izrẹl! Te ọ te kei ne uwa mu aro yọ ne a gha bu ohiẹn ẹmwata.

² Sokpan, ohu emwi esi ghi gha mu uwa, wa ghi gha ho ẹmwẹ emwi dan, wa gha zẹlẹ emwa mwẹ ohian, ke iran kevbe ẹmwẹ ne unu, wa keghi gbẹn ugboloko iran hia.

³ Wa rri avbe emwa mwẹ, wa zẹ iran ohian, wa guọghọ ugboloko iran, wa keghi giagia iran ye otọ zẹ vbene a giagia emiowo hẹ ye uwọnmwẹ.

⁴ Ẹghẹ dee ne uwa gha na datu tie Nọyaẹnmwa sokpan rẹn i ra zẹ ye uwa ẹre. Rẹn i ra vbe họn erhunmwu ne uwa na rhunmwuda wa ru emwi dan nẹ.

⁵ Emwa mwẹ khian ne avbe akhasẹ mu rẹrẹ, iran ghi bọ ọmọma ne iran ni rhie igho ne iran, sokpan ne ọ ma rhie igho ne iran, iran ghi wẹ re mu egbe khẹ okuo. E Nọyaẹnmwa tama avbe akhasẹ na nian wẹẹ,

⁶ “Wa ne avbe akhasẹ, ẹdẹ uwa rrie dọn ọn, ebi avan ra ro uwa. Rhunmwuda ne uwa na de emwa odẹ, wa i ghi ra miẹn umian akhasẹ ọvbehe, wa i ghi ra dọlegbe sẹtin ta emwi ne ọ gha he sunu ye otọ.”

⁷ Iran ni ta emwi ni gha he sunu ye otọ, efaa gha rruan iran vbe ọ ma ghi sẹ vberriọ. Emwiekhue gha rruan iran rhunmwuda Osanobua ma ghi zẹ ẹmwẹ wanniẹn iran.

⁸ Sokpan, zẹ vbe ọghomwẹ e Nọyaẹnmwa ya orhiọn rẹn kevbe ẹtin ẹnrẹn vuọn mwẹ ọ vbe rhie mwẹ ne I gha rẹn emwi ne ọ re ohiẹn ẹmwata, kevbe udinmwẹ ne I gha ya gha tama ivbi Izrẹl orukhọ ne iran ru.

⁹ Wa danmwehọ, wa ni khaemwisẹ yan Izrẹl, wa ni khuiwu ohiẹn ẹmwata, ne uwa na vbe ya emwi ne ọ gbae khian ne ọ ma gba.

¹⁰ Te uwa bọ e Jerusalẹm ne ẹvbo Osanobua yan ẹyotọ izigha kevbe a i bu ohiẹn ẹmwata.

¹¹ Iran ni khaemwisẹ vbe ẹvbo, igho ọ re iran re ya khaemwisẹ, avbe ohẹn gha miẹn igho ye otọ Uhi ne iran rhan ma emwa, igho ọ re avbe akhasẹ miẹn ya ghe umian, ehia ghi ye gha kha wẹ e Nọyaẹnmwa rrọ yaba iran. Iran ghi gha kha wẹẹ, “Emwi rhọkpa i ru ima, e Nọyaẹnmwa rrọọ yaba mwa.”

¹² Rhunmwuda ọnii nian, a gha rhunmwuda uwa ya e Zaiọn khian otọe ne a ya mu ugbo. E Jerusalẹm gha khian utete itowa, oke ne a bọ Ọgua Osa yi gha khian ẹgbo.