Maika 2 - Edo Bible (E Baibol Ẹdo) Version 1996

Emwi Ne Ọ Ra Rruan Iran Ni Wọ Ivbiogue Uhunmwu

¹ Umiẹn vbe ọ gha ba so iran hẹ ighe iran ne ẹ i miẹn ovbe vbe iran a lovbiẹ rhunmwuda emwi dan ne iran mwamwa vbe ekhọe! Iran gha wa miẹn ẹkpotọ ọwarọkpa vbe owiẹ, iran ghi ru emwi ne iran mwamwaẹn.

² Iran gha gualọ ako oha, iran ghi ya ẹtin vbe iwegbe mu ẹẹn, iran gha gualọ owa, iran ghi mu ẹẹn. Ẹgbẹe ọmwa ra ẹfe ọmwa ne egbe rọkhọ ẹe ẹ i ghi rrọọ.

³ Rhunmwuda ọnii, e Nọyaẹnmwa keghi kha wẹẹ, “I ra ru ẹe ne ọkhọ rruan uwa, wa i vbe lẹ ọre fe. Orueghe ọ re uwa ra miẹn na, ẹghẹ nii, wa i ghi ra gha khian ọkhian uhiomwẹ ọvbehe.

⁴ Ọ gha sẹ ẹghẹ nii, emwa ghi gha ya emwi ne ọ rruan uwa kpa itan zẹ vbe igiemwi ọkhọ, iran ghi vbe gha so ihuan iro na vbe ekpa emwi ne uwa miẹn: “A ya ima obọ sin otọ nẹ fẹẹrẹ! E Nọyaẹnmwa miẹn ima otọ nẹ, ọ keghi mu ne iran ni viọ ima oghunmwu.”

⁵ Rhunmwuda ọnii, ẹghẹ gha ghi sẹ ne a gha ya dọlegbe mu otọe nii ne emwa Nọyaẹnmwa, ẹ i ghi sẹ uwa rhọkpa obọ vbọ.

⁶ Emwa nii gha na iyẹn mwẹ iran wẹẹ, “Ghẹ ghi ya unu salọ ima. Ghẹ ghi talọ egbe ẹmwẹ nii. Osanobua i fa ima an.

⁷ Te uwẹ ro ighe te a fi ivbi Izrẹl unu ra? E Nọyaẹnmwa i ghi sẹtin ziengbe ra? Rẹn gha gele ru egbe emwi vberriọ ra? E i ghi gu iran ni ru emwi esi guan rọkhọrọkhọ ra?”

⁸ E Nọyaẹnmwa keghi wanniẹn wẹẹ, “Wa gha gu emwa mwẹ gbinna zẹ vbe eghian. Emwa gha ke okuo rre, iran ghi gha ro wẹ egbe rọkhọ iran vbe owa, sokpan, wa gha khẹ, ne uwa bannọ iran ukpọn ne ẹkun hẹ gha rrie.

⁹ “Wa khulo avbe ikhuo ne emwa mwẹ mwẹ kua vbe owa ne ọ yẹ iran. Wa ma ghi gie afiangbe mwẹ sẹ ivbi iran obọ ẹdẹdẹmwẹdẹ.

¹⁰ Wa kpaegbe ne uwa kpao, egbe rọkhọmwẹ i ghi rre emwa ọvbehe. Orukhọ ne uwa ru zẹ emwa na ye ne a ra fuan nẹ.

¹¹ “Egbe akhasẹ ne iran na ho ọrọre ne ọ talọ ohoghe kevbe ne ọ rẹrẹ emwa, ne ọ vbe kha wẹẹ, ‘I ta ẹe zẹ vbe akhasẹ wẹ ayọn kevbe emwi ne a da gha kpọkua ne uwa!’

¹² “Sokpan, mẹ gha si uwa koko, wa ne ivbi Izrẹl ni ghi kẹe. I gha viọ uwa kugbe zẹ vbe ohuan ne ọsuohuan viọ di owa ohuan. Zẹ vbe otọe ne aranmwẹ na rri irunmwu, ne ọ vuọn ne ohuan, emwa gha dọlegbe vuọn otọe uwa.”

¹³ Osanobua gha kie urho ne iran, ọ ghi viọ iran ke iwe ladian. Iran sanmwẹ la onurho ẹvbo nii, iran ghi khian Nọyan egbe iran. Ọba iran, e Nọyaẹnmwa tobọ ẹre, gha su iran ladian.